Ipinagmalaki ng Department of Transportation (DOTr) na flood-proof o hindi kayang sirain ng baha ang Metro Manila Subway.
Ayon kay DOTr Secretary Arthur Tugade, may karanasan sa mga bahaing lugar ang JIM Technology Corporation (JIMT) na isa sa mga Japanese contractors para sa proyekto.
Dagdag ni Tugade, mas matindi pa ang ginawa ng mga kontraktor sa Japan dahil kinailangan pa nilang ibaon ang mga tunnel hanggang sa ilalim ng dagat kung saan hanggang ngayon ay hindi ito binabaha.
Nasungkit ng nag-iisang bettor mula sa San Fernando, La Union ang P49 million na jackpot prize sa Lotto 6/42 draw.
Ayon kay PCSO general manager Royina Garma, ang hindi pinangalanang mananaya ang kauna-unahang jackpot winner mula nang magbalik-operasyon ang lotto.
Natumbok ng masuwerteng bettor ang winning number combination na 03-11-06-19-33-10.
Matatandaang inanunsiyo ng PCSO na balik-operasyon na ang ilan sa mga sangay nila sa mga lugar na nasa ilalim ng general community quarantine (GCQ) at modified general community quarantine.
Sumirit na sa 10,113 ang bilang ng mga Pinoy na dinapuan ng COVID-19 sa labas ng bansa matapos maitala ang 18 bagong impeksiyon.
Ayon sa Department of Foreign Affairs (DFA), pumalo na sa 6,275 ang kabuuang bilang ng mga nakarekober kasunod ng paggaling ng 55 Pinoy broad.
Samantala, nananatili sa mahigit anim na raan ang death toll sa hanay ng mga Pinoy sa ibayong dagat dahil wala namang nadagdag sa naturang listahan.
Kinontra ng isang dating opisyal ng Parish Pastoral Council for Responsible Voting (PPCRV) ang panawagan ng mga lokal na pamahalaan sa Metro Manila na ipagpaliban ang kasalukuyang voter registration.
Ayon kay dating PPCRV National Chairperson Henrietta de Villa, hindi dapat i-postpone ang pagpaparehistro ng mga botante dahil importante ito sa electoral process habang hindi rin tiyak kung kailan matatapos ang pandemyang dulot ng COVID-19.
Una nang ipinanawagan ng ilang alkalde na dapat huwag munang ituloy ang voter registration hangga’t hindi pa nailalagay sa ilalim ng modified general community quarantine (MGCQ) ang rehiyon.
Ngunit giit ni De Villa, sapat na naman ang ipinatutupad na health safety measures ng Commission on Elections (COMELEC) sa mga registration centers bilang bahagi ng pag-iingat laban sa coronavirus.
Kapwa nakatanggap ng parangal ang dalawang overseas Filipino workers (OFW’s) sa Taiwan dahil sa kanilang dedikasyon at kasipagan sa kabila ng coronavirus disease 2019 (COVID-19) pandemic.
Ayon sa Department of Labor and Employment (DOLE), ang factory worker na si Evelyn Kaguitla at caregiver na si Amelia Comilang ay binigyan ng pagkilala ni Taipei City Mayor Hou You-Yi sa taunang “Search for Outstanding Migrant Workers” ng Labor Affairs Department for exemplary workers ng lungsod.
Sinasabing ang dalawa ay parehong nakatanggap ng tropeo at cash prize mula sa lokal na pamahalaan.
Si Kaguitla ay isang trainer at nagtaguyod ng pagbabago sa kanilang kompanya habang nagpamalas din ng kasipagan at dedikasyon si Comilang sa pag-aalaga sa lola ng kanyang employer na mayroong dementia.
Dinagsa ng mga mamimili ang “bagsakan” o bazaar na inilatag ng Department of Trade and Industry (DTI) sa isang mall sa Alabang, Muntinlupa.
Ayon sa DTI, ang inisyatiba ay pinangunahan ng Bureau of Domestic Trade Promotion (BDTP) upang matulungan ang mga maliliit na nagosyante sa pagpo-promote ng kanilang mga produkto ngayong panahon ng pandemya.
Matatandaang dahil sa krisis ay maraming negosyo ang nagsara at nalugi.
Nadagdagan ng 3,714 ang bilang ng mga tinamaan ng COVID-19 sa Pilipinas.
Dahil dito, ayon sa Department of Health (DOH), umakyat na sa 232,072 ang kabuuang bilang ng kaso ng coronavirus disease 2019 (COVID-19) sa bansa.
Sa bilang na ito, halos kalahati o 1,797 ay mula sa National Capital Region (NCR).
Umakyat naman sa 160,549 ang bilang ng mga nakarekober kasunod ng paggaling ng 1,088 na mga pasyente habang sumirit na sa 3,737 ang death toll matapos pumanaw ang 49 pang COVID-19 patients.
Nagbalik-loob sa pamahalaan ang 66 miyembro at mga tagasuporta ng Communist Party of the Philippines-New People’s Army (CPP-NPA) sa Magsaysay, Misamis Oriental.
Ang mass surrender ay pinangunahan ng 23rd Infantry Battalion ng Philippine Army at Philippine National Police (PNP) at mga lokal na opisyal ng gobyerno.
Ayon sa mga dating rebelde, napagtanto nila na ginagamit lamang sila sa umano’y masasamang gawain ng NPA tulad ng terorismo at pangingikil ng pera sa kanayunan.
Nangako naman si Magsaysay Mayor Rey Buhisan na tutulungan nilang makabangon ang mga dating local communists at bahagi aniya ito ng mga hakbangin ng pamahalaan upang matamo ang pangmatagalang kapayapaan at pag-unlad sa mga komunidad
Tatlo pang empleyado ng House of Representatives ang positibo sa coronavirus disease 2019 (COVID-19).
Ayon kay House Secretary General Jose Luis Montales, dahil dito’y sumirit na sa 13 ang bilang ng mga dinapuan ng coronavirus sa Kongreso.
Sinabi ni Montales na ang isa sa mga nagpositibo ay nakatalaga sa Transportation Service at pumasok pa sa trabaho noong Agosto 24 at 25.
Bunsod nito, patuloy ang ginagawang contact tracing ng Kamara upang matunton ang mga nakasalamuha ng mga nabanggit na empleyado.
Lima ang nasawi habang maraming iba pa ang nawawala matapos ma-trap sa gumuhong restaurant sa China.
Ayon sa ulat, ang dalawang palapag na gusali ay madalas pagdarausan ng mga piging sa Xiangfen county sa probinsya ng Shanxi.
Sinasabing 33 katao na ang nailigtas mula sa guho kung saan bukod sa mga nasawi ay may isa pang malubhang nasugatan.
Nagpapatuloy ang rescue operation at imbestigasyon sa nasabing insidente.