Judith Estrada-Larino

Kasado na bukas ang pagsisimula ng pagbabakuna sa general population kabilang ang mga nasa edad 12 hanggang 17 sa NCR.

Ayon ito kay Paranaque City Mayor Edwin Olivarez matapos mabakunahan na ang 70% ng populasyon sa Metro Manila.

Sinabi ni Olivarez, pinuno ng Metro Manila Council (MMC) na sisimulan na bukas sa mga malalaking ospital ang 30% ng Metro Manila population kasama na ang mga menor de edad.

Matapos ang isang linggo ay magpapatuloy naman aniya ang bakunahan  sa mga kabataan sa ibang LGU hospitals.

Imomonitor ng DOH ang mga sinehan na bubuksan na simula sa sabado sa pagsailalim sa alert level 3 ng Metro Manila hanggang Oktubre 31.

Sinabi ni Health Secretary Francisco Duque, III na dapat masunod pa rin ang minimum health public standards at matiyak na nasa limited capacity na 30% lamang mag ooperate ang mga sinehan sa NCR.

Inamin ni Duque na malaking hamon sa kanila ang pag balanse sa kalusugan at hanapbuhay.

Hindi tayo pwedeng maging alipin ng takot.

Tugon ito ni Senador Imee Marcos sa tanong kung ligtas na ba na isailalim sa alert level 3 ang Metro Manila kung saan mas marami ng negosyo ang papayagang magbukas at mas luluwagan na ang mga restrictions.

Sinabi ni Marcos na ang mga lockdown ay hindi para sa mahihirap kundi para sa mga taong walang problema sa maihahaing pagkain at pambayad sa matrikula sa kanilang lamesa kayat kailangan na talaga anya ng mas nakararami na makapagtrabaho para may pambayad kay “Judith”.

Marami aniya sa mga Pilipino ang gutom na, nababaon sa utang  at maaaring mamatay na lamang na wala na ngang pera ay wala pang dignidad.

Tinukoy ni marcos ang datos ng DOH at OCTA kung saan bumababa na ang reproduction rate ng virus sa NCR at ibang probinsya subalit dapat anyang maayos ang pag calibrate sa pagbubukas ng mga restaurants, cinemas, malls, at iba pang mga negosyo, gaya ng ginagawa sa iba’t-ibang bansa. —sa ulat ni Cely Ortega Bueno (Patrol 19)

Nasa moderate risk na ang lahat ng 17 lungsod sa Metro Manila.

Ayon ito sa OCTA Research Group habang bumaba pa sa .60 ang reproduction number ng COVID-19.

Samantala, iniulat ng OCTA Research na bumagsak sa 1,847 o 30% na mas mababa nuong nakalipas na linggo, ang pitong araw na average ng mga bagong kaso ng COVID-19.

Sinabi ng OCTA Research na ang positivity rate ay naitala sa 11% habang bumaba naman sa 79% ang healthcare utilization rate at nasa 13.05 kada 100,000 ang average daily attack rate.

Inaasahang darating sa bansa sa susunod na linggo ang 1-M doses ng COVID-19 vaccines mula sa Sinovac.

Ipinabatid ito ni Chinese Ambassador to the Philippines Huang Xilian matapos magpasya ang Chinese Government na mag donate muli ng Sinovac vaccines sa Pilipinas.

Tiwala aniya ang Chinese Government na makakatulong ang dagdag na supply ng Sinovac vaccines para sa tuluy-tuloy na bakunahan sa bansa.

Itinanggi ng National Democratic Front of the Philippines (NDFP) na komunista si Manila Mayor Isko Moreno.

Ayon kay NDFP Chief Political Consultant Jose Maria Sison, dapat igalang ang pagtanggi ni Moreno na isa siyang komunista dahil hindi ito kuwalipikadong maging miyembro ng kanilang grupo.

Sinabi ni Joma na dapat tingnan si Moreno bilang High Bureaucrat Capitalist na patuloy na nagsusulong ng Anti National at Anti Democratic Ruling System.

Bukod dito, inihayag ni Joma ang pagsisilbi ni Moreno sa interest ng foreign monopolists at landlords maliban na lamang kung matatuhan ito.

Binigyang diin ni Joma na ang litrato nilang magkasama ni Moreno ay hindi nangangahulugang komunista ang Alkalde.

Dapat na may sapat na pondo ang lahat ng ka-transaksyon ng gobyerno sa mga negotiated procurement na ginagawa kapag may kalamidad, emergency at kapag pumalya ang mga bidding.

Binigyang diin ito ni Senador Francis Tolentino sa paghahain ng Senate Bill Number 2433 kung saan nakapaloob na magiging mandatory ang pagsusumite ng mga dokumentong magpapatunay sa financial capacity ng lahat ng supplier, contractor at consultants sa negotiated procurement at o obligahin ang procuring entity o ahensya ng gobyerno na bibili ng produkto o serbisyo na mag siyasat sa financial, technical at legal capacity ng supplier, contractor o consultants.

Ayon kay Tolentino, aamyendahan nito ang Government Procurement Act o Republic Act 9184 na nagsasaad na dapat ay financially capable o may sapat na pera ang kontratista para masigurong darating o maisusuplay ang binibiling produkto at serbisyo.

Isinulong ni Tolentino ang panukala matapos matuklasan sa pagdinig ng Senado na walang financial capacity ang Pharmally Pharmaceutical Corporation na may paid up capital na P625,000 lamang pero nakakuha ng mahigit P10-B na halaga ng kontrata. —sa ulat ni Cely Ortega Bueno (Patrol 19)

Suportado “in principle” ni Health Secretary Francisco Duque, III ang panawagan ng mga kapwa nya medical professional na huwag pigilan ng Malacanang ang imbestigasyon ng senado sa nakikitang iregularidad sa pagbili ng gobyerno ng pandemic supplies sa  Pharmally Pharmaceutical Corporation.

Tugon ito ni Duque sa tanong ni Senate Minority Leader Franklin Drilon sa pagdinig sa panukalang budget ng DOH hinggil sa panawagan ng mga kapwa nya duktor na hayaang maipagpatuloy ng Senate Blue Ribbon Committee ang imbestigasyon sa mga transaksyon ng procurement service ng DBM sa Pharmally.

Gayunman sinabi ni Duque na dapat na patuloy na tutukan ng mga kapwa nya duktor ang kinakaharap na public health emergency ng bansa dulot ng COVID-19 pandemic

Sinabi ni Drilon na bukas naman ang Senado na magpatupad ng reasonable adjustment sa ginagawang imbestigasyon dahil ayaw naman nilang palitawin na pinaparalisa nila ang paglaban ng gobyerno sa pandemya.

Ikinatuwa ito ni Duque at iminungkahi na tingnan ang posibilidad na huwag dalasan ang pagpapatawag sa kanila sa hearing para patuloy nilang matutukan ang kanilang trabaho na winelcome naman ni Drilon. —sa ulat ni Cely Ortega Bueno (Patrol 19)

Nagbibiro lang ang Pangulong Rodrigo Duterte sa pahayag nitong tuturukan ng COVID-19 vaccine habang natutulog ang mga ayaw magpabakuna.

Ayon ito kay Presidential Spokesman Harry Roque dahil gusto ng Pangulo na mapatawa ang sarili nito habang nagsasagawa ng talk to the people.

Tinatayang 23 milyon Pinoy ang fully vaccinated na kontra COVID-19.

Tinawag na premature ng Malakaniyang ang mga pahayag na inaabuso ang probisyon ng substitution sa Omnibus Election Code.

Ito ayon kay Presidential Spokesman Harry Roque ay dahil wala pa namang napalitan o nagpa-substitute sa mga kandidatong naghain ng COC para sa 2022 national elections.

Una nang inihayag ng ilang mambabatas na naaabuso ang substitution provision sa konstitusyon kaya’t kailangan na itong repasuhin.