Gilbert Perdez

Sumipa na sa 129,913 ang mga kumpirmadong kaso ng coronavirus disease (COVID-19) sa Pilipinas matapos makapagtala ng 3,109 na bagong impeksiyon ang Department of Health (DOH).

Sa nabanggit na bilang, 59,970 ang mga itinuturing na active cases habang 91.2 percent naman ang “mild”, 7.5 percent ang “asymptomatic”, 0.7 percent ang “severe” at 0.6 percent ang kritikal.

Samantala, ayon sa DOH, sumampa na sa 67,673  ang total recoveries kasunod ng paggaling ng 654 COVID-19 patients habang 2,270 na ang death toll sa pagpanaw ng 61 pang pasyente sa buong bansa.

JUST IN: Kaso ng COVID-19 sa bansa,
nadagdagan pa ng 3,109 ngayong Linggo, Agosto 9.

Dahil dito, pumalo na sa 129,913 ang kabuuang
bilang ng kumpirmadong kaso ng COVID-19 sa
bansa | https://t.co/HHOy7zaafm pic.twitter.com/Kb7CDgMAyB

— DWIZ Newscenter (@dwiz882) August 9, 2020

Nanawagan kay Pangulong Rodrigo Duterte ang isang dating opisyal ng Department of Education (DepEd) na ipagpaliban ang pagbubukas ng klase sa Agosto 24.

Ayon kay dating DepEd assistant secretary at ngayo’y Parents-Teachers Alliance chairman Emilio “Jun” Abelita, hindi pa handa ang mga eskwelahan sa implementasyon ng mga bagong “modes of teaching.”

Binigyang diin ni Abelita na bukod sa kakulangan sa mga materyales ay kailangan pa ng dalawa hanggang tatlong buwan upang ganap na mapaghandaan at maunawaan ng mga guro kung paano maipatutupad ang distance learning.

Iginiit ng Department of Trade and Industry (DTI) na hindi na kailangan pang isalang sa test ang mga manggagawa na walang nakikitang sintomas ng COVID-19.

Sa halip, ayon kay DTI Secretary Ramon Lopez, mahalagang i-monitor araw-araw ng mga employers ang health condition ng kanilang mga empleyado at i-report ang posibleng impeksiyon na madidiskubre ng mga ito.

Samantala, muling ipinaalala ni Lopez sa mga empleyado na iwasan ang pakikisalamuha sa mga kapwa-manggagawa lalo na sa canteen, smoking area at shuttle service upang maiwasan ang transmission o hawahan.

Kinampihan ng Malacañang ang Department of Transportation (DOTr) sa harap ng kaliwa’t kanang batikos na inaabot ng ahensya bunsod ng isinusulong nito na gawing mandatory ang pagsusuot ng face shield sa mga pampublikong transportasyon simula Agosto 15.

Sa isang virtual press conference, binigyang diin ni Presidential Spokesperson Harry Roque na ibinatay sa siyensiya ang naging desisyon ng DOTr bilang isa sa mga hakbang upang mapuksa ang coronavirus disease 2019 (COVID-19).

Magugunitang nagpalabas ng isang memorandum circular ang DOTr noong Agosto 4 kung saan inaatasan nito ang lahat ng transportation sectors na obligahin ang kanilang mga pasahero na magsuot ng face shield habang bumibiyahe.