Judith Estrada-Larino

Limang personalidad ang pinagpipilian ng Pangulong Rodrigo Duterte na mabasbasan niya bilang Presidential candidate ng administrasyon sa 2022 national elections.

Kabilang sa mga pinagpipiliang maging ‘the anointed one’ ayon kay Presidential Spokesman Harry Roque sina Davao City Mayor Sarah Duterte-Carpio, Senador Bong Go, Senador Manny Pacquiao, dating Senador Bongbong Marcos at Manila Mayor Isko Moreno.

Gayunman sinabi ni Roque na hindi pa rin sang-ayon ang Pangulo na sumabak sa Presidential Elections si Mayor Sarah.

Wala pa rin naman aniyang pasya ang presidential daughter kung tatakbo sa presidential election.

Si Pacquiao ay Pangulo ng PDP Laban kung saan tumatayong chairman ang Pangulong Duterte samantalang miyembro ng partido sina Moreno at Go na long time aide at pinagkakatiwalaan ng Pangulo.

Sumampa muli sa mahigit 7,000 o nasa 7, 217 ang mga bagong kaso ng COVID-19 dahilan kaya’t pumapalo na sa 1,247,899 ang kabuuang kumpirmadong kaso ng nasabing virus sa bansa.

Dahil dito ipinabatid ng DOH na umakyat pa ang active cases ng COVID-19 sa 55, 790 kung saan 93. 6% ang mild, 2% ang asymptomatic, 1.8% ang severe at 1.4% ang critical condition.

Ayon pa sa DOH nasa 1,170, 752 ang total recoveries matapos madagdag ang 3,483 na mga bagong gumaling sa COVID-19.

Samantala sumirit naman sa 21, 357 ang total deaths matapos madagdag ang 199 na mga bagong nasawi sa nasabing virus.

Inihayag pa ng DOH na 56% ng ICU beds ng bansa at 37% ng mechanical ventilators ay nagagamit na.

Nilinaw ni Health Secretary Francisco Duque III na 9% lamang ng mga nabakunahan na ang bigong magpaturok ng second dose sa kanilang schedule.

Ayon kay Duque sakit o personal matter ang dahilan ng ilan sa mga hindi nakapagpaturok ng second dose sa ibinigay na schedule sa kanila.

Gayunman sinabi ni Duque na hindi naman nangangahulugang hindi na sila uubrang makapagpabakuna para sa ikalawang dose dahil pwede pang magpaturok kahit pa mahuli ng ilang araw o linggo.

Andun pa rin naman aniya ang epekto ng bakuna na nais makamit kahit bahagyang mahuli ang pagtuturok ng ikalawang dose o pagkumpleto ng pagbabakuna.

Tinatayang 3,000 indibidwal ang target ng gobyerno kaugnay sa ilulunsad na pag-aaral sa mix and match o pagbibigay ng magkaibang COVID-19 vaccines.

Sinabi ng Department of Science and Technology (DOST) na manggagaling sa A1 hanggang A4 priority group ang kasali sa clinical trial.

Ayon kay DOST Undersecretary Rowena Guevara ang mga participant ay huhugutin mula sa walong proposed study sites sa buong bansa.

Maaari aniyang sumali ang mga kasama sa A1 hanggang A4 vaccination priority groups batay na rin sa DOH roll out at Covax facility guidelines.

Hahatiin sa 12 study arm o sub group ng participants ng clinical trial kung saan ang unang pangkat ay magsisilbing control group na mag-aaral sa bakuna mula sa isang platform.

Ikalawa ay grupo ng mga participants na bibigyan ng magkaibang vaccine brand sa una at ikalawang dose at ang ikatlong grupo ay bibigyan ng ibang bakuna bilang booster shot o ikatlong dose.

Limang brand lamang ng COVID-19 vaccines ang gagamitin sa clinical trial na kinabibilangan ng Sinovac, Astrazeneca, Gamaleya, Pfizer-BioNTech at Moderna.

Mangunguna sa pag-aaral na maaaring simulan sa susunod na buwan si Dr. Michelle De Vera ng Philippine Society for Allergy, Asthma and Immunology (PSAAI).

Nilagdaan na ng DOJ at DILG ang joint memorandum circular kaugnay sa paglabag sa health protocols.

Kabilang sa mga lumagda sa nasabing circuar sina DILG Secretary Eduardo Ao, Justice Secretary Menardo Guevarra , PNP chief General Guillermo Eleazar at iba pang opisyal  ng dalawang ahensya ng gobyerno.

Sinabi ni anio na ang nasabing circular ay higit pang magpapalakas sa pagpapatupad ng minimum health and safety regulations.

Sa ilalim ng nasabing guidelines inoobliga ng dilg ang LGU’s at PNP na bumuo ng holding areas kung saan mananatili ang violators para hindi mapasama sa mga nakakulong na kriminal at hindi pa sumikip ang mga bilangguan.

Sakali mang ikukulong ang violators paiiralin ang local ordinances.

Tiniyak ni Año na mananagot din ang mga pasaway na opisyal kapag may nalabag na health protocols sa kanilang lugar.

Ang mga mahuhuli aniyang quarantine violator na walang sintomas ay imo monitor nila at dadalhin naman sa isolation facilities sakaling mag positibo sa COVID-19.

Pinatututukan ni Bayan Muna Party List Representative Carlos Isagani Zarate kay Energy Secretary Alfonso Cusi ang pagresolba sa manipis na power supply sa Luzon sa halip na makisali sa mga aktibidad ng PDP laban.

Magugunitang pinangunahan ni Cusi, vice chairman ng PDP Laban ang national council meeting ng ruling party sa Cebu nuong Lunes kung saan inadopt ang resolusyong humihimok sa Pangulong Rodrigo Duterte na tumakbo sa pagka-bise presidente sa 2022 national elections.

Sinabi ni Zarate na dapat unahin ni Cusi ang trabaho nitong solusyunan ang problema sa supply ng kuryente na nag resulta sa rotational brownouts at hindi ang makipag away sa kanilang partido para mas manatili pa sa poder ang Pangulong Duterte.

Kaugnay nito  nanawagan si Zarate na maamiyendahan at marepaso ang Electric Power Industry Reform Act para makabuo ng energy plan ang gobyerno at hindi ng power oligarchs.

Hindi pa nakakapagpasya si Vice President Leni Robredo sa political plan nito para sa 2022 national elections.

Subalit ipinabatid ni Robredo na tanging sigurado siya na mananatili siya sa public service, halal man o itinalaga.

Inamin naman ni Robredo na kinikilala niya ang panawagan ng supporters na tumakbo siya sa mas mataas na posisyon sa 2022.

Magiging hamon aniya sa kanya ang pag kumbinsi sa mga tao hinggil sa nagawa ng kanyang opisina dahil hindi naman lahat ay lumalabas sa media.

Isa si Robredo sa napupusuang kandidato ng opposition coalition na 1sambayan para sa pagka pangulo sa 2022.

Sumambulat ang malaking posibilidad na isabong  ng 1sambayan Coalition ang tambalan nila Manila Mayor Isko Moreno at Senador Grace Poe Para ipantapat sa mga pambato ng administrasyon sa 2022 national elections.

Sinasabing niluluto na umano ng 1sambayan ang Isko-Grace tandem sa paniniwalang kayang kaya nitong gibain at patumbahin ang tandem nina Davao City Mayor Sara Duterte at Senador Bong Go na umano’y pambato ng administrasyon.

Sinasabing tiwala ang coalition team na pinakamalakas ang hatak ng tambalang isko at grace kapwa sa popularidad at track record ng kanilang serbisyo publiko.

Bumibigay na umano si isko sa idea subalit tila nagdadalawang isip pa si Poe kung tatakbo matapos matalo nuong nakalipas na presidential elections.

Samantala ipinabatid ng isang source na nagpatawag na ng pulong si Isko nuong Biyernes para sa planong pagtakbo sa presidential race at kabilang sa mga dumalo rito ang ilang kaalyado ng Pangulong Rodrigo Duterte gayundin ang ilang personalidad na malapit sa dating Pangulong Noynoy Aquino.

Inirekomenda ng NBI na imbestigahan sina prosecution lawyer Mark Tolentino, dating wirecard top executive Jan Marsalek, bank Employee Joey Arellano, Judith Singayan Pe at iba pang indibidwal kaugnay sa German based company Wirecard.

Si Tolentino ay dating DOTr assistant secretary ng Pangulong Rodrigo Duterte at tumatayong exclusive distributor ng sinopharm vaccine sa bansa.

Pinakakasuhan ni NBI Director Eric Distor ng falsification of commerical documents, paglabag sa General Banking Act of 2000 at maging sa cybercrime prevention act ang nasabing grupo matapos mabisto ng NBI anti-fraud division ang kinasasangkutang iregularidad ng mga ito.

Ang imbestigasyon ay isinagawa ng anti-fraud division batay na rin sa inihaing reklamo ng Bank of the Philippine Islands kaugnay sa pekeng mga dokumento sa bangko na sinasabing isinumite ni Tolentino sa Ernst at Young Auditing Firm na inatasan ng german government para busisiin ang nawawalang $2.1 billion dollars o katumbas ng P100 billion.

Inilabas din ng NBI ang sinumpaang salaysay ng ilang saksi na nagtuturo kina Tolentino at pe na kasabwat at link sa nasabing wirecard controversy.