Judith Estrada-Larino

Mahaba na ang pila sa isang mall sa Ermita, Maynila gayundin sa isang eskuwelahan sa Caloocan City para sa unang araw nang pagbabakuna ng A4 category o economic frontliners.

Sa Maynila apat na malls ang binuksan upang mabakunahan ang mga pasok sa A4 category para sa 750 doses lamang ng COVID-19 vaccine.

Sinabi ni Mayor Isko Moreno na kailangan munang magpa-register subalit hindi nakasaad kung anong oras dapat dumating o saang vaccination site dahil mismong ang mga magpapa bakuna na ang pipili basta’t nakapagpa register na at nabigyan ng QR code.

Samantala,sa caloocan city naman,isa ang Maria Clara High School sa mga vaccination site para sa A4 category at kung saan 400 lamang ang pupuwedeng mabakunahan sa initial dose ng Sinovac .

Mahigit 200 katao naman ang nakatakdang bakunahan sa second dose ng Astrazeneca vaccine sa Caloocan City.

Winelcome ng Philippine Air Force ang pagdating ng lima pang bagong S-70i blackhawk utility helicopters mula sa Poland.

Ang nasabing ikalawang batch ng bagong helicopters ay isinakay sa Antonov transport plane na lumapag sa Clark airbase sa Pampanga.

Ayon kay Airforce Spokesman Lt Colonel Maynard Mariano, naasahang maide-deliver na rin bago matapos ang taong ito ang ikatlong batch ng lima pang blackhawk helicopters na ang unang batch ay napasakamay ng bansa noong isang taon.

Malaking tulong aniya ang mga nasabing helicopters sa heli lift capability ng AFP na makakatulong sa gobyerno sa pagbibigay serbisyo tulad ng pag biyahe ng COVID-19 vaccines at PPE’s sa mga remote areas sa Batanes, Bicol at iba pang lugar sa bansa.

Ang black hawk ay sinasabing pinakamahusay na multi mission utility helicopters na maaaring gamitin sa ibat ibang misyon ng Airforce tulad ng combat operations, humanitarian missions at troops deployment.

Bigong maipatupad ang physical distancing sa pagdagsa ng tao sa Matabungkay beach sa Lian, Batangas nitong nakalipas na weekend.

Makikita sa kumalat na video footage ang pami-pamilyang nagsu-swimming at iba naman ay nagre-relax sa beach kung saan ilan sa mga turista ay walang suot na face mask.

Ayon sa Lian Police, itinaboy na nila ang marami pang dumarating na tao sa Matabungkay beach bagamat aminado silang hirap silang ipatupad ang health and safety protocols dahil iilan lamang sila kumpara sa mga turistang nagtungo sa kilalang beach spot.

Ipinabatid ng LGBT Org. na karamihan sa mga dumagsa sa nasabing beach ay mula sa NCR plus.

Pumapalo sa 8.7% ang unemployment rate o mga Pilipinong walang trabaho para sa buwan ng Abril.

Katumbas ito ayon kay PSA Undersecretary Dennis Mapa ng 4.14 milyong Pinoy o may edad 15 pataas.

Ipinabatid ni Mapa na ang National Capital Region (NCR) ang nakapagtala ng pinakamataas na porsyento ng mga walang trabaho na nasa 14.4%, ikalawa ang region 2 o Cagayan valley, sumunod ang  Region 3 – Central Luzon, Region 4a -CALABARZON at region 7 o Central Visayas habang ang Zamboanga peninsula naman ang nakapagtala ng pinakamababang unemployment rate sa 3.3%.

Sinabi ni mapa na ang unemployment rate sa buwan ng Abril ay mas mababa pa rin ang nasabing bilang kung ihahambing nuong unang ipinatupad ang lockdown, marso ng taong 2020 na nasa 17. 6%.

Samantala, nananatili sa 91. 3% ang employment rate o nasa 43. 27 milyon nitong Abril 2021 na kapareho rin nang naitala noong Enero kumpara sa 82. 4% noong Abril 2020.

Nasa 17.2% o tinatayang 7.45 milyon ang mga underemployed nitong Abril.

Pinayuhan ng OCTA research group ang gobyerno na ibilang sa priority na mabakunahan ang COVID- 19 high risk areas at hotspots.

Ito ayon kay Professor Guido David ay bagamat nauna na rin nilang isinulong na i-prioritize ang NCR plus na siyang sentro ng COVID -19 cases.

Ipinabatid ni David na nagpasya ang gobyerno na i-prioritize ang pagbabakuna sa NCR plus kasama ang Pampanga, Metro Cebu at Metro Davao.

Una nang tinukoy ng OCTA research ang ilang areas of concern sa pagsirit ng kaso ng COVID-19 na kinabibilangan ng Cagayan De Oro, General Santos, Koronadal, Cotabato, Davao, Bacolod, Iloilo, Dumaguete at Tuguegarao.

Naabot na ang itinakdang quota o 5,000 nurses na pinapayagang makalabas ng bansa.

Iginiit ito ni POEA Administrator Bernard Olalia kaya’t kailangan na nilang itigil ang pagpapadala ng mga nurse sa ibang bansa.

Nilinaw pa ni Olalia na ang mga healthcare workers na nabigyan ng overseas employment certificates ay papayagan  pa ring ma i-deploy sa ibang bansa.

Una nang nagpasya ang gobyerno na limitahan lamang sa limang linggo ang mga nurse na maaaring makapag-trabaho sa ibang bansa dahil sa COVID-19.

Mahigit 200 Badjao na ang nakauwi na sa Zamboanga City.

Ipinabatid ito sa DWIZ ni DSWD NCR Director Irene Dumlao na nagsabing pinagkalooban din nila ng financial assistance ang mga ito.

Ayon pa kay Dumlao, may naiwan pang 71 badjao na nasa bagong pag-asa center subalit nakipag-ugnayan na sila sa mga kinauukulang ahensya at local government units para makauwi na rin.

Nasa 231 na Badjao po ang binigyan natin ng financial assistance at sinagot po din ang kanilang ticket pabalik ng Zamboanga. Meron pong 71 na natira dito po sa balik-probinsya sa Bagong Pagasa center, kung saan meron diyan na  27 ay sa pamilya ng apat na nagpositibo sa COVID-19 at ang  44 naman po ay inendorso natin  sa NCIC (National Crime Information Center) dahil base sa profiling conducted by DSWD atin pong napag-alaman na sila po ay…in Pampanga,  in Laguna, Cabanatuan and Metro Manila ”, pahayag ni NCR Director Irene Dumlao.

Halos 100 indibidwal ang nakinabang sa barber community pantry na inorganisa sa Barangay Kamuning sa Quezon City.

Kabilang sa mga organizer ng naturang community pantry ay mga tindero, mananahi at tricycle drivers.

Kuwento ni Ola, isa sa mga organizer nag-ambagan sila ng kanyang mga kasamahan at kumuha sila ng pitong magagaling na barbero o hair stylist para sa nasabing pantry kung saan u-ubrang pumila ang lahat ng may edad 18 pataas.

May dagdag freebies pa tulad ng shampoo at suklay kapag nakapagpagupit na.

Tiniyak naman ng organizers ang mahigpit na pagpapatupad ng physical distancing at mahigpit na nabantayan ang pantry dahil ipinuwesto ito malapit sa Barangay hall ng kamuning kung saan may nakatambay na mga Barangay tanod.

Sa linggong ito ay inaasahan naman ang plantito plantita community pantry sa Barangay hall ng Kamuning na pangangasiwaan din ng parehong organizers.

Mahigit 400 o 403 call center agents ng isang BPO sa Davao City ang nagpositibo sa COVID -19.

Kasunod na rin ito nang isinagawang surveillance testing sa mahigit isanlibong empleyado ng nasabing BPO company.

Kaugnay nito, sinabihan ni Davao City Mayor Sarah Duterte ang mga pribadong kumpanya na magkasa na ng mga hakbangin para hindi kumalat ang virus sa kanilang mga tanggapan at kung lalabag ang mga ito ay maaari silang maharap sa kaso.

Sa ngayon ay naka lockdown pa ang nasabing kumpanya na pansamantala ring ipinatigil ang operasyon.

Niyanig ng Magnitude 5.5 na lindol ang Burgos, Surigao Del Norte  pasado alas-5 ng madaling araw.

Ayon sa Phivolcs ang naturang lindol ay tectonic in origin at may lalim na labing anim na kilometro.

Naitala ang intensity 4 na pagyanig sa Dapa, Surigao De Norte.

Inaasahan ang mga aftershocks mula sa nasabing lindol subalit walang danyos sa imprastruktura.