Judith Estrada-Larino

Iginiit ni Vice President Sara Duterte ang pangangailangang epektibong makontrol ang pagbaha at mapangasiwaan ang sitwasyon tuwing may kalamidad.
Kasunod na rin ito nang pagpapaabot ni Duterte ng simpatiya matapos daan-daang pamilya sa Bulacan partikular sa Norzagaray ang nag-evacuate nitong weekend nang magbaha sa pagpapalabas ng tubig ng Ipo at Angat dams.
Binigyang-diin ni Duterte na maaalis naman ang takot ng mga tao at maiiwasan ang trahedya kung makakapaghanda ng maaga at masusunod ang direktiba ng awtoridad sa panahon ng krisis.
Sinabi ni Duterte na kailangang maisulong ang epektibong flood control infrastructures at disaster management response para alam ng mga komunidad ang gagawin tuwing may emergency.
Naka-depende aniya ang resiliency ng mga komunidad ang pagpapalakas ng kasalukuyang risk reduction mechanisms, disaster preparedness strategies at emergency interventions.

Kapakanan ng mga magsasaka.

Ito ayon kay Chief Presidential Legal Counsel Juan Ponce Enrile ang dapat gawing priority sa halip na ikasa ang importasyon ng sibuyas sa gitna ng mataas na presyo nito.

Sinabi ni Enrile na kailangang ayusin ng Department of Agriculture ang mga hakbangin nito para hindi kapusin ang supply ng sibuyas na nagpapataas ng presyo nito.

Wala aniya siyang nakikitang pangangailangang umangkat ng sibuyas dahil malaki ang produksyon nito sa Nueva Ecija at problema rito ay hindi natututukang magsasaka na nawawalan na nang ganang magtanim.

Iginiit ni House Transportation Committee chair Romeo Acop na wala silang sasantuhin sa itinakdang pagdinig ng Kamara bukas, January 10, sa nangyaring technical glitch sa NAIA nuong January 1.

Tiniyak ni Acop na irerekomenda nilang kasuhan ang mga responsable sa aberya kapag may makikitang negligence sa nasabing pagdinig.

Kasabay nito, isinusulong ni house minority leader Marcelino Libanan ang pagkuha sa serbisyo ng cybercrime expert ng NBI kaugnay sa nangyaring aberya sa NAIA.

Sinabi ni Libanan na dapat makalkal ang lahat ng anggulo sa nasabing insidente kabilang ang pagbasura sa posibleng cyber attacks, sabotahe o iba pang malisyosong aktibidad.

Una nang inihayag ng CAAP na pumalya ang communications, Navigation and Surveillance Systems for Air Traffic Management ng NAIA matapos masiraan ang interruptible power supply equipment nito.