DWIZ 882

Mas dumami pa ang mga Pilipino na nangungutang noong ber months.

Sa datos ng Bangko Sentral ng Pilipinas, mula sa 23.4% tumaas sa 23.6% ang mga Pinoy na nangungutang noong October 2024 panahong nalalapit ang kapaskuhan.

Tinatawag na posibleng dept-trap na ang isang indibidwal na sanay ng mangutang tuwing nagigipit dahil sa kakulangan ng income.

Gayunman, iminumungkahi ng BSP sa mga baon sa utang para makaalagwa, una na rito ang “dept stacking” Kung saan unahing bayaran ang may pinakamataas na interes; pangalawa “dept snowball” o pangalawang bayaran ang may pinakamaliit na balance o amount;

Pangatlo, “loan restructuring” o kausapin at hilingan sa bangko o lenders na gawing flexibles  at affordable ang pagbabayad ng walang penalty.

Samantala, payo ng Financial Expert maghinay-hinay sa pag-gastos at para maging dept-free ngayong 2025, mag lista ng naaayon sa life style at matutong magstick sa budget at huwag maniwala sa sinasabing “deserve ko’ ito” kapag kumikita ng malaking halaga. “discipline is a must” . - Sa panulat ni Jeraline Doinog

Tiniyak ni Senate Committee on Ways and Means Chairman Sherwin Gatchalian na pipilitan nilang maipasa ang Anti-POGO bill.

Ito ay sa kabila ng nalalapit na pagtatapos ng 19^th Congress at kawalan ng counterpart mula sa Kamara.

Sakali namang hindi makalusot, sinabi ni Senador Gatchalian na muli nilang ihahain ang panukala sa 20^th Congress.

Inaasahang mala-La Niña condition ang mararanasan hanggang sa buwan ng Marso, dahil sa madalas na pag-uulan sa bansa.

Gayunman, paglilinaw ni  Anna Solis, Head ng climate Monitoring and Prediction Section ng PAGASA, hindi pa maituturing na La Niña ang mga nararanasang mga pag-ulan.

Dahil hindi pa aniya naabot  ang threshold o pamantayan para masabing ganap na la nina na ang umiiral sa panahon.

Subalit matatawag  itong La Nina like dahil mala-La Niña aniya ang nararanasan ngayon sa gitna ng mas mataas na posibilidad ng maraming pag ulan.

Samantala, ayon pa sa PAGASA, asahan pa ang mas maraming bagyong papasok sa bansa sa unang quarter ng 2025. – Sa panulat ni Jeraline Doinog

Umapela si dating Social Security System President at CEO Rolando Macasaet sa pamahalaan para sa pansamantalang pagsuspinde sa mas mataas na contribution rates ng SSS.

Ayon kay Macasaet, may kapangyarihan ang Malacañang na suspendihin ang pagpapatupad sa republic act 11199 of the Social Security Act kung may panawagan ang SSS members na ipagpaliban muna ito.

Hindi naman aniya ito makakaapekto sa malaking fund life ng SSS dahil kumita ang ahensya ng mahigit 80 billion pesos noong 2023, at nagkaroon ng banner year na mahigit 100 billion pesos noong 2024.

Kasabay nito, nilinaw naman ng kinatawan ng SSS-GSIS Pensyonado Partylist na walang kahit isang sentimo mula sa SSS ang inilagak sa Maharlika Investment Fund kasunod ng mga usaping ang pagtaas sa kontribusyon ay para palitan ang pondong ibinigay ng ahensya sa MIF. –  Sa panulat ni Laica Cuevas

Ibinabala ng Department of Health sa mga may-ari ng botika sa bansa na mayroong karampatang parusa ang sinumang susuway sa kautusan ng ahensiya na itigil na ang paghahanap ng purchase booklets sa mga senior citizen upang makakuha ng diskwento sa mga gamot.

Sa panayam ng DWIZ, sinabi ni Health Assistant Secretary Albert Domingo na maaaring makulong at magmulta ang sinumang lalabang dito 

Binigyang-diin din ni Asec. Domingo na kahit ang mga malalaking drugstore o pharmacy ay walang lusot sa nasabing kautusan. – Sa panulat ni John Riz Calata

Iginiit ni dating Senador Franklin Drilon na hindi masama ang paglalagay ng “pork barrel” o “insertion” sa national budget.

Ayon kay Drilon, ito ay kung magagamit nang wasto ng mga mambabatas ang kaban ng bayan.

Dagdag pa ng dating Senador, kung tutuusin ay may kaakibat pa itong benepisyo para sa mga Pilipino.

Samantala, hinimok naman ni dating Senador Drilon ang Department of Budget and Management na isapubliko ang mga naging paggastos sa mga sinasabing “pork barrel” Ng mga Kongresista. – Sa panulat ni John Riz Calata

All set na ang iba’t ibang ahensya para sa tradisyunal na ‘pahalik’ sa imahen ng poong Hesus Nazareno.

Magsisimula ang ‘pahalik’ bukas araw ng Martes, Enero 7 sa Quirino Grandstand, Maynila.

Ayon kay Fr. Robert Arellano, tagapagsalita ng Nazareno 2025, bago magsimula ang “pahalik,” Isang misa muna para sa mga volunteers ng pista ng Poong Hesus Nazareno ang idaraos ngayong araw.

Ang nasabing aktibidad ay susundan ng 30 fiesta masses na gaganapin mula alas tres ng hapon ng Miyerkules, Enero 8 hanggang  ng gabi ng Huwebes, Enero 9 o ang mismong araw ng kapistahan.

Kabilang sa mga tampok sa pista ay ang Traslacion, o ang prusisyon ng imahen ng poong Hesus Nazareno na magsisimula sa Quirino Grandstand patungo sa Minor Basilica and National Shrine of Jesus Nazareno.

Inaasahan na milyun-milyong deboto ang makikilahok sa taunang selebrasyon. –  Sa panulat ni Kat Gonzales mula sa ulat ni Jenn Patrolla (Patrol 38)

Kumbinsido si Senate Committee on Ways and Means Chairman Sherwin Gatchalian na ang bangayan sa partidong uniteam ang isa sa mga dahilan ng pagtanggal ni Pangulong Ferdinand Marcos Jr. kay Vice President Sara Duterte bilang miyembro ng National Security Council.

Ayon kay Senador Gatchalian, hindi na sikreto ang hidwaan sa pagitan ng dalawang matataas na opisyal ng bansa kaya’t hindi maiaalis na isa ang pulitika sa mga nagtulak sa desisyon ng Pangulo.

Sa kabila nito, iginagalang naman aniya ang hakbang ni Pangulong Marcos lalo na kung sa tingin ng Presidente ay ito ang makatutulong sa bansa.  - Sa panulat ni Laica Cuevas

Bumwelta si dating House Deputy Speaker Erin Tañada sa mga taga-suporta ng pamilya Duterte matapos bansagang dirty politics ang pagtanggal ni Pangulong Ferdinand Marcos Jr. kay Vice President Sara Duterte sa National Security Council.

Ayon sa dating Kongresista, dapat alalahanin ng mga ito na ganito rin ang ginawa ni dating Pangulong Rodrigo Duterte noong nasa posisyon pa si dating Vice President Leni Robredo.

Kung marumi aniya ngayon ang pagtanggal kay VP Sara, masasabing mali rin ang ginawa ni dating Pangulong Duterte kay dating Vice President Robredo.

Bagama’t hindi pormal na tinanggal ng dating Pangulo si dating VP Leni, matatandaang sinabi ng ni Atty. Robredo noong 2016 na pinigilan siya ng dating Pangulo na dumalo sa lahat ng pagpupulong ng Gabinete. –  Sa panulat ni Laica Cuevas

Naniniwala si dating Bayan Muna Party-List Rep. Neri Colmenares na hindi para sa seguridad ng Pilipinas kundi para political survival ni Pangulong Ferdinand Marcos Jr., ang pagbabago sa national security council.

Ito’y matapos na tanggalin ni Pangulong Marcos ang Vice President at mga dating pangulo ng bansa bilang miyembro ng NSC sa pamamagitan ng executive order 81.

Kabilang na rito sina Vice President Sara Duterte at ama nitong si dating pangulong Rodrigo Duterte na ikinokonsiderang ‘purging’ ng isang political analyst.

Naniniwala rin ang dating mambabatas na lalong titindi ang power struggle sa pagitan ng mga Duterte at Marcos sa paparating na 2025 midterm election para maproteksyunan ang kani-kanilang dynasty.

Para naman kay dating presidential spokesperson Atty. Salvador  Panelo, ang pag-aalis nina dating pangulong Gloria Macapagal-Arroyo at dating pangulong joseph Estrada sa NSC ay para pagtakpan at pabanguhin lamang ang pagkakaalis ni VP Sara bilang miyembro upang palabasin na hindi talaga ito ang target ng nasabing kautausan.

Kasabay ng pag-lagda ng pangulo sa EO-81 ipinaliwanag ni Executive Secretary Lucas Bersamnin, na kinakailangang gawin ang nasabing pagbabago upang matiyak na mananatiling matatag ang NSC bilang isang national security institution, na kayang mag-adapt sa mga nag-babagong hamon at oportunidad, sa loob at labas ng bansa. –  Sa panulat ni Jeraline Doinog