Nag-donate ng bagong air surveillance radar systems ang Japan sa Pilipinas.
Ayon sa Japanese Embassy, ginawa ang hakbang kasunod ng napag-usapan sa pagitan ng Department of National Defense (DND) at Mitsubishi Electric Corporation upang mapalakas ang defense capability ng bansa.
Una nang binanggit ng DND na noon pang 2016 nilagdaan ang kontrata para sa proyekto na nagkakahalaga ng $103.5 million.
Umakyat na sa 209,544 ang bilang ng mga tinamaan ng coronavirus disease 2019 (COVID-19) sa Pilipinas matapos makapagtala ang Department of Health (DOH) ng 3,999 na bagong impeksyon.
Ayon sa DOH, karamihan sa mga bagong kaso o kabuuang 2,097 ay mula sa National Capital Region (NCR), 178 sa Laguna, 138 sa Cavite, 132 sa Batangas, at 125 sa Cebu.
Samantala, pumalo na sa 134,474 ang total recoveries kasunod ng paggaling ng 510 COVID-19 patients.
Kasabay nito, umakyat naman sa 3,325 ang death toll matapos masawi ang 91 pang pasyente.
Labing-tatlong (13) menor de edad ang nasagip habang limang iba pa ang arestado dahil sa pagkakasangkot sa child pornography at sex trafficking sa Bislig City, Surigao del Sur.
Ayon kay Philippine National Police (PNP) Chief, Gen. Archie Gamboa, dahil sa impormasyon mula sa Australian Federal Police ay matagumpay naisagawa ang operasyon ng pinagsanib na puwersa ng
Women and Children Protection Center and Anti-Cybercrime Group, Caraga Region Police, Department of Social Welfare and Development at Regional Inter-Agency Council Against Trafficking (RIACAT).
Aniya, nakatanggap sila ng tip mula sa mga awtoridad sa Australia hinggil sa online live sex shows na kinatatampukan ng mga menor de edad sa Bislig at ipinalalabas pa ito nang libre sa mga manonood sa internet.
Kabilang sa mga nadakip ay mga magulang pa mismo ng ilan sa mga batang biktima.
Inihahanda na ang mga kaukulang kasong isasampa laban sa mga suspek.
Ikinaalarma ng National Task Force (NTF) Against COVID-19 ang pagtaas ng bilang ng mga nagpapakamatay sa bansa sa gitna ng coronavirus disease 2019 (COVID-19) pandemic.
Ayon kay Justice Secretary Menardo Guevarra, nakatanggap siya ng tawag mula kay IATF-National Task Force Chief Implementor Sec. Carlito Galvez hinggil sa nabanggit na usapin.
Nanawagan naman si Guevarra sa mga lider ng simbahan at mga spiritual leaders na tumulong sa pagbibigay-payo at gabay sa kanilang mga miyembro at taga-sunod lalo na ang mga nakakaranas ng depresyon dahil sa kawalan ng trabaho at pagkakakitaan at iba pang kadahilanan ngayong panahon ng pandemya.
Hinikayat ng isang mambabatas ang Department of Information and Communications Technology (DICT) na higpitan ang pagbabantay sa mga couriers sa bansa.
Ginawa ni Cebu Rep. Eduardo Gullas ang panawagan matapos masabat ng mga awtoridad ang P81.6 milyon na halaga ng hinihinalang shabu sa warehouse ng J&T Express sa Central Visayas.
Giit ni Gullas, mayroong eksklusibong kapangyarihan at awtoridad ang DICT na i-regulate ang industriya ng postal delivery services, gayundin ang domestic postal commerce sa bansa.
Sumirit na sa 189,601 ang bilang ng mga dinapuan ng coronavirus disease 2019 (COVID-19) sa Pilipinas matapos makapagtala ng 2,378 na bagong kaso ang Department of Health (DOH).
Sa nabanggit na bilang, ayon sa DOH, 1,022 dito’y mula sa National Capital Region (NCR), 132 cases sa Cavite, 128 sa Laguna, 115 sa Rizal at 96 naman sa Cebu.
Kasabay nito, umakyat na sa 131,367 ang total recoveries kasunod ng paggaling ng 16,459 na coronavirus patients.
Samantala, pumalo na sa 2,998 ang death toll sa buong bansa kasunod ng pagpanaw ng 34 pang pasyente.
JUST IN: Kaso ng COVID-19 sa bansa, nadagdagan pa ng 2,378 ngayong Linggo, Agosto 23
Pumalo na sa kabuuang 189,601 ang bilang ng kumpirmadong kaso ng COVID-19 sa bansa. Mayroon namang 55,236 naitalang active cases. | https://t.co/HHOy7zrLDW pic.twitter.com/xZgpkdUnng
— DWIZ Newscenter (@dwiz882) August 23, 2020
Nadagdagan ng isa ang bilang ng mga Pilipino abroad na tinamaan ng coronavirus disease 2019 (COVID-19).
Bunga nito, ayon sa Department of Foreign Affairs (DFA), pumalo na sa 9,984 ang mga Pinoy na nagpositibo sa virus sa labas ng bansa.
Wala namang bagong naitalang nasawi kaya’t nananatili sa 733 ang death toll.
Maliban dito, nadagdagan naman ng 26 ang bilang ng mga narekober sa sakit dahilan upang sumampa sa 5,953 ang total recoveries sa hanay ng mga Pinoy sa ibayong dagat.
Muling nagpakita ng bangis sina LeBron James at Anthony Davis matapos ilampaso ng Los Angeles Lakers ang Portland Trail Blazers sa score na 116-108 sa Game 3 ng first round playoff series sa Western Conference.
Kumana si James ng 38 points habang nagdagdag si Davis ng 29 points para sa Lakers.
Nakalamang ang Blazers sa unang bahagi ng laro pero nakabawi ang LA sa third quarter.
Samantala, bagama’t sinasabing may injury sa daliri si Damian Lillard, nakasungkit pa rin ito ng 34 points sa panig ng Portland
Kabuuang 437 na mga lokal na opisyal at ilang sibilyan ang nahaharap sa reklamong kriminal dahil sa umano’y maanomalyang pamamahagi ng COVID-19 cash aid.
Ayon sa Department of the Interior and Local Government (DILG), sa bilang na ito, 203 ang mga elected officials na kinabibilangan ng isang alkalde, mga konsehal, at barangay officials; 102 na city at barangay personnel at iba pang local officials; at 132 na kasabwat na mga sibilyan.
Kabilang sa mga kinakaharap na kaso ng mga respondents ay ang paglabag sa Anti-Graft and Corrupt Practices Act at Bayanihan Act.
Mas marami naman ang mga nakasuhan sa Region 12 (50) na sinundan ng Western Visayas (40), at Central Visayas (30).
Samantala, binigyang diin naman ni Interior Secretary Eduardo Año na sobrang nakakadismaya na nagawa pang mangurakot ng mga lokal na opisyal sa ayudang nakalaan para sa ating mga kababayan na lubhang apektado ng pandemya.
Giit ni Año, habang patuloy ang pangalawang yugto ng pamimigay ng Social Amelioration Program (SAP), puspusan naman ang pagsasampa ng kaso laban sa mga tiwaling mga opisyal at ng kanilang mga kasabwat.
Niyanig ng pagsabog ang bayan ng Shariff Aguak sa Maguindanao dahilan upang mag-panic ang mga residente.
Ayon kay Mayor Marop Ampatuan, inaalam pa ngayon ng explosive ordinance disposal team ng pulisya kung anong uri ng pampasabog ang sumambulat sa likod ng town hall malapit sa police station.
Bago ang insidente, sinasabing nakatanggap ng impormasyon si Ampatuan na planong i-rescue ng Bangsamoro Islamic Freedom Fighters (BIFF) ang isa sa mga kasamahan nito na isang “alyas Koreano” na kasalukuyang nakakulong sa municipal police lock-up facility.
Wala namang nasaktan sa naturang pagsabog.