Kumpirmadong tinamaan ng coronavirus disease 2019 (COVID-19) si Bulacan Governor Daniel Fernando.
Ayon kay Fernando, kasalukuyan siyang sumasailalim sa self-quarantine.
Sinabi ng gobernador na nitong Biyernes lamang niya nalaman ang resulta ng kanyang real time reverse-transcription polymerase chain reaction (RT-PCR) test.
Ngunit nilinaw ng opisyal na nasa mabuti siyang kondisyon at hindi rin siya nakakaranas ng mga sintomas ng naturang sakit.
Dalawampu’t walo (28) pang Pilipino ang nakarekober mula sa coronavirus disease 2019 (COVID-19) sa Europa at Gitnang Silangan.
Dahil dito, ayon sa Department of Foreign Affairs (DFA), pumalo na sa 6,123 ang total recoveries sa labas ng bansa.
Sumampa naman sa 10,067 ang bilang ng mga Pinoy na tinamaan ng COVID-19 sa ibayong dagat matapos makapagtala ang DFA ng limang bagong impeksyon.
Samantala, nananatili naman sa 755 ang mga nasawi sa sakit sa hanay ng mga Pinoy abroad.
Muling itatayo ang ilang mosque na nawasak matapos lusubin ng mga terorista ang lungsod ng Marawi noong 2017.
Ayon kay Task Force Bangon Marawi Chairperson Eduardo del Rosario, kukumpunihin ang tatlong mosque sa pamamagitan ng Department of Human Settlements and Urban Development (DHSUD) at ilang private developers.
Sinabi ni Del Rosario na ito ang unang pagkakataon na maglalaan ang housing department ng escrow funds na nagkakahalaga ng P32.14 milyon.
Pumalo na sa 213,131 ang bilang ng mga dinapuan ng coronavirus disease 2019 (COVID-19) sa Pilipinas matapos makapagtala ang Department of Health (DOH) ng 3,637 na bagong kaso.
Sa bilang na ito, ayon sa DOH, 74,611 ang active cases kung saan 91.3% ang nakakaranas ng mild symptoms, 6.7% ang asymptomatic habang 0.8% t naman ang severe o malala.
Samantala, sumampa na sa 135,101 ang total recoveries kasunod ng paggaling ng mahigit 600 pasyente.
Maliban dito, umakyat na sa 3,419 ang bilang ng mga nasawi makaraang pumanaw ang halos isang daang COVID-19 patients.
JUST IN: Kaso ng COVID-19 sa bansa, nadagdagan pa ng 3,637 ngayong Sabado, Agosto 29.
Pumalo na sa kabuuang 213,131 ang bilang ng kumpirmadong kaso ng COVID-19 sa bansa. Mayroon namang 74,611 naitalang active cases. | https://t.co/HHOy7zaafm pic.twitter.com/TD7MYZNYY8
— DWIZ Newscenter (@dwiz882) August 29, 2020
Bubuksan na sa unang linggo ng Setyembre ang sariling molecular laboratory ng Quezon City.
Ayon kay Mayor Joy Belmonte, sa pamamagitan nito’y mas mapapabilis ang paglalabas ng coronavirus disease 2019 (COVID-19) tests, gayundin ang pagtugon sa mga bagong kaso.
Aniya, hinihintay na lamang nila ang accreditation mula sa Department of Health (DOH) upang ganap na makakapag-operate ang nabanggit na molecular laboratory.
Patay ang walo katao matapos pagbabarilin ng mga armadong lalaki sa Kabacan, North Cotabato.
Kinilala ang mga biktima na sina Kors Salilangan, Sandigan Zailon, Benladin Dimanalao, Romeo Balatamay, Katindig Kagayawon, Fahad Mandigan, parehong residente ng Kabacan; Budsal Lipusan ng Datu Odin Sinsuat, Maguindanao; at Musaid Jaiden ng Midsayap, North Cotabato.
Ginagamot naman sa ospital si Tong Guiman, residente naman ng Barangay Aringay sa nabanggit na bayan.
Ayon kay Police Lt. Ernie John Saratao, Kabacan Deputy Police Chief for Operations, nagpapahinga sa gilid ng highway ang mga biktima nang dumating ang mga armadong suspek na pawang naka-motorsiklo at pinaulanan ng bala ang mga ito.
Nakaganti pa ng putok ang isa sa kanila pero napatay din ng mga salarin na mabilis na tumakas matapos ang pamamaril.
Posible umanong “rido” o away ng magkakalabang angkan ang dahilan ng nabanggit na krimen.
Pasok ang dalawang batang Pinay sa grand finals ng “The Voice Kids” sa United Kingdom.
Si Victoria Alsina ng Team Will.I.Am at Justine Afante ng Pixie Lott team ay kasama sa apat na magsasagupa sa dulo ng kompetisyon.
Sa semifinals, inawit ng 7-anyos na si Alsina ang “Hero” habang “One Moment In Time” naman ang binirit ng 13-anyos na si Afante.
Matatandaan na limang Filipino singers ang nakapasok sa Blind Auditions ng “The Voice Kids UK”.
Nakausad si Joshua Regala sa semifinals pero hindi ito umabot ng grand finals.
Balik sa pagiging no.1 contender para sa Women’s atomweight title si Denice Zamboanga habang nagtagumpay din ang kanyang kuya na si Drex Zamboanga sa kanilang laban sa ONE Championship sa isang closed-door arena sa Bangkok, Thailand.
Halos hindi pinagpawisan si Denice nang pasukuin niya ang kalabang si Watsapinya “Dream Girl” Kaewkhong sa unang round ng kanilang bakbakan.
Samantala, pinatulog naman ni Drex ang kanyang kalabang si Detchadin Sorsirisuphathin sa kanilang flyweight bout.
Dahil dito, may karapatan na si Denice para hamunin ang kasalukuyang atomweight champion na si Angela Lim na atat na ring makasagupa ang naturang Pinay.
![PANDI BULACAN]](https://www.dwiz882am.com/wp-content/uploads/2019/09/PANDI-BULACAN.png)
Naghain ng reklamo sa Office of the Ombudsman ang Kalipunan ng Damayang Mahihirap (Kadamay) laban sa ilang pulis sa Pandi, Bulacan dahil sa umano’y pangha-harass sa kanila.
Ayon sa grupo, mga kasong robbery, gross misconduct, conduct unbecoming of a public official, at conduct prejudicial to the best interest of the service ang isinampa nila laban sa mga hindi pinangalanang opisyal ng Pandi Police.
Nag-ugat ang reklamo sa ginawang pagsalakay ng pulisya sa opisina ng pahayagang Pinoy Weekly kung saan kinumpiska rin ng mga ito ang ilang kopya ng diyaryo bunsod ng umano’y pagiging “subversive” nito.
Maliban dito, sinasabing pinaratangan din ng mga pulis ang Pinoy Weekly na “illegal” at tinuturuan ang mga tao para kalabanin ang gobyerno.
Natagpuang wala nang buhay ang isang Philippine Coast Guard (PCG) officer na dating nagpositibo sa COVID-19 sa Manila Bay malapit sa Pier 13 sa Port Area, Maynila.
Batay sa initial findings, walang nakitang foul play sa pagkamatay ni Petty Officer Second Class Richard Gonzales na nakatalaga sa BRP Corregidor (AE-891).
Sinasabing ayon imbestigasyon ng Coast Guard Surface Support Force Investigation Team at Manila Police District (MPD) Homicide Section, nadiskubre na bago nakitang patay si Gonzales ay nakakaranas ito ng problemang personal at pinansiyal.
Bagama’t nagpositibo sa COVID-19 si Gonzales, lumitaw naman sa resulta ng kanyang RT-PCR test noong August 23 na ligtas na ito sa impeksiyon.