Judith Estrada-Larino

Palalawigin pa ng gobyerno ang pagbebenta ng P20 kada kilo ng bigas sa ilan pang lugar sa Visayas region.

Ipinabatid ng Food Terminal Incorporated (FTI) na bukod sa cebu, inihahanda na rin na National Food Authority ang rice stocks para sa Siquijor, Southern Lyete at Bohol.

Ang Cebu, ayon sa FTI ang nagsisilbing pilot area ng “Bentang Bigas, Meron Na” Program.

Samantala, mabibili naman sa 12 Kadiwa Center ang P20 kada kilo ng bigas kabilang ang Kadiwa Center ADC Building sa mismong tanggapan ng Department of Agriculture, gayundin sa Elliptical Road at Pasay City Public Market.

Hindi pa maituturing na suspek ang pitong pulis na idinadawit sa pag-ambush kay Albuera Mayoral Candidate Rolando Kerwin Espinosa, Jr. kundi persons of interest pa lamang, ito ay sa gitna ng patuloy na imbestigasyon sa nasabing insidente.

Iginiit ito ni Leyte Provincial Police Director Police Colonel Dionisio Apas, Jr. matapos kumpirmahin ang pagsasampa ng mga kasong illegal possession of firearms at paglabag sa election gun ban laban sa mga naturang pulis.

Ayon kay Col. Apas, 14 na armas ang nakuha sa mga naturang pulis na kinabibilangan ng isang Police Colonel, Lt. Col, Staff Sergeant, tatlong Corporal at isang Patrol Woman kung saan pito sa mga ito ay nasa administrative custody at nakatakdang sumailalim sa administrative proceedings.

Samantala sa isinagawang paraffin test ay nag negatibo ang pitong pulis subalit positibo naman sa gunpowder residue ang lahat ng 14 na baril na nakuha sa kanila.

Nilinaw naman ni Police Lt. Col. Vivien Malibago ng forensic unit na ang negatibong resulta ng paraffin test ay hindi conclusive dahil maraming factors ang maaaring maka apekto rito tulad nang pagsusuot ng gloves, haba ng baril gayundin ang kondisyon ng kapaligiran.

Ibinunyag ng Philippine National Police na sinadya at plinano simula pa noong Enero ang pagpatay sa negosyanteng si Anson Que.

Ito ayón kay PNP Spokesperson Brigadier General Jean Fajardo ay matapos kumpirmahing hawak na ng PNP-Anti Kidnapping Group ang tatlong suspek sa pagpaslang kay Que at driver nitong si Armanie Pabillo na kinilalang sina Ricardo Austria David, Raymart Catequista at David Tan Liao.

Ang mga nasabing suspek anya ay sumailalim na sa inquest proceedings sa Department of Justice at kinasuhan na ng tig dalawang count ng kidnapping for ransom with homicide.

Isa sa mga suspek na si David Tan Liao na kilala rin sa aliases na Xiaoxiang Yang, Yang Jianmin at Michael Abadyung ay natukoy na Chinese national at sumuko sa mga otoridad kasunod nang pag amin sa partisipasyon sa pagpaslang kay que at driver nito.

Ipinabatid pa ni Brig. Gen. Fajardo na nakita si Liao sa lugar o sa 345 Martha St., Barangay Langka, Meycauayan, Bulacan kung saan dinala ang mga biktima at pinatay.

Nakilala ang mga suspek sa pamamagitan ng surveillance footage, cyber monitoring at intelligence reports.

 Tuluy-tuloy ang pagdinig ng Senate Blue Ribbon Subcommittee hinggil sa war on drugs ng nakalipas na administrasyon.

Sa katunayan, ipinabatid ni Subcommmittee Chair Senate Minority Leader Koko Pimentel na magpapatawag siya ng mga pagdinig pa ngayong buwan para matututukan ng husto ang nasabing usapin.

Sinabi ni Senador Pimentel na naamiyendahan na ang rules ng Senado kaya’t dadalhin na ng subcommittee ang prerogative ng mother committee na magpa-cite in contempt.

Tiniyak ni Senador Pimentel na mahigpit na bubusisiin ang usapin ng war on drugs partikular ang sinasabing cash reward sa hanay ng pnp para sa mga mapapatay na drug suspect.

Walang inaasahang power interruption o putol ng supply ng kuryente simula ngayong araw na ito hanggang sa Sabado, January 4.

Ayon ito sa advisory ng Meralco na nagsabing ang susunod na scheduled power interruption ay sa January 5, linggo na.

Ipinabatid ng meralco na kabilang sa mga apektado ng power interruption ang NGCP-Makban substation sa  Sto. Tomas, Batangas at Batangas Paper Corporation sa Barangay San Felix sa pagitan ng alas sais ng umaga hanggang alas nueve ng gabi.

Bukod pa ito sa nakatakdang maintenance work sa FPIP o First Philippine Industrial Park sa Brgy. Sta Anastacia, Sto Tomas, Batangas sa pagitan ng alas sais ng umaga hanggang alas diyes ng gabi.

Nailipat na sa Jakarta, Indonesia si Mary Jane Veloso para masimulan na ang pag proseso nang pagpapabalik nito sa bansa.

Ipinabatid ito ni Celia Veloso, ina ni Mary Jane matapos dalhin sa isang pasilidad sa Jakarta ang Pinay mula sa Yogjakarta na siya rin aniyang dahilan kaya’t nakansela ang biyahe nilang pamilya pa Indonesia para saana bisitahin ang anak.

Sinabi ni ginang Veloso na hihintayin na lamang nila dito sa Pilipinas ang kanyang anak.

Natutuwa at excited aniya ang buong pamilya sa pag uwi ni Mary Jane na halos 14 na taong nakulong sa Indonesia.

Lilipad sana pa Indonesia kahapon ang pamilya Veloso, kanilang abogado at ilang opisyal ng gobyerno para bisitahin ang Pinay bago ang kanyang pag-uwi ng Pilipinas.

Naging killing field ng drug suspects at mga inosenteng sibilyan ang Pilipinas sa loob ng anim na taon o sa Duterte administration.

Ito ang tila ipinamukha ni Congressman Bienvenido Abante, miyembro ng Quad Committee sa dating pangulong rodrigo duterte sa pagharap nito sa unahang pagkakataon sa pagdinig hinggil sa war on drugs ng kanyang administrasyon.

Ayon kay Congressman Abante, Chairman ng House Committee on Human Rights, tinalo pa ng bansa ang Mexico at Colombia kung saan walang 10,000 ang nasawi sa kampanya ng mga nasabing bansa kontra iligal na droga gayung sa Pilipinas ay nasa mahigit 30,000 ang nasawi kung saan 7,000 lamang dito ang drug suspects.

Sinuportahan aniya nila ang war on drugs ng dating pangulo bagama’t nadismaya kalaunan dahil libu-libong Pilipino ang nasawi sa operasyon bukod pa sa pangako nitong tatapusin ang problema sa iligal na droga sa loob lamang ng anim na buwan na inabot ng anim na taon.

Ipinaalala rin ni Congressman Abante, isang Baptist Pastor na ibinoto niya at buong baptist church ang dating pangulong Duterte nuong 2016 presidential election.

Kukuwestiyunin ni Sen. Bato Dela Rosa si Senate President Francis “Chiz” Escudero sakaling pumayag itong makakuha  ng official transcript ng pagdinig tungkol sa war on drugs ni dating pangulong Rodrigo Duterte ang International Criminal Court.

Giit ng senador, hindi kinikilala ng Pilipinas ang hurisdiksyon ng ICC, kaya’t hindi dapat itong pahintulutan na makakuha ng kopya ng transcript.

Una nang sinabi ni Senate President Escudero na hindi magdadalawang-isip ang senado na ibigay ang transcript ng pagdinig ng Senate Blue Ribbon Subcommittee sa ICC o sinumang magre-request nito, basta’t may dahilan.