Hannah Oledan

Planong maipatupad ang panukalang pagkakaroon ng Value Added Tax refund para sa mga dayuhang turista na mamimili dito sa ating bansa bago matapos ang taong ito.

Nabatid na tinalakay na ng Senate Committee on Ways and Means ang naturang panukala.

Sinabi ni Department of Tourism Undersecretary Shereen Pamintuan na naniniwala ang DOT na makakatulong ang naturang panukala upang makilala ang Pilipinas bilang shopping destination.

Ayon kay Committee Chairman Senador Sherwin Gatchalian, sa ilalim ng panukala, applicable lamang ang VAT refund sa mga single receipt product na binili sa bansa na hindi bababa sa P3,000.

Binigyang-diin pa ni Sen. Gatchalian na hindi kasama sa nasabing panukala ang mga produktong kinokonsumo.

Target ding gawing digital ang proseso ng TAX refund upang maibsan ang mga kaso ng fraud o panloloko.

Sa kasalukuyan, nakatakda nang bumuo ng technical working group ang senate panel para sa panukala at inaasahang maipe-presenta na sa plenaryo ng senado sa pagbabalik sesyon ng kongreso sa susunod na buwan.

Maaari nang matalakay sa Kamara ang panukalang magtatatag ng mga disaster food bank at stockpile sa buong bansa.

Sa ilalim ng House Bill 8463 na kilala rin bilang disaster food bank and stockpile act, ay magtatayo ng imbakan ng food supplies na pwedeng magagamit tuwing may kalamidad sa bawat probinsya at urbanized city.

Sa pamamagitan nito ay masisiguro na may nakahandang suplay ng pagkain, tubig at iba pang pangangailangan sa oras na tumama ang kalamidad sa bansa.

Pasisinayaan ng NDRRMC at DSWD ang pagtukoy at pagtatayo ng stockpile sa mga strategic location nang sa gayun ay matiyak ang accessibility nito para sa lahat ng bayan sa isang rehiyon.

Titiyakin din na ligtas mula sa anumang contaminants ang pagtatayuan ng stockpile at hindi ito isasapubliko.
Ididisenyo at itatayo naman ng Department of Public Works and Highways ang mga calamity-proof warehouse kung saan itatago ang mga suplay.

Nalulugi ng P1-B kada buwan ang National Power Corporation dahil sa pabagu-bagong presyo ng diesel fuel.

Nabatid na ang pagbabago sa presyo ay nagdulot ng pag-igting ng organisasyon sa pagsisikap nito sa pag-hybridize ng diesel-fired power plants sa mga off-grid na lugar.

Binigyang-diin ng pangulo at CEO ng NAPOCOR na si Fernando Roxas ang pangangailangan para sa mga hakbang na ito upang matugunan ang mga hamon sa pananalapi dulot ng pabago-bagong presyo ng diesel fuel.

Sinabi ni Roxas na itinakda ng NAPOCOR ang kanilang diesel rates para makabawi ng Php 35 kada litro.

Gayunpaman, ang tumataas na halaga ng diesel fuel, na umabot na sa Php 70 kada litro, ay lalong nagpalala sa pagkalugi sa pananalapi ng korporasyong responsable sa pamamahala sa small power utilities group power plants sa mga off-grid areas.

Ipinaliwanag ni roxas na ang ahensya ay kulang sa mga kinakailangang pondo para independeng isagawa ang paglipat ng enerhiya.

Sa ngayon, pinangangasiwaan ng napocor ang pagpapatakbo at pagpapanatili ng 281 spug power plants, pangunahing pinagagana ng diesel, na matatagpuan sa 189 na munisipalidad sa buong Pilipinas.

Kumpiyansa si Philippine National Railways Chairman Michael Macapagal na matatapos ang mga proyekto ng kanilang ahensya, na nagkakahalaga ng P873.6-B.

Kinabibilangan ito ng 8 istasyon mula Malolos, Bulacan hanggang Valenzuela City.

Sa oras na matapos ang proyekto, ang karaniwang oras na paglalakbay sa pagitan ng Bulacan at Hilagang bahagi ng Metro Manila ay maaaring mapaikli sa 20 minuto lamang.

Samantala inaasahan naman na ang buong proyekto ng NSCR ay makumpleto na sa 2028 kasabay ngpagtatapos ng termino ni Pangulong Ferdinand Marcos Jr. ang kanyang termino sa panunungkulan.

Nabatid na ang 147-kilometer, 35-station na riles ay mag-uugnay sa mga lalawigan ng Pampanga, Bulacan, at Laguna sa National Capital Region. Magkakaroon ito ng 800,000-pasahero na kapasidad araw-araw na may 50 set ng tren na mayroong 8 kotse bawat isa.

Mahigpit na ipatutupad ng Philippine National Police ang “No Plate, No Travel” Policy sa buong bansa.

Ito ang binigyang-diin ni PNP Chief Benjamin Acorda Jr. sa isinagawang command conference nitong linggo.

Ayon kay Acorda, mahigpit na babantayan ang mga motoristang gumagamit ng sasakyan na walang plaka sa pamamagitan ng highway patrol group.

Sa pamamagitan din aniya nito, partikular na matututukan din ang mga motorsiklo na walang plaka na nagagamit sa krimen.

Nilinaw ni Acorda na hindi exempted sa nasabing patakaran  ang mga pulis dahil kailangang matutong sumunod ang lahat sa  batas.

Sinabi pa ni Chief Acorda na dapatmaging ehemplo ang PNP sa publiko at mapanatili ang respeto.

Magkakaroon din ng  koordinasyon ang PNP sa Land Transportation Office  upang tuluy-tuloy ang implementasyon ng  “No-Plate, No-Travel” Policy.

Sa ilalim ng “No-Registration, No-Travel” Policy na nakapaloob sa 2015 joint administrative order na ­inisyu ng Department of Transportation And Communication at LTO,  ang lahat ng motorsiklo na bibiyahe ay kailangan na may balidong plate number.

Pagmumultahin naman ng p10,000 ang may-ari ng  unregistered motorcycle habang p1,000 naman sa driver ng motorsiklo.

Hiniling ni Senator Francis Tolentino, sa Department Of Health na isaalang-alang ang pagpayag sa mga dayuhang doktor na magpraktis sa Pilipinas para sa limitadong panahon.

Ito ay para magkaroon ng palitan ng ideya sa pagitan ng mga dayuhan at lokal na practitioner at hindi para makipagkumpitensya.

Ayon kay Sen. Tolentino, ang kasalukuyang protective policy sa Pilipinas ay pumipigil sa mga dayuhang doktor na pansamantalang magpraktis dito.

Nabatid na sinabi ng bagong hinirang na health secretary na si Teodoro Herbosa kay Sen. Tolentino na makikipag-usap siya sa Professional Regulations Commission sa posibilidad ng pagluwag sa kasalukuyang alituntunin sa paglilisensya upang payagan ang mga dayuhang doktor na pansamantalang magpraktis ng kanilang propesyon sa Pilipinas.

Nabatid na ang PRC, sa ilalim ng Republic Act No. 8981, ay may kapangyarihang pangasiwaan ang mga dayuhang mamamayan na pinahintulutan ng mga umiiral na batas na magsagawa ng kanilang mga propesyon alinman bilang mga may hawak ng sertipiko ng pagpaparehistro at isang propesyonal na kard ng pagkakakilanlan o isang pansamantalang espesyal na permit sa Pilipinas.

Hinimok ng pamahalaang panlalawigan ng Albay ang mga LGU sa lugar na tangkilikin ang mga produkto ng mga naapektuhang magsasaka at mangingisda ng nagaganap na pag-alburoto ng bulkang Mayon.

Ayon kay Provincial Agriculturist Cheryl Rebate, malaking tulong ang pagbili ng mga ani ng mga lokal na magsasaka para matiyak na hindi sila mauuwi sa pagkalugi.

Nabatid nasa 5,000 na magsasaka ang naapektuhan ng pag-alburoto ng bulkan.

Suhestyon ng pamahalaang panlalawigan ng Albay na ang mga agri-fishery products na bibilhin mula sa mga lokal na producer ng lalawigan ay maaaring isama sa food packs na ipinamamahagi sa evacuees na kasalukuyang nanunuluyan sa evacuation centers.

Kaugnay nito, ang pamahalaan ng Albay ay naglaan ng halos P3-M na budget bilang pambili ng mga lokal na produkto ng mga mambubukid.