Jenn Patrolla

Nanindigan ang Kamara na walang nilabag sa konstitusyon ang mga mambabatas kaugnay sa pagkaantala ng impeachment case laban kay Vice President Sara Duterte.

Sa panayam ng DWIZ, depensa ni Manila City, 3rd District Representative Joel Chua, nasunod naman ng mga kongresista ang rules o panuntunan ng Kamara.

Ginamit anya ng mga mambabatas ang isang opsyon, na tinatawag na “House action” dahilan upang akyat sa senado ang ika-apat na impeachment complaint.

Sinabi pa ni Congressman Chua, na patuloy ang paghahanda ng mga mambabatas para sa impeachment trial ni VP Sara.

“Basahin mo ang konstitusyon…”

Ito ang ipinaalala at ipinayo ni Attorney Christian Monsod, dating Chairman ng Commission on Elections at isa sa bumuo ng 1987 constitution kay senate President Chiz Escudero kaugnay sa impeachment case ni Vice President Sara Duterte.

Sa panayam ng DWIZ, sinabi pa ni Attorney Monsod, na may nilabag sa konstitusyon ang Senado at Kamara dahil sa pagkaantala ng impeachment trial kay VP Sara.

Dismayado naman si Atty. Monsod dahil maraming dahilan ang mga mambabatas para simulan ang impeachment trial kay VP Sara.

Pinaghahanda na ng Department of Public Works and Highways ang motorista at commuters sa matinding trapiko na mararanasan sa oras na simulan ang pagkukumpuni sa ilang bahagi ng Edsa.

Ayon kay DPWH Secretary Manuel Bonoan, sisimulan na sa katapusan ng Marso ang rehabilitasyon sa nabanggit na kalsada at aabutin ito hanggang “Ber months”.

Magsisimula anya ang extensive road repair sa Edsa Busway Northbound lane mula Balintawak hanggang Monumento.

Idinagdag pa ng Kalihim, na magkakaroon ng mas bago at matibay na pavement ang Edsa busway.

Pansamantalang gagamitin ng mga Edsa buses ang kabilang linya habang ang natitirang linya ay para sa pribadong sasakyan.

Ibinasura ng Commission on Elections-1st Division ang disqualification case laban sa mga tumatakbong Tulfo para sa iba’t ibang posisyon sa 2025 midterm elections.

Kaugnay ito sa reklamong political dynasty na isinampa ni Attorney Virgilio Garcia laban kina ACT-CIS Representative Erwin Tulfo, media personality Ben Tulfo kasama ang tatlo pa nilang kamag-anak.

Sa desisyon ng COMELEC, “insufficient in form” o kulang ang isinumiteng dokumento kabilang ang Certificates of Candidacy ng mga respondent.

Sinabi naman ni COMELEC Chairman George Erwin Garcia, na maaaring umapela ang petitioner na tatalakayin sa En Banc ng komisyon.

 Tuloy na ngayong buwan ang maximum suggested retail price (MSRP) sa karneng baboy.

Ito’y upang mapigilan ang pagtaas ng presyo ng naturang produkto sa merkado.

Sinabi ni Agriculture Secretary Francisco Tiu Laurel Junior, na posibleng maipatupad ngayong buwan ang MSRP matapos ang gagawing konsultasyon sa mga stakeholder ngayong linggo.

Maaari na rin anyang ipatupad sa Marso 10 ang MSRP sa baboy.

Batay sa monitoring ng Bantay Presyo, naglalaro sa 360 pesos hanggang 430 pesos kada kilo ang kasalukuyang presyo ng kasim habang aabot naman hanggang 480 pesos kada kilo ang liempo.

Posibleng magsimula ang panahon ng tag-init sa kalagitnaan ng Marso hanggang Abril.

Ito mismo ang kinumpirma ni Ana Liza Solis, Hepe ng Climate Monitoring and Prediction Section ng PAGASA dahil malapit nang magtapos ang northeast monsoon o amihan.

Ayon kay Solis, nasa transition period na ang panahon ng bansa.

Dagdag pa ng PAGASA Official, na hindi sobrang init ang panahon katulad noong nakaraang taon.

Sa ngayon, umabot lamang sa 37 hanggang 38 degrees celcius ang temperatura sa Quezon City, na mas mababa sa predicted na 46 degrees celcius heat index.

Aabutin ng isa’t kalahating taon ang pagkukumpuni o rehabilitasyon sa kahabaan ng Edsa.

Sa panayam ng DWIZ, sinabi ni Public Works and Highways National Capital Region Director Lorie Malaluan, na sabay na kukumpunihin ang north bound lane at south bound lane ngayong buwan.

Dahil dito, pinag-aaralan na ng Dpwh at metropolitan manila development authority ang mga alternative route para sa mga motorista upang maibsan ang trapiko sa edsa.

Idinagdag pa ni Director Malaluan, na target nilang tapusin ang pagkukumpuni sa noth bound lane sa Setyembre hanggang Oktubre.

 Posibleng tuluyan nang mawawala ang Philippine Offshore Gaming Operators sa bansa sa katapusan ng taon.

 Ito ang sinabi ni Presidential Anti-Organized Crime Commission Chief Gilbert Cruz dahil sa tuloy-tuloy na pagsawata sa mga iligal na POGO hub sa Pilipinas.

Ayon sa PAOCC Official, napahinto na nila ang tatlong pangunahing scam hubs, na nagresulta sa pagkakaaresto ng mahigit limandaang mga dayuhan.

Sunod-sunod na rin anya ang kanilang ginawang pagligtas sa mga dayuhan na biktima ng kidnapping.

Aminado naman si Cruz na ang mga iligal na nagtatago sa mga liblib na lugar at residential area ang mga nag-o-operate na mga POGO.

Iginiit ni Senate President Chiz Escudero na hindi dapat ikabahala ng mga pilipino ang paglabas sa bansa ng malaking halaga ng tinatawag na “hot money.”

Ito’y dahil pumapasok at lumabas naman ang naturang pera.

Ayon sa Senate President, dapat naka-batay sa mga tinawag na long term investment o foreign direct investment ang paglago o pag-unlad ng ekonomiya ng isang bansa.

Paliwanag ng Senador na ang ‘hot money’ ay pondo na kontrolado ng mga investor na aktibo sa short term returns o mabilisang kita.

Kapag umalis anya o lumabas sa isang bansa ang ‘hot money’ ibig sabihin ay may nakita sila na mas mataas na return o kita sa ibang bansa.

Kahit may 283.7 million dollars na hot money na lumabas sa bansa nitong nakalipas na mga buwan, hindi ito reflection ng short, medium at long term stability ng Pilipinas.

Sa huling datos ng Bangko Sentral ng Pilipinas, ipinakita ang paglabas sa bansa ng 283.69 million US dollars pagdating sa foreign portfolio investments noong Enero.—ulat mula kay Cely Ortega Bueno (Patrol 19)

Nilinaw ni Presidential Communications Office Secretary Jay Ruiz na galing kay Executive Secretary Lucas Bersamin ang memorandum na nag-aatas sa lahat ng Presidential appointees na magsumite ng kanilang courtesy resignation.

Sinabi ni Ruiz, na bahagi ito ng mga direktibang kailangang sundin dahil kinakailangan ng pagbabago sa ahensya.

Iginiit pa ng Kalihim, na hindi personalan, at hindi madadaan sa palakasan, pagiging kakilala o kaibigan ang pagkuha niya ng mga tao, kundi base sa trabaho at kakayahan.

Kasabay nito, ibinunyag ng kalihim na may mga insidente ng leakages o pagkalat ng sensitibong impormasyon sa PCO.

Bukod sa mga leakage, inamin din ni Ruiz na may nangyayari ring intriga at siraan sa loob ng ahensya, bagay na nakaaapekto sa kanilang trabaho.

Sa ngayon, kinumpirma ni Ruiz na may ilang Presidential appointees na ang nagsumite ng kanilang courtesy resignation, kabilang ang ilang opisyal na itinalaga ni dating acting PCO Secretary Cesar Chavez. —ulat mula kay Gilbert {Perdez (Patrol 13)