Obligado nang magsuot ng face shield ang mga personnel ng Diocese of Balanga sa Bataan.
Ayon kay Balanga Bishop Ruperto Santos, ito’y bilang pagtalima na rin sa mga ipinatutupad na polisiya ng pamahalaan at dagdag na safety measures laban sa coronavirus disease (COVID-19) pandemic.
Samantala, nilinaw ni Santos na magpapatupad din sila ng mandatory na pagsusuot ng face shield para sa mga deboto.
Naudlot ang pamamahagi ng libreng tablets para sa mga estudyante sa mga pampublikong paaralan sa Pasig City matapos madiskwalipika ang nanalong bidder para sa proyekto.
Ayon kay City Mayor Vico Sotto, ang RedDot Imaging Philippines, Inc. ay na-disqualify dahil ang brand ng gadget na inialok nila na Coby ay hindi kilala at hindi pangmatagalan na gamit para sa mga mag-aaral sa lungsod.
Sinasabing nag-alok ang kompanya ng mababang presyo ng tablets noong magkaroon ng live bidding subalit natuklasan na ang Coby Electronics Corporation na gumagawa ng nabanggit na gadgets ay nagsara noon pang 2013 matapos umanong malugi.
Nabatid na sinuri nang husto ng YugaTech ang inalok na produkto ng RedDot hanggang sa malaman na ang noong 2017 pa huling nag-post sa kanilang Facebook account ang Coby.
Giit ng Technical Working Group (TWG), mahalaga ang specifications ng items upang matukoy kung ito’y papasa sa requirements at angkop sa gadgets na kanilang hinahanap.
Samantala, naghain na ng motion for reconsideration ang RedDot at sinasabing naisumite na ito ng tanggapan ng alkalde.
Nangako ang Philippine Navy (PN) at Republic of Korea Navy (ROKN) na patuloy nilang tatahakin ang landas ng pagtutulungan at pagkakaisa laban sa coronavirus disease 2019 (COVID-19) pandemic nang hindi nababalam ang kanilang operational capabilities.
Ayon kay Public Affairs Officer Lt. Commander Maria Christina Roxas, sa kauna-unahang virtual meeting na pinamagatang “Navy to Navy Talks” o NTNT, tinalakay ng dalawang navies ang aspetong pandepensa laban sa COVID-19 crisis.
Sinasabing nakapaloob naman ang nabanggit na diskusyon sa Terms of Reference (TOR) na nilagdaan ng dalawang bansa noon pang 2019.
Hinimok ni Senate President Pro Tempore Ralph Recto ang pamahalaan na mag-deploy ng mga dagdag na state auditors sa Philippine Health Insurance Corporation (PhilHealth).
Ayon kay Recto, ito’y upang mabusisi nang husto ang mga liquidations ng PhilHealth matapos mabunyag ang mga umano’y anomalya sa ahensya.
Ipinaliwanag ng senador na hindi sapat ang mga nakatalagang 16 na auditors ng Commission on Audit (COA) sa state firm lalo pa’t tinatayang 35,000 claims kada araw ang pinoproseso nila mula sa mahigit 8,000 ospital at klinika sa iba’t ibang panig ng bansa.
Nadagdagan pa ng 64 ang bilang ng mga tinamaan ng coronavirus disease 2019 (COVID-19) sa Bulacan.
Dahil dito, ayon sa Provincial Health Office (PHO), umakyat na sa 1,896 ang coronavirus cases sa lalawigan.
Sinasabing sa bilang na ito, 1,163 ang nasa active status, 310 ang symptomatic habang 853 naman ang asymptomatic.
Samantala, ayon kay Governor Daniel Fernando, sumampa na sa 679 ang total recoveries sa Bulacan kasunod ng paggaling ng 32 pang pasyente.
Ikinalugod ng Chinese Embassy sa Maynila ang ginawang pag-apruba ng Food and Drug Administration (FDA) sa Lianhua Qingwen na isang uri ng herbal medicine na gawang China.
Sa isang pahayag, inilarawan ng embahada bilang “important progress” ang pagpasok ng mga traditional Chinese medicine products sa merkado ng Pilipinas.
Batay sa inisyung Certificate of Product Registration ng FDA, binanggit na ang “Lian Hua Qing Wen” ay nakatutulong upang mapigilan ang pagpasok ng heat-toxin sa baga, kabilang na ang mga sintomas ng lagnat, sipon, pagkirot ng muscle, at baradong ilong.
Sinasabing ginagamit din ang nabanggit na herb product laban sa mild at moderate na kaso ng coronavirus disease 2019 (COVID-19) sa China.
Hinikayat ng Department of the Interior and Local Government (DILG) ang mga barangay na maglatag ng sarili nilang isolation centers at mas palakasin pa ang kanilang health emergency response laban sa pagkalat ng coronavirus disease (COVID-19).
Sa isang special meeting na ipinatawag ng Inter-Agency Task Force for the Management of Emerging Infectious Diseases (IATF-EID) sa Davao City, binigyang diin ni DILG Secretary Eduardo Año na dapat mayroong limang isolation beds sa bawat 1,000 populasyon ng barangay.
Mahalaga aniya ang pagkakaroon ng mga isolation units upang agad na maihiwalay sa mga walang sakit ang mga pasyente na mayroong mild symptoms ng COVID-19 at asymptomatic.
Hindi makokompromiso ang kaligtasan ng mga guro at estudyante sa pagbubukas ng klase sa Agosto 24.
Ito ang tiniyak ni Education Undersecretary Tonisito Umali bilang tugon sa mungkahi ni Sen. Sherwin Gatchalian na ipagpaliban muna ang ‘school opening’ bunsod ng posibilidad na mapalawig pa ang modified enhanced community quarantine sa ilang lugar sa Metro Manila at mga karatig-lalawigan.
Giit ni Umali, hindi naman malalagay na panganib ang kaligtasan ng mga guro lalo’t wala pa namang pangangailangan para maghatid ng mga learning materials sa mga komunidad sa unang dalawang linggo ng school year dahil ilalaan muna ang panahong ito sa pagsasagawa ng orientation at psycho-social interventions.
Interesado ang Iraq sa nabuong bakuna ng Russia laban sa coronavirus disease 2019 (COVID-19).
Ang pahayag ay ginawa ni Public Health Department Head Riyadh Abdul-Amir matapos makapagtala ang kanilang bansa ng 3,396 na bagong kaso ng coronavirus.
Umakyat na sa 156,995 ang kabuuang bilang ng mga tinamaan ng COVID-19 sa Iraq.
Umabot na rin sa 5,531 ang mga nasawi habang 112,102 na ang total recoveries sa naturang bansa.
Handa nang sumabak sa UFC Octagon si Filipino-American fighter Mark Striegl sa Agosto 22.
Ayon sa ulat, makakasagupa ng Southeast Asian Games gold medalist si Russian Timur Valiev sa Las Vegas, Nevada.
Isa ang laban ni Striegl sa mga undercard ng bakbakan nina bantamweight contenders Frankie Edgar at Pedro Munhoz.
Magugunitang naging kinatawan ng Pilipinas si Striegl sa 2019 edition ng SEA Games kung saan nakasungkit siya ng gintong medalya.