Judith Estrada-Larino

Kailangang i-report sa taumbayan ni Finance Secretary Carlos Dominguez, III kung magkano na ang kinita ng gobyerno sa excise tax sa produktong petrolyo.

Mungkahi ito ni Senador Risa Hontiveros sa harap ng panawagan na isuspinde muna ang ipinapataw na excise tax sa langis sa harap ng serye ng oil price hike.

Sinabi ni Hontiveros na sana ay gamitin ang  nakolektang excise tax sa langis sa service contracting bilang tulong sa mga pasahero, driver at operator ng public transportation para hindi na madagdagan ang hirap ng mga Pilipino.

Samantala, inihayag ni Senador Joel Villanueva na tinitingnan  nila ang posibilidad na isupinde muna ang pinapataw na excise tax sa produktong petrolyo para maibsan ang dagdag pasanin na idudulot ng serye ng oil price hike sa mga commuter at mga manggagawa. —sa ulat ni Cely Ortega Bueno (Patrol 19)

Service contracting sana ang sagot para kahit magmahal ang diesel at gasolina ay magiging abot kaya pa rin ang pamasahe dahil sa gobyerno ang sasalo nito.

Ayon ito kay Senador Risa Hontiveros sa gitna na rin nang hirit ng ilang transport group na P3 dagdag sa pasahe sa jeep dahil sa sunud-sunod na pagtaas ng presyo ng langis sa bansa.

Sinabi ni Hontiveros na mayruon pang P3-B budget ang gobyerno para sa service contracting at libreng sakay.

Dapat anyang dagdagan pa ng DOTr at malakaniyang ang budget sa service contracting gamit ang pondong nakatengga lang.

Ang service contracting ay ipinatupad ngayong may pandemya bilang tulong sa mga pasahero at mga driver sa pampublikong  transportasyon. —sa ulat ni Cely Ortega Bueno (Patrol 19)

Tiwala sina Senate President Vicente Tito Sotto, III, Senate Minority Leader Franklin Drilon at Blue Ribbon Committee Chair Richard Gordon na papabor sa Senado ang magiging pasya ng Korte Suprema sa isinumiteng petisyon ni Pharmally Pharmaceutical Corporation Director Linconn Ong.

Ayon kay Sotto, marami nang naging desisyon at jurisprudence kung saan pinaboran ng high tribunal ang Senado sa pagkulong sa mga resource person na ayaw makipag tulungan sa imbestigasyon ng Senado.

Sinabi naman ni Drilon na kumpiyansa siyang “legally correct” ang pagkulong ng Senado kay Ong matapos tukuyin ang desisyon ng Supreme Court  sa Arnault vs Nazareno Case noong 1950 kung saan   malinaw na legal ang patuloy na pag detain ng Senado kay Ong dahil sa pagiging evasive at pagtangging sagutin ang ilang mahahalagang tanong ng mga Senador.

Inihayag nina Sotto at Drilon na ang Senate Legal Counsel ang sasagot sa petisyon ni Ong sa Korte Suprema na kumukwestyon sa patuloy nyang detention sa Senado subalit wala namang patakaran na nagbabawal sa Senate President para i authorize ang Blue Ribbon na humawak at sumagot sa petisyon ni Ong. —sa ulat ni Cely Ortega Bueno (Patrol 19)

Suportado ng OCTA Research Group ang panukalang ibaba ang alert level sa NCR.

Sinabi ni Dr. Guido David, Fellow ng OCTA Research na posible nang ibaba sa alert level 3 ang sitwasyon sa Metro Manila sa unang linggo pa lamanbg ng Oktubre.

U ubra pa nga aniyang maging alert level 2 ang alert level sa NCR ..base na rin sa metrics ng OCTA Research.

Una nang inihayag ni MMDA Chairman Benhur Abalos na pabor siyang ibaba ang alert level 4 sa NCR.

Itinalaga na ang bagong general manager ng MMDA.

Pinalitan ni Atty. Romando “Don” Artes bilang MMDA GM si Jojo Garcia na nag resign para tumakbo sa pagka kongresista sa 2022 National Elections.

Si Artes ay nagsilbing Assistant GM for Finance and Administration ng MMDA.

Kinansela ng COMELEC ang Certificates of Candidacy (COC) ng independent candidate na si Arlene Josephine Butay.

Ito ayon kay COMELEC Spokesperson James Jimenez ay dahil dalawa ang COC na isinumite ni Butay – isa sa pagka bise presidente at isa sa pagka senador.

Nakasaad sa COMELEC regulations na ang kandidatong maghahain ng COC para sa dalawa o mas marami pang posisyon ay hindi magiging eligibile sa mga tatakbuhan nito.

Pinatitigil ng National Telecommunications Commission (NTC) ang e-commerce platforms na Lazada, Shopee at Facebook Marketplace ang pagbebenta ng SMS blasting devices.

Kasunod na rin ito ng emergency alert na ipinadala habang naghahain ng kanyang certificate of candidacy sa pagka-presidente si dating senador Ferdinand Bongbong Marcos.

Ayon sa NTC, ang pagbebenta ng text o SMS blaster machines at kaparehong equipment ay paglabag sa radio control law at iba pang regulasyon tulad ng memorandum order ng ahensya o prohibition of portable cellular mobile repeater and portable cell site equipment.

Sinabi ng NTC na kailangang magpaliwanag ng e-commerce platforms sa susunod na labing limang araw kung bakit hindi dapat mapanagot sa mga paglabag at hindi dapat kumpiskahin ang mga “violative” products.

Bibigyan ng ayuda ng Department of Trade and Industry (DTI) ang mga kumpanya para lamang maibigay ang 13th month pay sa kanilang mga empleyado.

Ipinabatid ni DTI Secretary Ramon Lopez na plano nilang gumawa ng lending facility sa pamamagitan ng Small Business Corporation (SB CORP) kung saan makakautang ang mga negosyanteng labis na naapektuhan ng COVID-19 pandemic ang kanilang negosyo.

Ang naturang hakbang ayon kay Lopez ay tulad din nang ginawa nila nuong isang taon na bilang pagsuporta sa micro, small and medium enterprises para maibigay ang 13th month pay na nakasaad sa batas.

Nakikipag ugnayan na rin sila aniya sa DOLE hinggil sa nasabing usapin.

Ang pag endorso ng opposition coalition 1Sambayan ang nagpabago sa isip ni Vice President Leni Robredo para tumakbo  bilang presidente sa 2022 national elections.

Inamin ito ni Robredo dahil ang talagang plano niya ay magpahinga o kumandidato sa local elections kaya’t puspusan niyang isinulong ang unification at tutulong na lamang aniya siya sa national candidates.

Ayon pa kay Robredo ..nang mabigo ang unification talks ..nag isip siya kung sino ang susuportahan sa pagka-pangulo na mayruong kaparehong paniniwala niya.

Subalit dumating aniya ang endorsement ng 1Sambayan na kanyang tinanggap kahit alam niyang salat sila sa resources para manalo.

Nagpapasalamat si Robredo sa nakuhang suporta matapos ang deklarasyong pagpalaot sa 2022 presidential elections ..kabilang ang volunteers na gagastos ng sariling pera nila para sa kanyang kampanya, mga nagpopost sa social media at maging mga artista at personalidad na sumusuporta sa kanya.