Gilbert Perdez

Nakapagtala ng pitong kaso ng coronavirus disease 2019 (COVID-19) sa Dinagat Islands makaraan ang ilang buwan ng pagiging COVID-free ng probinsya.

Ayon sa Provincial Inter-Agency Task Group, nagpositibo kasi sa RT-PCR test ang pito sa 10 samples na dinala sa Southern Philippines Medical Center sa Davao City.

Apat sa mga nagpositibo ay mula sa bayan ng Loreto, dalawa mula sa Cagdianao at isa naman mula sa San Jose.

Sinasabing dumating sa lalawigan ang mga pasyente noong July 31 at agad silang isinalang sa mahigpit na mandatory quarantine.

Kusang loob na sumuko sa mga awtoridad ang isang miyembro ng Milisyang Bayan (MB) ng New People’s Army (NPA) sa Barangay Bantug, Gabaldon, Nueva Ecija.

Ayon kay Lt. Col. Reandrew P. Rubio, commanding officer ng 91st Infantry Battalion ng Philippine Army, ang pagsurender ni Virgilio Perez “alyas Bert” ay bunga ng walang humpay na pakikipag-dialogue ng mga kinatawan ng pamahalaan.

Kasamang isinuko ni Perez ang kanyang M16 rifle na may dalawang magasin at mga bala.

Ayon kay Perez, lumantad siya at nagbalik-loob sa gobyerno dahil hindi niya nagugustuhan ang ipinaglalaban at pamamalakad ng kilusan.

Maliban dito, hinimok din ni Perez ang iba pang mga kasapi ng NPA na sumukod na rin lalo pa’t wala naman aniyang magandang naidudulot ang armadong pakikibaka.

Pinalawig pa ang pansamantalang tigil operasyon ng isang electric cooperative na nakakasakop sa Gapan City at iba pang bayan sa Nueva Ecija.

Ayon sa Nueva Ecija 1 Electric Cooperative (NEECO 1), ginawa ito habang hindi pa lumalabas ang resulta ng swab tests ng mga empleyado ng kooperatiba.

Dahil dito, sa halip na mula Aug. 17 hanggang 21, 2020 ang temporary lockdown, extended ito ng August 24 hanggang 28, 2020.

Inaasahang balik operasyon na ang NEECO sa Aug. 31 pagkatapos ng disinfection at quarantine period ng ilang empleyado.