DWIZ 882

Muling kinwestyon ni Senate Minority Leader Aquilino ‘Koko’ Pimentel III, ang bagong polymer banknotes na inilabas ng Bangko Sentral ng Pilipinas.

Ayon sa senador, nangangahulugan lamang ito ng bagong kontrata na nagkakahalaga ng bilyung-bilyong piso, at pagiging dependent sa polymer ng australia sa halip na paggamit ng abaca ng Pilipinas.

Igniit din ng Mambabatas na nang ilabas ang 1,000 polymer bank notes noong 2022, sinabing pag-aaralan lamang ito, ngunit hanggang ngayon ay hindi pa natutukoy ang resulta ng nasabing pag-aaral. 

Kaugnay nito, nais ng Senador na magkasa ng pagdinig ang Senate Committee on Banks dahil  bagama’t hindi aniya humihingi ng budget ang BSP sa ilalim ng General Appropriations Act, dapat nitong ipaliwanag ang mga pagpapalit ng  pera sa polymer version. - Sa panulat ni Laica Cuevas

Makabibili na ang mas maraming Pilipino ng 40 pesos kada kilo ng well-milled rice matapos magdagdag ang Department of Agriculture ng Kadiwa ng Pangulo Rice  sa apat  pang pampublikong palengke sa Metro Manila sa ilalim ng rice-for-all program.

Ayon sa D.A., nagsimula nang magbenta ng murang bigas sa apat na palengke, sa Dagat-Dagatan, Caloocan; Phase 9 Bagong Silang Market, Caloocan; Cloverleaf Market, Balintawak, Quezon City; at New Marulas Public Market sa Valenzuela City.

Binigyang-diin ni Agriculture Secretary Francisco Tiu Laurel Jr., na mahalaga ang nasabing hakbangin alinsunod na rin sa pangako ng pamahalaan na gawing abot-kaya ang bigas sa pamilyang Pilipino.

Bukas ang mga nasabing Kadiwa Store mula alas-kwatro ng umaga  hanggang ala-sais ng gabi sa buong holiday season maliban lamang sa December 24-25 at 30 at sa January 1, 2025.   Sa panulat ni Alyssa Quevedo

Nanawagan si Senate Minority Leader Aquilino “Koko” Pimentel III sa Department of Trade and Industry (DTI) na tiyaking tama ang presyo ng mga Noche Buena goods.

Binigyang-diin ni Sen. Pimentel na hindi dapat pagsamantalahan ng mga may-ari ng negosyo ang panahon ng Pasko para magtaas ng presyo sa iba’t ibang bilihin, kabilang ang keso, macaroni, spaghetti sauce, fruit cocktail, all-purpose cream, ham, at iba pang produktong Noche Buena.

Hinimok pa ni Pimentel ang DTI na pahusayin ang kanilang monitoring efforts laban sa mga kumpanyang sangkot sa manipulasyon ng presyo.

Ayon sa senador, hindi dapat makatakas sa pananagutan ang mga negosyong nag-iimbak ng mga stock o nagsasagawa ng pagtaas ng presyo—lalo na tuwing Pasko.

Gagamitin ng Department of Justice ang report ng quad Committee ng Kamara, para pagtibayin ang mga ebidensya at kaso laban sa mga dawit sa extrajudicial killings sa war on drugs campaign ni dating pangulong Rodrigo Duterte.

Ayon kay Justice Undersecretary Jesse Andres, bago pa man matapos ang Quad Comm Report ay bumuo na sila ng task force sa National Prosecution Service, upang tutukan ang imbestigasyon sa ejks at marami na silang nakalap na ebidensya.

Kaugnay nito, malaking tulong aniya ang imbestigasyon ng kamara lalo na ang pagpapatawag sa mahahalagang resource persons kung saan maraming naisiwalat at mga pag-amin na maaaring maging “self-incriminating.”

Nakikipagtulungan na rin aniya ang NBI at PNP upang mapalakas pa ang ebidensya.

Maaalalang inirekomenda na ng Quad Comm ang pagsasampa ng kasong Crimes Against Humanity laban kay dating pangulong Duterte at iba pang personalidad kaugnay ng EJKs at sinasabing reward system sa war on drugs. – Mula sa ulat ni gilbert Perdez (Patrol 13)

Pinaboran ng Pilipinas ang resolusyon ng united Nations General Assembly na nagbabawal sa parusang kamatayan sa buong mundo.

Kabilang ang Pilipinas sa 130 mga bansa na pumabor sa global moratorium sa death penalty; kung saan 32 ang kumontra, habang 22 iba pa ang nag-abstain.

Inihayag sa resolusyon ang matinding alalahanin patungkol sa pagpapataw ng parusang kamatayan at muling pinagtibay ang karapatan ng lahat ng mga bansa na bumuo ng sariling batas.

Nanawagan din ito sa lahat ng mga bansa na magtatag ng moratorium sa mga pagbitay, anuman ang kanilang mga sistemang pampulitika, pang-ekonomiya at kultura.

Ang Pilipinas ang unang bansa sa asya na nagpawalang-bisa ng parusang kamatayan sa ilalim ng 1987 constitution. - Sa panulat ni Laica Cuevas 

Naniniwala si Senator Imee Marcos na duda ang kapatid niyang si Pangulong Ferdinand Marcos Jr. sa laman ng niratipikahang budget ng Bicameral Conference Committee para sa susunod na taon.

Ito, anya, ang posibleng dahilan sa pagpapaliban ni pbbm na lagdaan ang panukalang pambansang budget, kung saan nawala ang mga prayoridad ng administrasyon.

Tahasan ding tinawag ni Super Ate na ‘very very bad’ at labag sa konstitusyon ang proposed 2025 national budget.

Muli ring umapela si Senador Marcos na ibalik ito sa bicam upang mabusising maigi at maalis ang mga areglo, imbes na idaan lamang sa veto power ng Pangulo.

Aminado rin ang mambabatas na kinakabahan siya sa tila mali-maling ipinapayo sa kanyang kapatid, kaya’t panawagan niya sa mga taga-palasyo na huwag ipahamak ang Presidente.

Alam naman aniya ni Executive Secretary Lucas Bersamin na nakasaad sa article 14, section 5 ng 1987 constitution na sa edukasyon dapat nakalaan ang pinakamataas na budget. –  Sa panulat ni john Riz Calata 

Nakapagtala ng mahigit 1,000 kaso ng tuberculosis na-diagnose   sa Tondo, Maynila.

Ito’y matapos maglunsad ng tuberculosis project sa Tondo ang Doctors Without Borders, sa pakikipagtulungan ng Manila Health Department (MHD), upang tugunan ang mga hamon sa screening at paggamot ng TB pagkatapos ng COVID-19 pandemic.

Ayon sa grupo, nakapag-screen sila ng 29,291 katao at na-diagnose ang 1,280 na pasyente na may TB sa nasabing lugar.

Nagsimula namang magbigay ng mga gamot sa TB ang DWB para sa 141 na mga pasyente sa Tondo noong Agosto.

Batay sa 2024 Global TB Report ng World Health Organization, mayroong 739,000 katao sa bansa ang nagkasakit ng TB.

 Paalala sa mga magle-leche flan o anumang paghimagas na may halong itlog ngayong holiday season.

Dahil ayon sa Philippine Egg Board Association, asahan na ang pagtaas ng presyo ng itlog habang papalapit ang pasko at bagong taon.

Sa datos ng Department of Agriculture, nasa 6 pesos hanggang 8.25 pesos ang presyo ng extra small na itlog habang nasa siyam hanggang sampung piso ang jumbo o ang pinakamalaki.

Naglalaro naman ang kada tray ng itlog sa 210 hanggang 285 pesos depende sa sukat habang bahagya namang mas mahal ang presyo ng brown eggs.  – Sa panulat ni Laica Cuevas

Pinasimple na ng Department of Social Welfare and Development ang mga panuntunan nito para sa mga target beneficiaries sa ilalim ng Ayuda sa kapos ang Kita Program (AKAP) kabilang na ang low income at minimum wage earners.

Ayon kay DSWD Spokesperson at Assistant Secretary Irene Dumlao, nakasaad ang pinasimpleng guidelines ng akap sa memorandum circular no. 30 series of 2024 na nilagdaan ni DSWD Secretary Rex Gatchalian.

Sa ilalim nito ay ginawang mas inklusibo ang pagpapatupad ng programa upang masakop ang mga pilipinong bahagi ng formal at informal economy.

Dito ay pinadali ang documentary requirements para sa mas sistematikong proseso ng pagrepaso at pag-verify sa pagiging kwalipikado ng mga benepisyaryo ng programa.

Kabilang sa mga ibinibigay na tulong sa ilalim ng akap ang medical, funeral, food at cash assistance na direktang ibinibigay sa pamamagitan ng Crisis Intervention Units o sections sa Central at Field Offices ng DSWD at sa pamamagitan ng Social Welfare and Development at Satellite Offices nito sa buong bansa. – Sa panulat ni Laica Cuevas