DWIZ 882

Suportado ng mayorya ng mga Pilipino ang pag-amyenda sa economic provision ng saligang batas.

Ayon sa Tangere survey, 62.9% ng mga Pilipino ang pabor sa economic chacha o katumbas ng pito mula sa sampung respondents, mas mataas sa 62.4% noong nakaraang buwan.

75% ng respondents ang naniniwalang magdadala ito ng mas maraming trabaho  at magpababa sa presyo ng mga bilihin at serbisyo; 73% ang umaasang magpapataas ito sa sahod at benepisyo sa trabaho habang 72% naman ang tiwalang magpapaunlad ito sa ekonomiya,

Nagmula ang positibong pananaw kaugnay sa chacha sa mga respondent mula sa Northern Luzon, Central Luzon at Visayas habang taliwas naman dito ang pananaw ng repondents mula sa Mindanao at Southern Luzon.

Handa ang 82% ng mga Pilipino o katumbas ng walo sa kada sampu katao na depensahan ang Pilipinas at teritoryo nito mula sa mga dayuhan.

Ayon kay Army Chief Lieutenant General Roy Galido, bukod sa development sa modernization capabilities ng hukbo, pinaghuhusay rin nito ang disiplina at propesyalismo ng kanilang hanay.

Una nang inanunsyo ni Lieutenant General Galido ang planong pagbili ng us typhon missile system, o mas kilalang mid-range capability system, para ma-protektahan ang maritime territories ng Pilipinas.

Una nang lumabas sa tugon ng masa survey na 75 percent ng mga Pilipino ang nagtitiwala sa kakayahan ng Philippine Army habang 76% naman ang kuntento sa performance ng mga ito. –  Sa panulat ni Laica Cuevas

Maayos na kalusugan, pinaka-ipinagpapasalamat ng mga Pilipino – SWS

Katulad ng mga nakalipas na taon, maayos na kalusugan pa rin ang pinaka ipinagpapasalamat ng mga Pilipino ngayong holiday season.

Sa resulta ng Social Weather Station survey, 47% ng mga Pilipino ang nagsabing thankful sila para sa good health, bahagyang mas mababa sa naitalang 51% noong 2023.

Bukod dito, ipinagpapasalamat din ng mga Pilipino ang kanilang pamilya, buhay, trabaho at income, ang diyos, at pagkakaroon ng pagkain.

Isang porsyento o mas mababa naman dito ang nagsabing thankful sila sa natatanggap na financial support, pagkakaibigan, love life o asawa, bahay at pagkakaroon ng materyal na bagay tulad ng sasakyan.

Kinalampag ng Commission on Audit ang labing limang ahensya ng pamahalaan at 34 na state universities and colleges dahil sa naantala at palyado nitong mga infrastracture projects noong 2023.

Sa audit report ng COA, nakita na nagkakahalaga ang mga proyekto ng national government agencies ng mahigit 239 billion pesos habang ang sa SUCs naman ng 2.37 billion pesos.

Sinasabing hindi nasunod ang plano para sa mga proyekto dahil sa poor planning, kakulangan sa monitoring, hindi pagsunod sa mga kontrata, mahabang procurement process at kakulangan ng koordinasyon sa local government units at iba pang kinauukulang ahensya.

Tinukoy ang DPWH bilang pinakaresponsable sa mga naantala at mga hindi naipatupad na proyekto na nagkakahalaga ng mahigit 131 billion pesos.

Bukod dito, lumabas din ang palyadong mga proyekto ng DOTR-Office of the Secretary; Land Transportation Office;  Department of Health at  Philippine National Police.

Ipinag-utos na ng Commission on Audit sa Department of Public Works and Highways ang agarang pagsu-sumite ng mga dokumento nito kaugnay sa ginastang 20.3 billion pesos noong 2023.

Ayon sa COA audit report, iba’t ibang DPWH offices ang nakinabang sa mahigit 20.3 billion pesos kung saan mahigit siyam na bilyong piso ay napunta sa Cordillera Administrative Region para sa mga infrastracture projects.

Pangalawa sa may pinakamalaking nakuha sa nasabing halaga ang DPWH-Region 5 na mayroong limang bilyong piso na sinasabing ginamit para sa paggawa ng mahigit limampung proyekto.

Binatikos ng COA ang mga nasabing transakyon dahil sa kawalan ng tama at kumpletong mga dokumento tulad ng backup computation, delivery receipt, official receipt at iba pang certification at permits. –  Sa panualt ni Laica Cuevas

Ipinanawagan ng mga retiradong opisyal ng Armed Forces of the Philippines at Philippine National Police kay Pangulong Ferdinand Marcos Jr. na ibalik sa Bicameral Conference Committee ang inaprubahang 2025 general appropriations bill.

Sa open letter ng mga ito kasama ang iba pang organisasyon, iginiit ng grupo ang hindi makatwirang pagdagdag sa budget ng senado sa mahigit 13.9 billion pesos mula sa inisyal na 12.8 billion pesos gayundin ang budget ng kamara sa 33.6 billion pesos sa mula unang alokasyon na 16.3 billion pesos.

Kinuwestyon din ng mga ito na binubuo ng mahigit 190 indibidwal ang pagdagdag sa pondo ng DPWH at pagbabalik sa akap fund na una nang tinanggal ng senado.

Kabilang anila sa mga mahihirapang ahensya dahil sa pagtapyas ng pondo ang Departments of Agriculture, Education, Health, Labor and Empolyment at Social Welfare and Development.

Binigyang-diin ng grupo na ang pagdaragdag sa pondo ng Kongreso, DPWH at iba pang item na hindi naman tunay na kailangan ay isang malinaw na paglabag sa prinsipyo ng pagkakapantay-pantay at maayos na pamamahala.

Tiniyak ng Department of Public Works and Highways sa mga motorista na nananatiling ligtas daanan ang Biliran Bridge na nagdurugtong sa Biliran at Leyte provinces.

Sa kabila ito ng viral video sa social media ng paggalaw ng tulay na animo’y duyan.

Ayon kay DPWH-8 District Engineer Irwin Antonio, maaaring edited ang video na lumabas sa social media na nagdulot ng takot sa mga dumaraang motorista.

Ipinaliwanag ni Antonio na idinisenyo ang tulay na umuugoy upang kayanin nito ang impact ng bigat ng mga dumaraang sasakyan.

Ang malaking volume anya ng traffic noong lunes ang posibleng dahilan ng pag-ugoy ng Biliran Bridge.

Sa kabila nito, nagdeploy ang DPWH ng mga personnel upang silipin ang structural integrity ng nasabing tulay.   Sa panulat ni Kat Gonzales

 Itinuturing ng House Quinta Committee bilang pangmatagalang solusyon ang sektor ng irigasyon sa bansa.

Ayon kay Albay Rep. Joey Salceda, overall chairman ng Komite, kanilang tututukan ang irrigation system sa pagbabalik ng sesyon sa Kamara.

Kumpiyansa ang lider ng Komite, na ang naturang sektor ang tutugon sa pagpapababa ng presyo ng bigas sa merkado.

Ipinunto pa ng kongresista na, kailangang mapataas ang pagtatanim ng palay sa bansa na magreresulta sa mas maraming suplay o produksiyon tungo sa abot-kayang presyo ng bigas.

Matatandaang sa pinakahuling pagdinig ng murang pagkain super committee, natukoy na singkwenta sentimos lamang ang ibinaba sa presyo ng bigas matapos ibaba ang taripa sa imported rice. –  Sa panulat ni  Kat Gonzales

Isinapubliko na ng Senado ang expenditure report nito simula January 1 hanggang December 31, 2023.

Aabot sa 3.2 billion pesos ang kabuuang bayarin at gastusin ng Mataas na Kapulungan ng Kongreso at nagkakaiba-iba lamang depende sa paggugol ng bawat opisina ng mga senador.

Batay sa report, pinakamatipid si Senator Mark Villar na gumastos lamang ng mahigit 96 million pesos habang pinakamalaki ang ginastos ni dating senate president Juan Miguel Zubiri na mahigit 164 million pesos.

Saklaw ng report ang extraordinary and miscellaneous expenses, mga byahe, sweldo at benepisyo ng kanilang mga staff, meetings at conferences, professional o consultancy fees, supplies, materials at iba pa.

Kabilang sa tinukoy na posibleng dahilan ng paglobo ng gastos ni Zubiri ay ang laki ng demands at responsibilidad sa kanya lalo’t ito ang senate president noong isang taon.

Sumunod naman si Senate Minority Leader Koko Pimentel, 161.94 million pesos; Senator Joel Villanueva, 154.79 million; Senate Majority Leader Francis Tolentino, 150.2 million; Senator Ronald “Bato” Dela Rosa, 144.4 million pesos at Senate President Chiz Escudero, 116.8 million pesos. –  Mula sa ulat ni Cely-Ortega-Bueno (Patrol 19)

Magsisimula na sa susunod na taon, buwan ng Enero ang pag-i-imprenta ng mga balota para sa kauna-unahang parliament polls.

Ito’y sa kabila ng nakabinbing panukala na ipagpaliban ang Bangsamoro Autonomous Region in Muslim Mindanao Parliamentary Elections.

Ayon kay COMELEC Chairman George Erwin Garcia na sisimulan na nila ang pag-iimprenta ng mga balota sa Enero a-6.

Kasabay na rin aniya ang pag-imprenta ng mga opisyal na balota para sa 2024 National and Local Elections sa National Printing Office sa Quezon City.

Sa ilalim ng panukalang batas, ililipat ang Bangsamoro Elections makalipas ang isang taon o mula May 12, 2025 sa May 11, 2026.

Samantala, nagsagawa ang COMELEC ng “trusted build” Ng mga programa para sa automated election system (AES) na gagamitin sa darating na eleksyon.

Ang “trusted build” ay proseso ng pag-assemble ng pangkalahatang programa na mamamahala sa buong AES gamit ang mga nasuring bahagi. –  Sa panulat ni Jeraline Doinog