Jopel Pelenio

Dahil sa patuloy na pagbabalik operasyon ng mga negosyo sa bansa, tumataas din ang bilang ng mga may hanapbuhay at tumatanggap ng sweldo.

Ayon kay Dept. of Budget and Management (DBM) Acting secretary Tina Rose Canda,  nangangahulugan lamang ito na mas tataas pa ang kita ng gobyerno dahil mayroon nang pang-gastos ang mga Pilipino mula sa kanilang sweldo.

Malaki ani Canda ang maitutulong nito sa ekonomiya upang makabayad sa lumubong utang ng Pilipinas.

Maari din naman aniyang magtaas ng singil sa buwis ngunit una nang binigyang-diin ng papasok na Marcos Administration na mas maiging magpatupad na lamang ng mas pinaigting na hakbang upang mapalakas at mapataas ang tax collection ng bansa.

Inihayag pa ni Canda na una na aniyang siniguro ng mga economic managers ng Duterte administration na rasonable ang ginawang pag- utang ng bansa kung saan tiyak umanong mababayaran ito sa hinaharap.

Hindi itinatanggi ng Department of Environment and Natural Resources (DENR) na nagkaroon sila ng pagkukulang pagdating sa pag-monitor ng mga isinasagawang reclamation sa Coron, Palawan.

Ayon kay DENR Usec. Jonas Leones, aminado syang dapat na mas hinigpitan pa ng kanilang Provincial Environment and Natural Resources Office (PENRO) at Community Environment and Natural Resources Office (CENTRO) ang pagbabantay sa mga development o mga nangyayari sa reclamation project na ito.

Giit ni Leones, malinaw na sinamantala ng mga nangangasiwa sa proyekto ang pagtatambak ng lupa habang abala at nakatuon ang lahat sa paglaban sa COVID-19.

Kaya naman ikinagulat nila nang malaman aniyang umabot na sa 40 ektarya ang natambakan.

Bunsod nito, inihayag ni Leones na sinisilip na nila ang posibleng laki ng pinsalang idinulot nito sa coastal area at eco-system ng proyektong ito sa Coron.

Tiniyak naman ng opisyal na maliban sa kasong administratibo, sasampahan rin nila ng criminal cases ang mga developer sakaling mapatunayan na nagkaroon sila ng paglabag sa environmental laws ng bansa.

Ipinauubaya na ng Malakanyang sa susunod na administrasyon ni president-elect Ferdinand “Bongbong” Marcos Jr. ang pagpapasya kung babaguhin o itutuloy nito ang structure ng Inter-Agency Task Force (IATF).

Sa ginanap na Laging Handa briefing, inihayag ni Department of Health (DOH) Usec. Myrna Cabotaje, nakaantabay lamang sila sa kung ano ang magiging kautusan o desisyon ng incoming Marcos administration sa pamamagitan ng maitatalagang bagong health secretary.

Sa ngayon ani Cabotaje, nakahanda na sila para sa gagawing pagturn-over ng lahat ng dokumento kaugnay sa naging COVID response ng administrasyong Duterte.

Kasado na rin aniya ang kanilang ahensya para sa pagbibigay ng briefer sa magiging susunod na kalihim ng doh ukol sa paglaban ng gobyenro sa COVID-19.

Inihayag pa ni Cabotaje na may mga rekomendasyon narin sila sa ibat-ibang concerned bureau ng Health Department upang ma-institutionalized ang mga hakbangin at programa ng National Vaccination Operations Office (NVOC) na response, integration at vaccination.

Nasa desisyon na ni Pang. Rodrigo Duterte kung tatanggapin nito sakaling alukin sya ng incoming Marcos administration na maging kabahagi ng kanilang gabinete.

Ginawa ni acting Deputy Presidential Spokesperson Usec. Kris Ablan ang pahayag matapos sabihin  ni President elect Ferdinand Marcos Jr. na bukas ang kanyang administrasyon para sa sinumang nagnanais na makatulong sa pamahalaan, kabilang na dito si pangulong duterte na maaring maitalaga bilang Anti-Drug Czar.

Pero ani Ablan, nagbigay na ng unang pahayag ang Chief Executive kungsaan sinabi nito na excited na sya sa kaniyang pagriretiro sa politika at nais niya nang makauwi sa kanyang tahanan sa lungsod ng Davao.

Gayunman, binigyang-diin ni Ablan na welcome sa Malakanyang kung kabilang man sa plano ng incoming administration na italaga bilang Anti Drug Czar si Pang. Duterte lalo na’t iginiit nito na mayroon pa siyang unfinished business kaya’t kailangang maipagpatuloy ang kampanya kontra iligal na droga.

Tiwala ang National Disaster Risk Reduction and Management Council (NDRRMC) na mas mapapahusay at mabibigyan ng mga bagong ideya ang panukalang batas na naglalayong lumikha ng Department of Disaster Resilience bago ito maipasa ng incoming administration ni President elect Ferdinand “Bongbong” Marcos Jr.

Ayon kay NDRRMC Spokesman Mark Timbal, naipasa na sa kamara ang naturang panukala ngunit hindi pa tuluyang maisabatas dahil sa mainit na talakayan sa senado.

Una nang hinarang nina Sen. Franklin Drilon at Sen. Panfilo Lacson ang panukalang ito dahil sa hindi daw praktikal at wala umanong sapat na pondo.

Kaugnay nito, binigyang-diin ni Timbal na sanay maituloy ng papasok na Marcos administration ang pagpapatayo pa ng mas maraming evacuation center sa ibat-ibang lugar sa bansa.

Napakahalaga aniya ng mga ito upang matiyak ang kahandaan ng bansa sa anumang sakuna o kalamidad.

Samantala, inalerto na rin ni Timbal ang lahat ng lokal na pamahalaan sa buong bansa upang mapaghandaan ang inaasahang pagpasok ng mga bagyo ngayong panahon ng tag-ulan.

Tiwala ang Food and Drug Administration na matatapos nila sa loob lamang ng tatlong linggo ang pagsasagawa ng ebalwasyon sa kaugnay sa pagtuturok ng Booster dose sa mga 5 to 11 years old.

Pero paglilinaw ni FDA OIC Director General Oscar Gutierrez, sa ngayon, nakaantabay parin sila kaugnay sa mga maaring magsumite ng aplikasyon ukol dito.

Hanggang sa kasalukuyan kasi ani Gutierrez wala pa silang natatanggap na aplikasyon upang maisalang na sa kanilang pag-aaral.

Giit ng FDA official, basta’t may magsumite na ngayon ng aplikasyon, tiyak aniyang kakayanin nila itong maaprubahan bago bumaba sa pwesto si Pang. Rodrigo Duterte.

Ani Gutierrez, mabilis lamang kanilang evaluation process lalo na’t katuwang nila sa pagsasagawa nito ang mga vaccine expert ng bansa.