Jenn Patrolla

Kumbinsido si Palace Press Officer at PCO Undersecretary Claire Castro na pipilitin pa ring kayanin ng pamahalaan na maabot ang kagustuhan ni Pangulong Ferdinand Marcos Junior na maging 20 pesos kada kilo ang presyo ng bigas.

Ayon kay Atty. Castro, walang kuwestiyon na nais ng pangulo na maabot ang nasabing kagustuhan.

Kaya’t sisikapin aniyang kayanin ng Pangulo na mapababa ang presyo ng bigas.

Muli namang binigyang-diin ni Castro na base sa mga nakaraang statement ni PBBM ay kagustuhan o pagnanais lamang, habang wala naman itong binanggit na pangako na maibaba pa sa 20 pesos kada kilo ang presyo ng nasabing commodity.

Sa kabila nito, tiniyak ng Malakanyang na patuloy ang kanilang pagsisikap ng administrasyong Marcos para maibaba ang presyo ng nabanggit na produkto. —ulat mula kay Gilbert {Perdez (Patrol 13)

Sen. Pimentel, bukas sa alok ni Sen. Tolentino na siya muna ang mamuno sa Senate Rules Committee para sa pag-draft ng senate rules para sa impeachment case ni VP Sara

Bukas si Senate Minority Leader Koko Pimentel sa alok at rekomendasyon ni Senate Majority Leader  Francis Tolentino na mangunguna siya sa pag-draft ng rules ng Senado para sa magiging proseso sa impeachment case laban kay Vice President Sara Duterte.

Ayon kay Senador Pimentel, walang problema sa kanya kung siya man ang italaga na mangunga sa pag-draft ng rules

Lima lamang anya silang abogado sa senado kaya baka wala ng ibang choice o mapagpilian.

Idinagdag pa ng Senador na hihintayin niya muna ang kanyang official assignment bago niya talakayin sa kanyang mga staff.

Giit ni Senador Pimentel, tulad ni senator tolentino, kandidato rin siya pero handa siya na ilaan ang kanyang oras sa paggampan ng tungkulin bilang senador. —ulat mula kay Cely Ortega Bueno (Patrol 19)

Ikinaalarma ng Malacañang ang pagkakaresto ng National Bureau of Investigation sa dalawang Chinese at tatlong Pilipino na hinihinalang nang-eespiya sa Palasyo.

Sinabi ni Palace Press Officer Undersecretary Claire Castro, na kailangan nang magpatupad ng mas mahigpit na seguridad sa malacañang at kay Pangulong Ferdinand Marcos Junior para matiyak ang kaligtasan ng Palasyo at Presidente.

Tiniyak ni Castro na paiigtingin din ng mga otoridad ang mga hakbang para masugpo ang mga sinasabi at napagbibintangang espiya.

Pag-aaralan naman anya ni Pangulong Marcos kung aaprubahan o ive-veto ang panukalang paggawad ng Filipino citizenship sa chinese businessman na si Li Duan Wang, na ini-uugnay sa mga Philippine Offshore Gaming Operations.

Sa ngayon, hinihintay pa ng palasyo na maisumite ang enrolled bill na inaprubahan ng Kamara at Senado para gawaran ng citizenship ang nasabing Chinese.—ulat mula kay Gilbert {Perdez (Patrol 13)

Iimbestigasyon na rin ng Senate Committee on Basic Education ang nadiskubreng ghost students sa Senior High School voucher program ng Department of Education.

Ayon kay Senator Sherwin Gatchalian, Chairman ng naturang kumite, kuntento at nasisiyahan siya sa ginagawang imbestigasyon ng DEPED sa naturang isyu alinsunod  sa utos ni Education Secretary Sonny Angara.

Pero bubusisiin nila sa Senado kung may eskwelahan nang nakasuhan o natanggalan ng lisensya o permit dahil sa pagkolekta ng bayad para sa ghost students.

Layunin ng imbestigasyon ang pag-amyenda sa batas ukol sa voucher program, na Government Assistance to Students in Private Education (GATSPE).

Mas hihigpitan ang patakaran sa akreditasyon ng mga private school dahil may mga eskwelahan na hindi inaasikaso ang kalidad ng edukasyon, nais lang na makakulekta ng bayad ng deped para sa Senior High schools. –  Sa ulat ni Cely Ortega-Bueno (Patrol 19)

Iginiit ni Health Secretary Ted Herbosa na hindi sagot ang bakuna kontra dengue outbreak.

Sa panayam ng DWIZ, ipinaliwanag ng Kalihim na prinoprotekhan lamang ng bakuna ang mga batang nagkaroon ng dengue.

Sa oras naman anya na maaprubahan ng Food and Drug Administration ang bakuna, ibibigay ito ng Department of Health sa mga doktor para iturok sa mga batang nangangailangan nito.

Sa ngayon, sinabi ni Sec. Herbosa na nag-plateau na ang kaso ng dengue sa Quezon City.

Patuloy namang pinapaalalahanan ng DOH ang publiko na agad na magpakonsulta sa eksperto sakaling makaranas ng sintomas ng nasabing sakit.

Nananatili pa rin sa Pilipinas ang ilang mga mastermind o Philippine Offshore Gaming Operator bosses.

Ito mismo ang kinumpirma ni Senador Sherwin Gatchalian sa kabila ng ipinatupad na total ban sa POGO.

Sa panayam ng DWIZ, sinabi ni Senador Gatchalian, marami pa ring mga POGO bosses ang nandito pa sa Pilipinas at ayaw bumalik sa China dahil mas mabigat parusa ang kanilang kakaharapin.

Umapela naman ang Senador sa mga lokal na pamahalaan, mga barangay at sa mga pribadong sektor na tulungan ang pamahalaan na tuluyang masawata ang mga patagong operasyon ng POGO sa bansa.

 Namumuro nanaman sa susunod na buwan ang taas-singil sa kuryente.

 Ito’y matapos aprubahan ng Energy Regulatory Commission ang dagdag-singil upang pondohan ang mga planta para sa renawable energy gaya ng solar wind at hyroplants.

 Batay sa anunsyo ng Meralco, magiging 11 centavos kada kilowatt per hour ang singil sa kuryente sa Marso o katumbas ng pitong pisong dagdag sa bill sa mga komukonsumo ng 200 kilowatt per hour sa isang buwan.

 Sinabi ng electric company, na taga-singil lamang sila ng fit all charges at hindi sa kanila napupunta kundi inireremit sa national transmission corporation.

 Maliban sa total adjustment, pinawi ng Meralco ang pangamba ng mga konsyumer dahil wala nang naka-ambang dagdag-singil sa kuryente.

Mariing itinanggi ng Department of Health ang kumakalat na bagong corona virus mula sa China.

Ayon sa kagawaran, ito ay isang uri ng false alarm, na layong manakot o mangamba ang mga Pilipino.

Wala naman anyang ulat ang World Health Organization hinggil sa sinasabing HKU5-CoV-2, na bagong corona virus variant.

Idinagdag pa ng DOH, na nakabase sila sa inilalabas na impormasyon ng who kaya’t kailangang suriing maigi ang mga nakikita sa mga social media site.

Iginiit ni Senador Sherwin Gatchalian na wala nang nag-ooperate na Philippine Offshore Gaming Operator sa Pilipinas.

Sa panayam ng DWIZ, sinabi ni Senador Gatchalian, na tanging sindikato na lamang ang naiwan, na gumagawa ng scamming activities sa bansa.

Gayundin ang sinasabing pandurukot, pangingidnap at pagto-torture ng mga chinese sa kapwa chinese nationals.

Dahil dito, nababahala ang senador sa ginagawang krimen ng mga chinese dahil posibleng targetin din nito ang mga pilipino.

Umapela naman si senador gatchalian sa presidential anti-organized crime commission at philippine national police na huwag tantanan ang mga chinese nationals na gumagawa ng krimen sa bansa.