Judith Estrada-Larino

Nahaharap sa mga kasong attempted murder at kidnapping ang isa sa mga suspek na nasa likod nang pagkawala ng ilang sabungero.

Ayon sa complainant, ang suspek na si Julie Patidongan o Dondon ay nagbaril sa sarili at binaril din ang ama niya sa magkahiwalay na insidente dahil sa problema sa lupa.

Sinabi ng dumagat family ng Tanay, Rizal na isinampa nila ang reklamo sa Binangonan nuong 2019 subalit wala pa silang update hinggil dito.

Inihayag pa ng complainant na nag trabaho siya kay Patidongan subalit umalis siya nang tangkain nitong agawin ang lupain ng kanilang pamilya.

Una nang inilabas ng Criminal Investigation and Detection Group (CIDG) ang composite sketch ng dalawang suspek kabilang na si Patidongan kaugnay sa pagkawala ng isang sabungero sa Laguna.

Patuloy ang pagsirit ng presyo ng sibuyas ngayong linggo.

Nabatid na mula sa 230 pesos nuong nakalipas na linggo sumipa na sa 250 hanggang 270 pesos ang kada kilo ng sibuyas sa kasalukuyan.

Ayon sa ilang vendors, marami pa rin ang bumibili ng sibuyas na dinarayo pa sa Divisoria ng mga nagtitinda nito mula sa Las Piñas City.

Kasabay nito, ipinabatid ng mga tindero ng sibuyas sa Divisoria na posibleng sa buwan ng Pebrero ng susunod na taon na muli magkakaruon ng panibagong stock ng lokal na sibuyas mula sa kanilang supplier subalit aabot naman ng January 2023 ang kanilang panindang sibuyas.

Uubra nang ireklamo online ang mga pasaway na traffic enforcers ng Metropolitan Manila Development Authority (MMDA).

Ayon ito kay MMDA Chairman Atty. Romando Artes matapos nilang ilunsad ang online complaint form para sa mga driver na nais ireklamo ang mga tiwaling tauhan ng ahensya.

Sinabi ni Artes na ipinag-utos na niyang sa loob lamang ng 72 oras ay kailangang maresolba ng kanilang traffic adjudication division ang isang reklamo matapos matanggap ang mismong reklamo na mayruong pangalan at ticket number.

Maaari aniyang maghain ng reklamo sa http://bit.ly/3j62yhh.

Posibleng may sindikato sa loob mismo ng Philippine National Police (PNP) at maging ng Philippine Drug Enforcement Agency (PDEA) na dawit sa sinasabing recycling ng illegal drugs.

Ayon ito kay PNP Spokesperson Col. Jean fajardo kaya’t ikinakasa nila ang malalimang imbestigasyon matapos maaresto si PDEA Southern District Office Chief Enrique Lucero at dalawang agents sa isinagawang raid sa Taguig City.

Mahigpit aniya silang makikipag ugnayan kay PDEA Director General Moro Virgilio Lazo.

Sinabi ni Fajardo na tututukan sa imbestigasyon ang posibilidad na hindi lamang sa level ni Lucero ang sangkot sa pagre-recycle ng droga.

Binalaan ni Infectious Disease Expert Dr. Rontgene Solante ang mga magulang at mga bata kaugnay sa kaso ng Hand Foot and Mouth Disease (HFMD).

Kasunod na rin ito nang paglobo ng kaso ng HFMD sa Metro Manila.

Ayon kay Solante, dapat tiyakin ng mga magulang na regular na naghuhugas ng kamay ang kanilang mga anak bilang preventive measure dahil wala aniyang gamot sa HFMD na maituturing na viral infection.

Kabilang sa mga sintomas ng HFMD, ayon sa World Health Organization (WHO) ay lagnat, sugat sa bibig at blisters sa kamay, paa at sa puwet samantalang mas matinding sintomas nito ay meningitis, encephalitis at polio like paralysis.