Judith Estrada-Larino

Hiniling ng Davao City Government sa IATF na ilagay sa MECQ ang lungsod sa loob 25 araw.

Ayon sa City government kailangang ipatupad ang 25 day MECQ simula bukas, Hunyo 5, para sa anito’y circuit breaker na tutugon sa pagsirit ng kaso ng COVID -19 sa Davao City.

Hanggang kahapon, ang Davao City ay nakapagtala ng 2,013 active cases at 17, 528 total cases ng COVID -19.

Una nang inilagay ng Pangulong Rodrigo Duterte sa GCQ ang Davao City at iba pang lugar sa buong buwang ito.

Pinagpapaliwanag ng Energy Regulatory Comission (ERC)  ang National Grid Corporation of the Philippines (NGCP) ang nabibiting pagkumpleto sa transmission projects na pina-a-aprubahan nito.

Ayon kay ERC Chair at CEO Agnes Devanadera , pinadedetalye nila sa NGCP ang mga pagbabago sa timeline at mga pangyayari at aktibidad sa modification ng completion ng transmission projects.

Ang paliwanag aniya ng NGCP ang maglilinaw sa estado at dahilan nang pagkabinbin ng 33 transmission projects na una nang inaprubahan ng ERC.

Tiniyak naman ni NGCP Spokesperson Cynthia Alabanza na makikipag tulungan sila sa ERC at ibibigay sa ahensya ang mga impormasyong hinihingi nito.

Suspendido muna ang pagpapadala ng Pinoy health workers sa Japan dahil sa COVID-19 pandemic.

Ipinabatid ito ni Philippine Ambassador To Japan Jose Laurel V kaugnay sa pinaiiral na travel ban ng japan subalit exempted dito ang mga nasa diplomatic at government service.

Ayon kay Laurel, maging ang mga miyembro ng diplomatic corps ay hindi maaaring lumapit sa mga delegado ng bansa na sasali sa Tokyo olympic games mula Hulyo hanggang Agosto.

Inihayag pa ni laurel na ligtas naman ang mga Pilipino sa Japan kung saan 135 ang recoveries, dalawa ang active cases at isa ang nasawi.

Una nang isinailalim sa state of emergency dahil sa COVID-19 ang ilang prefectures tulad ng Tokyo, Kyoto, Osaka at Hiroshima.

Nalampasan na ng Mindanao ang National Capital Region (NCR) kaugnay sa active cases ng COVID- 19.

Ayon sa DOH, hanggang nitong nakalipas na Hunyo 2, naitala sa 11, 391 ang active cases ng COVID -19 sa Mindanao kumpara sa 10, 174 na active cases sa Metro Manila.

Samantala ..ipinabatid ni Director Alethea De Guzman ng DOH Epidemiology Bureau na ang Cagayan at Central Luzon ang nakapagtala ng pinakamataas na kaso at mabilis na pagsirit ng kaso at nakita ang pagsirit ng mga bagong kaso ng COVID- 19 sa Davao City at Zamboanga regions dahil sa mas delikadong variants ng coronavirus sa basa at pagsuway sa health protocols tulad nang pagsusuot ng face masks at palagiang paghuhugas ng kamay.

Nitong linggo lamang ay 40 empleyado mula sa ibat ibang departamento ng Davao City Hall at Sangguniang pang lungsod ay nag positibo sa COVID -19.

Sa kabila ng pagtaas ng kaso,hindi naman inirerekomenda ng DOH  ang regional lockdown.

Inaprubahan na ng COMELEC ang kahilingan ng Department of Education na itaas ang compensation pay para sa mga guro na magsisilbing electoral board at poll watchers sa 2022 national elections.

Nagpasalamat naman si Education Secretary Leonor Briones sa go signal ng COMELEC sa request nilang maitaas ang compensation pay para sa mga guro.

Una nang inihayag ni COMELEC Chairman Sheriff Abas na suportado ng komisyon ang dagdag na hanggang P3,000 honoraria para sa mga guro.

Una nang isinulong ng DEPED ang honoraria rates base sa consumer price index at inflation rate nitong January 2021.

Kabilang dito ang  P9,000  para sa Chairpersons, P8,000 para sa EB members, P7,000 para sa Education Supervisor official at P5,0000 para sa support staff.

Bukod dito, idadagdag ng COMELEC ang provision para sa gastusin sa  transportasyon, pagkain, water allowance at clean up at repair/maintenance bilang bahagi ng kanilang budget proposal para sa 2022 elections.

Dahil sa pandemya, hiniling din ng DEPED ang health insurance coverage para sa mga dadapuan ng COVID-19 para mapasama sa panukalang budget para sa eleksyon sa susunod na taon.

Iniba na rin ng World Health Organization (WHO) ang coronavirus variant na una nang na detect sa Pilipinas.

Ayon sa WHO ang P.3 ay pinalitan bilang “theta” para maiwasan na rin ang diskriminasyon sa mga bansa kung saan unang nadiskubre ang mga bagong variant ng coronavirus.

Magugunitang lunes nang i anunsyo ng WHO na ang mga letra sa Greek alphabet ang gagamitin para matukoy ang Variants Of Concern (VOC) at Varianst Of Interest (VOI).

Nilinaw ng who na ang mga label na ito ay hindi ipapalit sa kasalukuyang scientific names, halimbawa yung mga itinalaga ng GISAID, nextstrain at Pango na nagbibigay ng mahalagang scientific information at patuloy na gagamitin sa research.

Binalaan ni Anakalusugan Partylist Representative Mike Defensor ang mga ospital na food items sa halip na cash ang ibinigay sa mga health worker.

Kasunod na rin ito ng mga reklamong natatanggap ni Defensor hinggil sa specialty hospital sa Quezon City na pinalitan ng bigas at groceries ang dapat sana ay P40,000 cash incentives para sa health workers.

Ipinaalala ni Defensor na sa Bayanihan 2 ang kada health personnel ay dapat mabigyan ng buwanang risk allowance bukod pa sa kanilang hazard pay at iba pang benepisyo.

Kung tutuusin sinabi ni Defensor na ilang buwan nang delayed ang nasabing dagdag kumpensasyon kayat hindi makatarungang palitan ito ng bigas at groceries.

Mananagot aniya sa paglabag sa procurement law ang mga naturang ospital kung itutuloy ang pagbili ng food items kapalit ng dapat ay cash incentives para sa health workers.

Binigyang diin naman ni Health Secretary Francisco Duque III na hindi pinapayagan ang pagpapalit ng cash incentives sa in kind at walang direktiba ang ahensya para gawing bigas at groceries ang cash incentives para sa mga health worker.

Dahil dito hiningi ni Duque ang pangalan ng mga ospital na nagsasagawa ng nasabing hakbang para maimbestigahan ang mga ito.

Patuloy ang mahigpit na paghimok ng Pangulong Rodrigo Duterte sa taumbayan para magpabakuna.

Sa ‘Resbakuna kasangga ng bida’ campaign ng DOH binigyang diin ng Pangulong Duterte na bakuna lamang ang tanging paraan upang malabanan ang COVID-19 pandemic.

Iginiit ng Pangulo sa naturang infomercial na dapat tandaan na ang bakuna ay hindi lamang magbibigay proteksyon sa bawat isa kundi maging sa mga mahal sa buhay lalo na ang mga may sakit at nakakatanda.

Susi rin aniya sa partisipasyon sa resbakuna aksangga ng Bida campaign para ganap na mabuksan ang ekonomiya at maibalik sa normal ang pamumuhay.

Tiniyak ng Pangulo na ginagawa ng gobyerno ang makakaya nito para mahusay na ma protektahan ang taumbayan laban sa COVID-19 hanggang malampasan ang krisis na ito.