DWIZ 882

May hawak na ang Philippine National Police (PNP)  ng mas malinaw na larawan ng mukha ng suspek sa pagpatay sa brodkaster na si Percy Lapid.

Ayon kay Southern Police District, District Director for Operations of Metro Manila, Pol. Col. Restituto Arcangel, may hawak na silang malinaw na anggulo ng isa sa motorcycle-riding men na sangkot sa pagpatay kay Lapid.

Nakuha ito ng mga otoridad matapos pagsama-samahin at suriin ang lahat ng CCTV footage sa lugar.

Kahit aniya nakasuot ng face mask ang bumaril kay lapid, sinabi ni arcangel na nalalaman pa rin nila ang buong bahagi ng mukha nito.

Sa ngayon, pagtitiyak ni Arcangel na nasa proseso pa sila ng pagkilala sa mga suspek sa pamamagitan ng pagsuri sa CCTV at dashboard ng camera sa sasakyan ng mamamahayag.

Isinasapinal na ni Vice President Sara Duterte ang kaniyang ulat para sa ika-100 araw na panunungkulan bilang pangalawang pangulo ng bansa.

Ito ang sinabi ni VP Sara sa media interview nito sa Bangued, Abra.

Ayon kay VP Sara, magpapasa rin siya ng ulat sa opisina ng pangulo bilang kalihim ng Department of Education.

Nabatid na maliban dito, ang Office of the Vice President din ay naghahandog ng medical at burial assistance sa publiko.

Nagdeploy din ito ng limang bus bilang inisyatibo para sa ‘libreng sakay’ program sa Metro Manila, Davao City, Cebu at Bacolod.

Nakakuha ng mataas na approval rating ang administrasyon ni Pangulong Ferdinand ‘Bongbong’ Marcos Jr.  sa pagtugon sa mga pangunahing isyu sa bansa.

Sa ulat ng bayan survey na ginawa ng pulse asia noong September 17 hanggang 21 na nilahukan ng 1,200 respondents na inilabas ngayong araw, lumabas na 11 sa  13  isyu sa Pilipinas ang maayos na napangasiwaan ng administrasyong Marcos.

Pinakamataas dito ang pagtugon ng gobyerno sa pangangailangan ng mga lugar na nasalanta ng bagyo na nakakuha ng 78% approval at 3 % disapproval.

78% approval naman ang nakuha ng administrasyon sa pagkontrol sa COVID-19 pandemic; 68 % sa pagtaguyod ng kapakanan ng mga ofws; 69 % sa pagpapanatili ng kapayapaan; 67 % sa paglaban sa krimen; at 62 %  sa pagpapatupad ng batas.

Sa pagbuo naman ng trabaho sa mga Pilipino, nakakuha ang administrasyon ng 59 %  approval; 59 % din sa pagtaas ng sahod; 58 % sa paglaban sa graft and corruption; 57 %  sa pagprotekta sa kapaligiran at 52 %  sa pagtatanggol sa integridad ng teritoryo ng bansa.

Samantala, 42 % disapproval naman ang nakuha ng administrasyong marcos sa pagkontrol sa inflation rate o bilis ng pagtaas ng presyo ng bilihin at 35 % sa kahirapan.

Inanunsiyo na ng PAGASA ang pagtatapos ng Southwest Monsoon o habagat season sa Pilipinas.

Ayon sa PAGASA, nalulusaw ang habagat tuwing unang linggo ng Oktubre na senyales na patungo na ang bansa sa amihan season.

Noong 2020, november 6 nang ideklara ng pagasa ang pag-iral ng amihan.

Matatandaang una rito, sinabi ng pagasa papalo sa anim hanggang 10 bagyo ang papasok sa Pilipinas bago mata

Pinaplano ng Metropolitan Manila Development Authority (MMDA) na palawakin ang sakop ng daanan ng mga pasahero sa EDSA Busway.

Ayon kay Mel Carunungan, tagapagsalita ngMMDA, nais ni MMDA chairperson Carlo Dimayuga III na maging maayos ang daanan ng mga pasahero papasok at palabas ng busway.

Ito ay para hindi gaanong magsiksikan ang mananakay lalo na kapag rush hour.

Ang mga nakikitang solusyon ng mmda sa plano ay bawasan ang daanan ng mga bus at magtayo ng tulay at footbridge sa mga pasahero.

Samantala, ikinokonsidera din ng mmda na magtayo ng comfort rooms sa mga bus stops para maging komportable ang mga mananakay.

Tiniyak ng Commission on Elections (COMELEC) na mareresolba nila ngayong 2022 ang lahat ng petisyon na kanilang natanggap kaugnay noong 2022 national at local elections.

Ayon kay COMELEC Spokesperson John Rex Laudiangco, nilalaman ng petisyon ang inihaing disqualification cases at petisyon ikansela ang Certificates of Candidacy (COC) ng mga kandidato.

Binigyang-diin pa ng comelec ang kanilang commitment na tapusin ang mga naipong petisyon para ma-settle na ang isyu ng mga nakaupong kandidato.

Samantala, tiniyak din ni laudiangco na de-desisyunan na nila ang labing-pitong vote-buying cases na inihain laban sa iba’t ibang kandidato noong halalan.

Binuksan na ng Land Transportation Franchising and Regulatory Board (LTFRB) sa Metro Manila ang online application ng fare matrix para sa mga driver at operators.

Ito ay matapos maging epektibo noong lunes ang taas-pasahe sa mga pampublikong sasakyan ngunit hindi maaaring ipatupad kung wala pang nakapaskil na taripa sa loob ng sasakyan.

Para makakuha ng aplikasyon, ia-upload sa LTFRB website ang mga kailangang dokumento tulad ng or/cr ng unit at Certificate of Public Convenience o prangkisa.

Online din ang pagbayad ng taripa.

Kapag online ipinroseso ang fare matrix, imbes na dry seal ay qr code ang inilalagay.

Susunod na gagawin ng ltfrb ncr na iimprenta ito para sa mga pirma at ia-upload para ang mismong aplikante na ang magpi-print.

Sa apat na unit o pababa, kakayanin nang isang araw ang pagkuha ng taripa.

Pero kung consolidated o higit sampung unit pataas ay inaabot ng dalawang araw hanggang isang linggo.

Ipinaalala ng Philippine Institute of Volcanology and Seismology (PHIVOLCS )na nananatili pa rin ang banta ng panganib sa bulkang Mayon.

Ito ay matapos makapagtala lamang ang bulkan ng isang pagyanig sa nakalipas sa 24 oras.

Ayon sa PHIVOLCS, bagaman isang pagyanig ang naitala sa bulkan ay higit itong mapanganib lalo na sa paanan.

Binabantayan din ng PHIVOLCS ang maninila channel sa barangay San Francisco at karatig-barangay sa bayan ng Guinobatan.

Sa ngayon, hindi masyadong nakikita ang tuktok ng bulkan, dahil maulap pa rin sa bisinidad nito dala ng panaka-nakang pag-ulan sa lugar.

Samantala, mahigpit ding binabantayan ng PHIVOLCS ang lava dome na patuloy na lumalaki at tumataas.

Paalala pa ng phivolcs, patuloy na iwasan ang 6 km radius permanent danger zone ng bulkan.