DWIZ 882

Arestado sa operasyon ng National Bureau of Investigation ang anim katao na sinasabing gumagamit sa pangalan ni First Lady Liza Araneta-Marcos upang magbenta ng posisyon sa BARMM.

Nag-ugat ang operasyon matapos magsumbong ni  dating Maguindanao governor Esmael Mangudadatu sa mga kinauukulan na siya ay inalok ng isa sa mga suspek ng posisyon para sa barmm parliamentary government sa halagang walong milyong piso.

Kaugnay nito, nilinaw ni NBI Director Jaime Santiago na walang kaugnayan sa Malacañang ang mga naturang suspek na gumamit ng pangalan ng Unang Ginang. – Sa panulat ni John Riz Calata

Lalarga na sa darating na Martes ang taas-presyo sa mga produktong petrolyo.

Ayon sa Department of Energy, magtataas ng P0.40-P0.50 ang presyo ng kada litro ng diesel; P0.70-P0.80 naman sa kada litro ng kerosene;

Habang P0.40-P0.70 sa kada litro ng gasolina.

Paliwanag ng energy-oil industry management bureau Assistant Director Rodela Romero, ang isa sa mga dahilan ng paggalaw ng presyo ng oil products ay ang nagpapatuloy na geopolitical risks at trade tensions sa ilang mga bansa. - sa panulat ni John Riz Calata

Mas hihigpitan pa ng pamahalaan ang paglalabas ng pondo sa ilalim ng 2025 national budget.

Ito ang tiniyak ni Budget Undersecretary Goddess Hope Libiran, kasabay ng pagsasabing ilalabas lamang ng pamahalaan ang mga dagdag na alokasyon at mga bagong budgetary items na kasama sa 2025 national budget kapag nakasunod ang mga kaukulang ahensya sa mga kinakailangang dokumento.

Ayon kay Usec. Libiran, ang prosesong ito ay tinatawag na ‘for issuance of special allotment release order’ o FISARO na isang authorization document para sa alokasyon at paggamit ng pampublikong pondo para sa iba’t ibang proyekto at programa ng gobyerno.

Dagdag pa ng DBM official, ang direktibang ito ay nakasaad sa Section 6 ng veto message ni Pangulong Ferdinand Marcos Jr., na nagbibigay-diin sa maingat na pamamahala ng pondo at pagsunod sa mga prayoridad ng gobyerno.

Binigyang-diin ni Usec. Libiran na ang anumang pagbabago sa mga appropriations ay dapat nakaayon sa mga prayoridad ng pangulo. - sa panulat ni John Riz Calata

Sinibak na ni Pangulong Ferdinand Marcos Jr. si Vice President Sara Duterte at mga dating pangulo bilang mga kasapi ng National Security Council.

Alinsunod sa Executive Order No. 81, magsisilbing chairperson ng NSC ang presidente habang magiging miyembro nito ang Senate President, House Speaker at iba pang mga opisyal ng gobyerno.

Batay sa nasabing kautusan, maaari ring magtalaga ang pangulo ng iba pang mga opisyal ng gobyerno bilang kasapi ng NSC, maging ang mga private citizen.

Kasama naman sa Executive Committee ng NSC ang Pangulo bilang Chairperson, habang miyembro rin ang Executive Secretary, Senate President o kinatawan nito, House Speaker o kinatawan nito, at iba pang mga government officials.

Kaugnay nito, inatasan ng Pangulo ang Director-General ng National Intelligence Coordinating Agency, Chief of Staff ng Armed Forces of the Philippines, at mga hepe ng Philippine National Police, at National Bureau of Investigation na dumalo sa mga pagpupulong ng council at umasiste sa mga deliberasyon.

Maaari ring imbitahan ang gobernador ng Bangko Sentral ng Pilipinas upang sumali sa mga pagpupulong ng konseho. - sa panulat ni John Riz Calata

Inaasahan na muling babangon ang sektor ng agrikultura ngayong 2025.

Ito ayon sa Department of Agriculture ay kasunod ng mababang produksyon noong nakaraang taon dahil sa epekto ng El Niño at La Niña.

Sinabi ng ahensya, bagama’t nakikitang magpapatuloy pa rin ang La Niña hanggang sa 1st quarter ng taon, inaasahang pa rin nito na aabot muli sa 20 metric tons ang produksyon ng palay ngayong taon, katulad ng naitala noong 2023.

Nabatid na ibinaba sa 19.41 million metric tons ang estimate na palay output para sa taong 2024 dahil sa pinsalang dulot ng mga kalamidad. - sa panulat ni John Riz Calata

Sisimulan nang bawiin ng Office of the Solicitor General ang mga ari-ariang iligal na nakuha ng mga dayuhang sangkot sa pogo at kanselasyon ng kanilang mga illegal birth certificates.

Ayon kay Solicitor General Menardo Guevarra, ito ay bilang pagtalima sa direktiba ni Pangulong Ferdinand Marcos Jr. na total POGO ban sa bansa.

Aminado naman ang OSG na kailangan nila ng tulong mula sa iba pang ahensya ng pamahalaan gayundin sa suporta ng kongreso sa pamamagitan ng mga batas para mapabilis ang operasyon.

Bagama’t wala pa anila silang tiyak na datos kaugnay sa halaga ng mga nasabing ari-arian, unang hakbang anila ay bawiin at kontrolin ang pagpapatakbo sa mga ito. –  Sa panulat ni Laica Cuevas

Ika-apat na impeachment complaint laban kay VP Sara, ihahain sa pagbabalik ng session ng Kamara.

Kinumpirma ni House Secretary General Reginald Velasco na maghahain ang ilang miyembro ng kamara ng  ika-apat na impeachment complaint laban kay Vice President Sara Duterte.

Ayon kay House Secretary General Velasco, may ilang miyembro ng kamara mula sa Majority at Minority Blocs ang humiling ng extension dahil pinag-aaralan pa nila ito.

Hindi naman pinangalanan ng House Secretary ang mga nasabing kongresista.

Nakatakda namang ihain ang ika-apat na impeachment complaint laban sa Bise Presidente sa Lunes, January 7, 2025. –  Sa panulat ni Jeraline Doinog

Nagbigay ng paliwanag ang pamahalaan sa hindi pag-imbita ng America kay Pangulong Ferdinand Marcos Jr., sa inagurasyon ni incoming US President Donald Trump.

Ayon kay  American Affairs Assistant sec. JV Gonzaga, sadyang hindi inaanyayahan ng US government ang heads of state sa inauguration ceremonies kung saan ang resident ambassadors aniya sa Washington DC ang inaasahang dadalo sa inagurasyon bilang kinatawan ng kani-kanilang mga bansa.

Gayunman, sinabi ni Gonzaga na may prerogative pa rin si Trump na imbitahan ang ilang lider at hindi pa rin aniya ito maituturing na “snub” para sa mga hindi makatatanggap ng imbitasyon.

Samantala, magsisilbing kinatawan ni Pangulong Marcos si Philippine Ambassador to the USA Jose Manuel Romualdez sa inauguration ni Trump sa January 20.  –  Sa panulat ni Jeraline Doinog mula sa ulat ni Gilbert Perdez (Patrol 13)

Naging matagumpay ang unang taon ng implementasyon ng Ayuda para sa Kapos ang Kita Program (AKAP) ng Department of Social Welfare and Development.

Ayon kay Social Welfare Spokesperson at Assistant Secretary Irene Dumlao, aabot sa halos limang milyong near-poor Filipinos ang nakinabang sa programa mula January hanggang December 2024.

Inilaan aniya ang pondo ng AKAP sa buong bansa at naabot ng halos lahat ng rehiyon ang higit sa 99% fund obligations, kung saan naitala ang 100% utilization sa regions 2, 11 at 13.

Sa ilalim ng programa, makatatanggap ang eligible beneficiaries ng cash assistance na limang libong piso, basta’t pasok ang sinasahod ng pamilya ng mga ito sa poverty threshold at hindi tumatanggap ng anumang ayuda mula sa iba pang programa ng pamahalaan.

Bukod naman sa pera, maari ring makatanggap ang mga benepisyaryo ng medical, funeral at food assistances na direktang ibinibigay sa pamamagitan ng crisis intervention units o sections ng DSWD sa central at field offices at sa pamamagitan ng social welfare and development at satellite offices nito sa buong bansa. - Sa panulat ni Laica Cuevas

Siniguro ng Philippine National Police na mananatili itong technology-driven, propesyunal at apolitical sa pagpapatupad ng  batas para sa kaayusan at kapayapaan ngayong 2025.

Ginawa ni PNP Chief Gen. Rommel Francisco Marbil ang pahayag kasunod ng pagpasok ng bagong taon.

Iginiit ni General Marbil na mahalagang makasabay ang kanilang hanay sa nagbabagong demand ng makabagong panahon.

Kaugnay nito, tiniyak din ng Hepe ng pambansang pulisya, na higit pang paghuhusayan ng PNP ang kanilang mga inisyatiba upang protektahan ang buhay, bantayan ang mga ari-arian at ipatupad ang rule of law.

Hangad naman ni Gen. Marbil na makamit ng pambansang pulisya ang isang modernong puwersa para sa mas mabilis, maaasahan, propesyunal at may kakayahang sumabay sa makabagong panahon.