Jopel Pelenio

Hindi magiging problema ang pagpapatuloy ng laban kontra COVID-19 sa pagpasok ng susunod na administrasyon.

Ayon kay National Task Force against COVID-19 Dr. Ted Herbosa, mananatili pa rin kasi ang whole government approach kahit iba na ang nakaupong presidente ng bansa.

Wala ring mababago ani Herbosa sa kanilang mga health personnel na sanay at alam na ang mga hakbangin ukol sa tuloy-tuloy na paglaban sa pandemya at pagtuturok ng bakuna.

Tiwala ang health official na magiging maayos o smooth transition lalo na’t may pareho nang transition team na binuo ang outgoing at incoming na administrasyon.

Hiling naman ng Department of Health, na sanay maipagpatuloy ang naudlot na mga programa hinggil sa COVID response at inoculation effort ng pamahalaan.

Masusing pag-aaral ang isinasagawa ngayon ng Metro Manila Council kaugnay sa panukalang magpatupad ng bagong number coding scheme.

Ayon kay MMDA chairman Romando Artes Jr., bago pa ang halalan, nagkaroon na sila ng pakikipagpulong sa mga alkalde sa NCR, at may ilang datus aniya na hinihingi ang mga ito upang kanilang mapag-aralan.

Tulad ani Artes ng konseho, nagsasagawa rin sila ng sariling pag-aanalisa sa mga nakukuhang ulat bago muling makipagpulong sa Metro Mayors para desisyunan ang bagay na ito.

Pero may ilan din aniya na nagbigay ng mungkahi na hintayin na lamang muna ang pagpasok ng incoming administration bago pagpasyahan ang mungkahing magkaroon ng bagong number coding scheme.

Samantala, iminungkahi naman ni Artes na sakaling maipatupad na ang panukalang ito bago matapos ang panunungkulan ni Pangulong Duterte, dapat na muli itong maisailalim sa pag aaral kada-ikatlong buwan ng pagpapatupad nito.

Nakasaad sa panukalang new color coding system na mahigpit nang ipagbabawal sa kalsada ang mga pribadong sasakyan mula ala-5 ng hapon hanggang ala-7 ng gabi sa loob ng dalawang araw base sa huling numero ng plaka ng kanilang kotse o sasakyan.

Hindi naman kabilang dito ang mga Public Utility Vehicles o PUVs gaya ng TNVs, jeep, bus at taxi.

Nakipagpulong na sa Metropolitan Manila Development Authority (MMDA) ang ecowaste coalition upang makuha ang mga makokolekta nilang campaign materials para gawing hollow blocks at eco bricks.

Ayon kay MMDA chairman Romando Artes Jr., lahat ng mga maninipis na tarpaulin ay gigilingin sa waste granulator upang maging sangkap sa paggawa ng hallow blocks habang ang mga makakapal namang tarpaulin ang gagawin nilang eco bags.

Aabot na ani Artes sa 20 tonelada ang kanilang nakolekta sa isinagawang pagbaklas ng mga campaign materials sa iba’t ibang bahagi ng Metro Manila.

Pahayag ng MMDA chairman, inuna nilang linisin ang mga nagkalat at mga nakasabit na tarpaulin ng mga kandidato sa mga paaralan na sadya aniyang napakarami.

Bunsod nito, hinimok ni Artes ang mga kandidato nanalo man o natalo na makipagtulungan sa pagtanggal ng mga campaign posters at tarpaulins sa kalakhang Maynila.

Giit ng opisyal, maari kasing magdulot ng pagbara at pagbaha ang mga ito kapag napunta sa mga daluyan ng tubig gaya ng kanal at mga estero.