Judith Estrada-Larino

Winelcome ng pribadong sektor ang vaccine roll out ng gobyerno sa mga kabilang sa A4 category o Economic frontliners.

Binigyang diin ni Guillermo Luz, Task Force T3 proponent at Chief Resilience Officer ng Philippine Disaster Resilience Foundation na malaking tulong sa pribadong sektor ang pagbabakuna sa A4 category para sa pagbubukas muli ng mga negosyo.

Nagpapasalamat aniya sila sa gobyerno sa pagbabakuna sa A4 sector na malaking factor para ligtas na buksan ang ekonomiya.

Pinuri rin ng Task Force T3 si vaccine Czar Carlito Galvez, Jr. sa pagtiyak ng matatag na supply ng COVID- 19 vaccines.

Ikinabahala ng Pangulong Rodrigo Duterte ang mga report hinggil sa maling pagtatapon ng medical wastes.

Kasunod na rin ito nang pagdiriwang ng World Environment Day nitong nakalipas na Hunyo 5.

Ayon sa Pangulo dapat balutin ng mabuti ang mga medical waste tulad ng mga facemask, syringe at karayom bago itapon sa basurahan  para hindi maging delikado sa kalusugan ng lahat.

Ibinahagi rin ng Pangulo ang nasabi sa kanya noong siya ang Davao City Mayor na ibaon sa lupa ang medical wastes na aniya’y maling hakbang para itapon ang mga ito.

Ibinabala ng Pangulong Rodrigo Duterte ang ibayo pang paghihigpit ngayong nananatili pa rin ang pandemya.

Ito ayon sa Pangulo ay kapag patuloy na nagpasaway ang maraming tao sa pagsunod sa health protocols.

Hindi naman tinukoy ng Pangulo kung anong paghihigpit ang ipatutupad niya subalit umaming nababahala sa pagtaas ng kaso ng COVID- 19 sa Bacolod at Cagayan De Oro kung saan marami ang tila wala nang pakialam sa pandemya.

Iginiit ng Pangulo na nasa kapangyarihan niya ang paghihigpit sakaling malagay sa panganib ang kalusugan ng ibang tao.

Tila minaliit lamang ng Department of Health (DOH) ang pagsirit ng kaso ng coronavirus disease 2019 (COVID-19).

Sinabi ni Health Undersecretary Leopoldo Vega na manageable ang pagtaas ng kaso ng COVID-19 subalit kailangan pa rin ang mahigpit na pagsunod sa health protocols at tuluy-tuloy na pagbabakuna.

Ang lahat aniya ng mga rehiyon ay mayroong kaso ng variants of concerns.

Kabilang sa mga lugar na nakagtala ng pagsirit ng kaso ng COVID-19 ang Western Visayas, Negros Oriental, Dumaguete at ilang bahagi ng Mindanao.

Dagdag-gastos lang ang antibody test na bigong makapagsabi kung mayroong proteksyon ang isang indibidwal laban sa coronavirus disease 2019 (COVID-19).

Ayon ito kay dating Health secretary, ngayo’y Congresswoman Janette Garin, dahil ang pinakamabisa pa rin aniyang panlaban sa COVID-19 ay bakuna.

Sinabi ni Garin na maaari ring magdulot ng kalituhan ang antibody test sa vaccination campaign ng gobyerno.

Inihayag pa ni Garin na bagama’t maaaring makatulong ang antibody test para matukoy ang mga taong nagkaroon ng COVID-19 subalit dahil wala o mahina ang sintomas ay hindi nagpa-ospital, hindi nito kayang tukuyin kung hindi na mahahawa ang isang tao.

Maaari aniyang isipin ng isang taong nag positibo sa antibody test na siya ay ligtas na kaya’t hindi na mag-iingat.

Humingi ng suporta sa mga mambabatas si Philippine National Police (PNP) Chief Guillermo Eleazar kaugnay sa regular na neuropsychiatric test sa mga pulis kada tatlong taon.

Ayon kay Elazar, sa ngayon ay kinakailangan lamang ang nasabing test para sa promotion at school requirements sa police organization.

Sinabi ni Eleazar na panahon na para mapagtuunan ng pansin ang trauma risk management ng PNP, at aminado siya sa mga limitasyon, lalo na sa healthcare capacities at services.

Ang rekomendasyon ni Eleazar na pagsalang sa neuropsychiatric test ng mga pulis ay matapos mag-viral ang pulis na si Hensie Zinampan sa pumatay sa isang ginang sa Fairview, Quezon City.

Magugunitang isa pang pulis sa katauhan ni Jonel Nuezca ay pumatay ng mag-inang Sonia at Frank Gregorio sa Paniqui, Tarlac noong Disyembre.

May posibilidad na luwagan ng gobyerno ang health protocols sa mga tumanggap na ng bakuna laban sa coronavirus disease 2019 (COVID-19).

Ito, ayon kay Secretary Carlito Galvez, Jr., National Task Force Against COVID-19 chief implementer at  vaccine czar, ang ginamit na strategy ng Israel para mahikayat ang kanlang mga mamamayan na magpabakuna.

Sinabi ni Galvez na naging epektibo ito dahil pumayag ang mga tao na magpa bakuna na para maluwag silang makagalaw samantalang limitado pa ang pagkilos ng mga tumatangging magpa bakuna habang mahigpit na sumusunod sa health protocol.

May go signal na rin ng gobyerno ng Israel na makadalo sa mga okasyon at maka biyahe sa ibang bansa ang mga tumanggap na ng kumpletong bakuna.

Hindi na rin obligadong magsuot ng face mask matapos mabakunahan ang mahigit sa kalahati ng populasyon ng Israel.

Ikinatuwa ni Defense Secretary Delfin Lorenzana ang naging online meeting nila ng counterpart official sa Japan na si Nobuo Kishi.

Ito ay matapos mapansin ni Lorenzana sa gilid ng lamesa ni Kishi ang mga simbolikong produkto mula sa Pilipinas na ibinida ng Defense minister tulad ng mangga, saging at miniature ng jeepney na kilalang transportasyon sa Pilipinas.

Sinabi ni Lorenzana na natutuwa at nagpapasalamat siya sa effort ni Kishi at staff nito dahil kahit online ay nagdecorate ito ng mga bagay na identified sa Pilipinas bilang respeto sa mga Pilipino.

Ipinaabot din ni Lorenzana ang excitement sa mga aktibidad at proyektong pagsasamahan ng dalawang bansa.