Binalaan ng COMELEC ang mga kandidato sa pagtanggap ng campaign funds mula sa ibang bansa.
Ipinaalala ni COMELEC Commissioner Rowena Guanzon ang mahigpit na pagbabawal sa mga kontribusyon mula sa mga dayuhan at foreign corporations at kung susuway ay maaari nilang i-disqualify ang isang kandidato.
Sa gitna na rin ito nang inilunsad na crowd funding page para kay Vice President Leni Robredo.
Tanging point to point travel ang uubra para sa mga menor de edad sa ilalim ng alert level 3 sa Metro Manila mula Oktubre 16 hanggang 31.
Nilinaw ito ni DILG Spokesman Undersecretary Jonathan Malaya na nagsabi ring bawal pa rin ang mga bata sa mga pampublikong lugar lalo’t sarado pa rin sa ilalim ng alert level 3 ang mga playground at park.
Sinabi ni Malaya na maaari lamang lumabas ang mga bata kahit mga senior citizens kung essential services.
Sa ilalim lamang ng alert level 2 sa kaniyang pagkakaalam , pupuwedeng makalabas talaga ang mga bata sa gitna ng COVID-19 pandemic.
Inalis na ng gobyerno ang mandatory quarantine sa mga pasilidad para sa fully vaccinated na papasok sa bansa.
Ito ayon kay Presidential Spokesman Harry Roque ay kung magne-negatibo sa RT PCR test, 72 oras o tatlong araw bago umalis sa bansang panggagalingan nila.
Sa halip, sinabi ni Roque na ang mga traveler na ito ay o obligahing sumailalim na lamang sa home quarantine sa loob ng 14 na oras.
Bubuksan muli ng CBCP ang undas online para sa mga hindi makakabisita sa sementeryo sa kanilang mga namayapang mahal sa buhay.
Ito ay matapos ipasara ng Metro Manila Mayors ang public at private cemeteries, memorial parks at columbaria mula Oktubre 29 hanggang Nobyembre 2 para maiwasan ang superspreader events sa paggunita sa araw ng mga patay.
Ayon kay Fr. Jerome Secillano, CBCP Secretary of the Permanent Committee on Public Affairs, magbibigay sila ng liturgy para maipagdasal ang mga namatay nang kaanak kahit nasa bahay na rin.
Pinaaalis na ni Congressman Ronnie Ong sa IATF ang quarantine at RT-PCR requirement sa tourist destinations para sa mga fully vaccinated basta’t mayruon lamang pre-booked accommodation at pre arranged itinerary.
Bukod dito, binigyang diin ni Ong na ang lahat ng hotel staff, guides, drivers at iba ang tourism personnel ay dapat na fully vaccinated na rin.
Sinabi ni Ong na ang mga lugar na bubuksan para sa turismo ay dapat sa mga lugar lamang na mayruong alert levels na katumbas ng sa Moderate General Community Quarantine at General Community Quarantne.
Naniniwala si Ong na handa na ang ilang lugar sa bansa para buksan ang turismo sa fully vaccinated local at international travelers.
Sumirit pa sa mahigit 2.6-M ang kabuuang kumpirmadong kaso ng COVID-19 kasama na ang 7,181 na mga bagong kaso ng virus.
Dahil dito, ipinabatid ng DOH na nasa 82,411 ang active cases kung saan 75.3% ang mild, 12.1% ang asymptomatic, 3.7% ang severe at 1.6% ang critical condition.
Sumampa na sa mahigit 2.5-M ang total recoveries matapos bagong gumaling ang nasa 6,889 patients.
Samantala, lumampas na sa 40,000 o nasa 40,069 ang death toll kabilang ang 173 na mga bagong nasawi sa COVID-19.
Isasailalim na sa alert level 3 ang Metro Manila simula sa Oktubre 16 hanggang 31.
Kasunod na rin ito nang pag apruba ng IATF sa rekomendasyong ibaba sa alert level 3 mula sa alert level 4 ang NCR matapos mabawasan ang kaso ng COVID-19.
Sa ilalim ng alert level 3, papayagan nang mag operate sa 30% capacity ang ilang establishment bukod sa mga restaurant at personal care services anuman ang vaccination status ng customer.
Kabilang dito ang museums, libraries, internet cafes, billiard halls, amusement arcades, casinos, cockfighting, lottery, gyms, spa at leisure centers.
Inaprubahan din ng IATF ang paglalagay sa ilalim ng MECQ ang Apayao, Kalinga, Batanes, Bulacan, Bataan, Cavite, Rizal, Laguna, Naga City, Zamboanga City at Zamboanga Del Norte.
Kabilang sa mga nasa ilalim naman ng GCQ with heightened restrictions ang Abra, Baguio City, Ilocos Sur, Pangasinan, Cagayan, Isabela, City of Santiago, Nueva Vizcaya, Quirino, Quezon, Batangas, Bacolod City, Capiz, Lapu Lapu City, Negros Oriental, Bohol, Zamboanga Del Sur, Misamis Oriental, Cagayan De Oro City, Davao Del Norte, Davao Occidental, Davao De Oro, Butuan City at Surigao Del Sur.
Bukod pa ito sa Ilocos Norte, Dagupan City, Ifugao, Benguet, Tarlac, Lucena City, Occidental Mindoro, Oriental Mindoro, Puerto Princesa, Marinduque, Albay, Camarines Norte, Aklan, Antique, Guimaras, Negros Occidental, Iloilo City, Iloilo Province, Cebu City, Cebu Province, Mandaue City, Siquijor, Tacloban City.
Isang kongresista ang pumalit sa puwesto kay DPWH Mark Villar.
Nanumpa na kay Executive Secretary Salvador Medialdea si Congressman Roger Mercado bilang pinuno ng DPWH.
Sa 18th congress, nasa 66 na batas ang iniakda ni Mercado na nagsilbing Vice Chair ng House Committee on Public Works and Highways.
Bago ang 18th congress, si Mercado ay naging bahagi rin ng 8th to 10th congress, 14th, 15th at 17th Congress.
Nagbitiw na sa tungkulin ang Chief of Staff ni Manila Mayor Isko Moreno na si Cesar Chavez.
Ayon kay Chavez, inalok siyang magbalik sa isang radio station bilang brodkaster na una niyang trabaho.
Masaya aniya siyang babalik sa kanyang first love at tapos na siya sa government service na minahal din naman nya.
Kasabay nito, nagpasalamat si Chavez kay Moreno sa pagkakataong maging bahagi ng team nito sa lungsod at marami naman aniyang magagaling at matitinong tao sa city hall.
Suspendido ang operasyon ng konsulado ng bansa sa Macau Special Administrative Region (SAR) dahil sa bagyong Kompasu.
Kasunod na rin ito ng anunsyo ng gobyerno ng Macau hinggil sa typhoon signal number 8 ng bagyong Kompasu dahilan sa pag iral din ng blue storm surge warning sa rehiyon.
Pinaalalahanan ng konsulado ang mga Pinoy sa Macau na manatiling naka monitor sa lagay ng panahon sa smg Official Webpage at ihanda ang fully charged celfon at go bag na naglalaman ng damit, pagkain, mga gamot, tubig at iba pang essentials.
Para sa emergency situations, maaaring tumawag sa Macau emergency hotline 999 o sa hotline ng konsulado na +853 6698 1900.