DWIZ 882

Pinuna ng Commission on Audit ang Social Security System  dahil sa kabiguan nitong kolektahin ang higit 93 billion pesos na halaga ng premium contributions mula sa mga deliquent employer noong 2023.

Napag-alaman ng COA na nakakolekta lamang ang SSS ng 4.581 nillion pesos o 4.89% ng kabuuang 93.747 billion pesos established collectibles.

Nabatid din ng COA na 103 employer lamang na may delinquent accounts na nagkakahalaga ng 95.308 million pesos  ang nag-avail ng installment plan.

Ayon sa COA, posibleng indikasyon ito ng liniency  o pagiging maluwag sa kolesyon.

Dahil dito, napagkaitan ang SSS ng pondo para sa ibat-ibang benepisyo.

Para naman sa SSS, sinabi nito sa COA na ginagawa nila ang makakaya parara mag-remit ang mga kumpanya.

Sa kabila nito, tuloy naman ang 15% contribution rate hike ng ahensya simula ngayong buwan kung saan 10% ang sasaluhin ng employer, 5% naman sa empleyado. –  Sa panulat ni Jeraline Doinog

Tahasang itinanggi ng ilang miyembro ng Young Guns Bloc ng Kamara na may kinalaman sila sa sinasabing ika-apat na impeachment complaint laban kay vice President Sara Duterte.

Ayon kay Zambales Rep. Jay Khonghun walang pagkilos sa panig ng young guns para sa panibagong impeachment complaint.

Para naman kay Lanao Del Sur Rep. Zia Alonto Adiong, wala siyang ideya kaugnay sa nasabing isyu dahil abala rin siya matapos namayapa ang kaniyang ina.

Sabi naman ni Tingog Party-List Rep. Jude Acidre, kararating lang niya ng pilipinas at wala siyang nakuhang anumang balita tungkol sa paghahain ng reklamo.

Maging si 1-rider Party-List Rep. Rodge Gutierrez na miyembro ng young guns at bahagi ng minorya ay wala rin nalalaman tungkol sa sinasabing ika-apat na impeachment complaint.

Giit pa Cong.  Gutierres na hindi niya pa nakikita ang naunang tatlong reklamo na inihain laban kay VP Sara.

Una ng inihayag ni House Secretary General Reginald Velasco na may maghahain ng impeachment complaint kung saan pangungunahan ito ng nasa 10 hanggang 12 mambababatas mula sa majority at minority na kinumpirma naman ni House Minority Leader France Castro. –  Sa panulat ni Jeraline Doinog

Nilinaw ng National Security Council na may karapatan at kapangyarihan si Pangulong Ferdinand Marcos Jr., na magpalit ng mga miyembro ng National Security Council kung kailan nito gusto.

Ito, ayon kay NSC Assistant Director General Jonathan Malaya sa gitna ng mga kuwestiyon ng mga kritiko sa inilabas na Executive Order no. 81 ng Pangulo na nag-aalis kay Vice President Sara Duterte at dalawang dating Pangulo sa komposisyon ng NSC.

Ayon kay Gen. Malaya, discretion ng Presidente na magpalit ng mga miyembro ng NSC gaya ng ginawa ng ibang dating mga Pangulo ng bansa.

Wala aniyang kinalaman ang isyu sa China sa inilabas na kautusan ni PBBM dahil ang desisyon ay sarili nitong pagpapasya.

Sa nasabing EO no. 81 na pirmado ng Presidente na mahalagang masiguro ng mga miyembro ng council na mapanindigan at maprotektahan ang soberanya at pambansang seguridad ng bansa. – Sa panulat ni Jeraline Doinog 

Binalewala ng Malakanyang ang pambabatikos ng isang opisyal ng dating administrasyong Duterte matapos alisin si Vice President Sara Duterte sa National Security Council.

Matatandang tinawag ni dating Presidential Chief Legal Counsel Salvador Panelo ang pag-aalis kay VP Sara sa NSC bilang isang ill-advised o maling hakbang para kay Pangulong Ferdinand Marcos Jr.

Iginiit pa ni Atty. Panelo na nagpapakita ito ng maruming pamumulitika, at ito ay panibago na namang pagsira sa political star power ni VP Sara.

Sinabi naman ng palasyo na hindi sila maglalabas ng pahayag kaugnay ng mga patutsada ni Atty. Panelo hanggil sa nasabing isyu. – Mula sa panulat ni Jeraline Doinog at sa ulat ni Gilbert Perdez (Patrol 13)

Inatasan ng Philippine National Police ang mga tauhan nito na pangalagaan ang dignidad ng pulisya lalo na sa nalalapit na midterm elections.

Ayon kay PNP Chief General Rommel Marbil, hamon sa pulisya ang gagawing pagbabantay sa darating na 2025 midterm elections.

Ipinunto ni General Marbil na mahalagang yaman na hindi dapat masira ng anumang tukso o maling impluwensya  ang integridad ng mga pulis.

Dagdag pa ng Hepe ng pulisya na hindi dapat magpaapekto ang sinumang miyembro ng pambansang pulisya sa mga politiko.

Gayunman, pinuri ni General Marbil ang dedikasyon ng pulisya, kasabay ng paghimok na magkaisa upang mapanatili ang tiwala at respeto ng publiko. – Sa panulat ni John Riz Calata

Target ng Department of Agriculture na magpatupad ng maximum suggested retail price sa mga imported na bigas.

Ito’y bahagi pa rin nang pagsusumikap ng pamahalaan na mapababa ang presyo ng bigas sa mga pamilihan.

Ayon kay Agriculture Secretary Francisco Tiu-Laurel Jr., hindi na dapat aabot ng 60 pesos ang kada kilo ng imported rice sa merkado dahil maituturing na itong ‘profiteering’.

Sa pamamagitan anya ng MSRP, matutukoy kung hanggang magkano lang dapat ang pinakamataas na bentahan ng imported rice.

Target naman ng Kalihim na mailabas ang guidelines o panuntunan kaugnay rito bago matapos ang Enero. –  Sa panulat ni John Riz Calata

Maaaring hindi kampante si Pangulong Ferdinand Marcos Jr. sa ilang mga miyembro ng National Security Council.

Ito ang nakikitang dahilan ng Political Analyst na si Professor Edmund Tayao kung bakit ni-reorganisa ng pangulo ang nasabing konseho, na tumatalakay sa usaping pansiguridad ng bansa.

Kaugnay nito, ipinaubaya na ni Prof. Tayao sa publiko kung paano babasahin ng taumbayan ang naging desisyon ng pangulo na repasuhin ang listahan ng mga kasapi sa NSC.

Nabatid na kabilang sa mga inalis na miyembro nito ay sina Vice President Sara Duterte at ilang dating pangulo ng Pilipinas. – Sa panulat ni john Riz Calata

Tiniyak muli ng pamahalaan na maibibigay sa mga karapat-dapat na recipients ang financial assistance ng pamahalaan sa pamamagitan ng ilang mga programa gaya halimbawa ng AKAP program.

Ayon kay DOLE Undersecretary Benjo Benavidez, bukod sa may sinusundang guidelines sa pagpapatupad nito ay subject din sa coa audit ang halaga na ginugugol dito.

Binigyan-diin ni Usec. Benavidez na madaling makita kung qualified ang isang benepisyaryo at kapag napatunayan anya nilang hindi pala dapat tumanggap, ay ipinababalik nila ang ayudang naibigay at ibinabalik sa kaban ng bayan.

Giit pa ng DOLE Official, maraming pagkakataon na may binawian sila ng ayuda, lalo na noong panahon ng pandemya. Mayroon din silang binawian dahil sa dobleng tulong na natanggap ng isang recipient.

Ipinunto ng opisyal na nararapat lamang, lalo’t ang salaping gamit dito ay taxpayers’ money na aniya’y dapat magamit sa tamang paraan. –  Sa panulat ni Kat Gonzales

 Maghihigpit na ang Land Transportation Office  hinggil sa paggamit ng seatbelt bilang bahagi ng road safety measures.

Ayon kay LTO Chief Assistant Secretary atty. Vigor Mendoza, inatasan na niya ang lahat ng regional directors at district office heads na gawin na nila ang lahat ng hakbang  partikular na ang paggamit ng social media at iba pang platforms upang hikayatin ang mga motorista na gumamit ng seatbelt.

Makikipagtulungan din aniya sila sa mga transport group; paaralan; at iba pang stakeholder upang maipakalat ang impormasyon at komunikasyon para sa mga drayber at pasahero ng paggamit ng seatbelt.

Maliban dito, magpapa-deploy din ang nasabing ahensya ng mga enforcers at makikipag-ugnayan sa iba pang law enforcement agencies.

Dagdag pa ni Asec. Mendoza, agresibo rin nilang itutulak ang stop road crash program kung saan makikipag-ugnayan din sila sa mga lokal na pamahalaan at sa mga organisasyong pangkomunidad para sa nasabing kampanya. –  Sa panulat ni Alyssa Quevedo