Judith Estrada-Larino

Timbog ang district director ng PDEA at ilang ahente nito sa ikinasang buy-bust sa mismong headquarters ng ahensya sa Taguig City.

Nasabat ng NCRPO sa lugar ang maliliit na pakete at isang malaking package na hinihinalang shabu na nagkakahalaga ng P9-M,  gayundin ang apat na baril, P1,000 at isang timbangan.

Ayon kay PDEA Director General Moro Virgilio Lazo, nalulungkot siya sa nangyari lalo’t mga aktibong nagta-trabaho ang mga nahuling PDEA agents.

Patuloy na iniimbestigahan ang mga naarestong PDEA agents na hawak ngayon ng NCRPO.

Binuhay muli ng LTFRB ang Oplan Isnabero laban sa taxi drivers na namimili ng mga pasahero.

Ito ayon sa LTFRB ay dahil sa inaasahang pagdami ng mga pasahero ngayong Kapaskuhan kung kailan hindi rin maiiwasan ang mga mapagsamantalang taxi driver na namimili ng pasahero.

Dahil dito, hinimok ng LTFRB ang publiko na kaagad isumbong sa kanila ang mga pasaway na taxi drivers.

Mayruon na rin anito silang inilagay na hotlines at QR codes sa mga pampublikong lugar at sasakyan para pagsumbungan ng mga pasahero.

Inilarga na ang Porky Porky Festival sa Iloilo bilang pagbawi sa African Swine Fever (ASF).

Ipinarada sa paligid ng town plaza ang 36 na lechon mula sa 18 barangay ng Bayan ng Leganes na nagsilbing hudyat na rin nang pag switch on ng mga christmas lights sa plaza.

Ayon kay Municipal Administrator David Sinay, binuksan nila sa lahat ang pagbili ng lechon sa halagang P125 kada kilo kada customer para ipakitang ligtas ang kanilang mga alagang baboy.

Ang Porky Porky Festival aniya ay bahagi ng recovery measure ng munisipyo laban sa ASF na naitala sa pitong barangay nito.

Sinabi ni Sinay na ang kikitain sa festival ay mapupunta sa mga apektadong hog raisers sa munisipyo.

Ang 36 na baboy na may timbang na 35 kilos kada isa ay nabili ng municipal government sa halagang P115 kada kilo live weight gamit ang pondong nagmumula sa Iloilo Provincial Government.

Kailangan ng dagdag na kita ng isang pamilya bukod pa sa pagtatrabaho ng ama at ina rito.

Sinabi ito sa DWIZ ni Lolito Tacardon, OIC Executive Director ng Commission on Population (POPCOM), matapos nitong i-report na kulang na kulang ang budget ngayon ng isang pamilya na hindi lamang ang araw-araw na panggastos ang kailangan.

Binigyang diin ni Tacardon na ang minimum wage sa bansa ay hindi naman talaga makakasagot sa pangangailangan ng isang pamilya lalo na kung maraming anak.

Extortion ang isa sa mga tinututukang anggulo ng mga otoridad sa pag iwan ng bag sa gilid ng ATM ng isang bangko sa Binondo, Maynila.

Kaagad rumesponde ang mga tauhan ng MPD Explosive Ordnance Disposal Unit sa iniwang bag ng suspek na naka facemask, puting t-shirt, itim na sumbrero at maong pants.

Ginamitan ng mga otoridad ng water disruptor ang nasabing bag kung saan nakumpirmang walang bomba o kahit anong pampasabog na lamang ito.

Sinabi ni MPD Spokesperson Police Major Philipp Ines na pinagmukha lamang na may lamang bomba ang bag dahil sa kable ng kuryente at card board na nasa loob nito.

Kasabay nito, pinayuhan ng MPD ang mga establishment na higpitan pa ang kanilang seguridad para maiwasan na ang pag iiwan ng mga nakakahinalang bag at iba pang insidente.