DWIZ 882

Binasbasan na ang mga replica ng Itim na poong Nazareno isang araw bago ang taunang Traslacion.

Sa ginanap na prusisyon ng mga replica sa Quezon Boulevard sa Quiapo kahapon, Enero 7, nagkaisa at nagsaya ang mga deboto habang dala ang kani-kanilang mga replica.

Nagmula rin sa iba’t ibang lugar ang mga deboto na dala ang kanilang replica bilang pasasalamat sa poon.

Paalala naman ng pamunuan ng simabahan ng Quiapo, hindi paligsahan ang naturang prusisyon ngunit isa itong paraan para maramdaman ang presensya ng Panginoon.

Muling nagbigay ng paalala ang Philippine Red Cross (PRC) sa mga deboto na dadalo sa Traslacion ngayong taon.

Ayon kay PRC chairman Senador Richard Gordon, mabuting siguraduhing hydrated ang mga lalahok.

Aniya, hydration problem ang karaniwan nilang nakukuhang reklamo sa naturang pista.

Dagdag pa ni Gordon, magtatayo sila ng mga water stations sa ruta ng prusisyon.

Iginiit din ng senador na mas makabubuti kung magdadala ng sariling tubig ang mga deboto.

Sa kabila nito, nakiusap si Gordon na siguruhin na mapapanatili ang kalinisan ng paligid sa Traslacion 2020.

Hindi inaprubahan ng Department of Trade and Industry (DTI) ang request para sa pagtataas ng presyo ng ilang mga basic commodities sa merkado.

Una nang nanawagan ang mga manufacturers ng gatas, laundry detergent, canned meats, at ilang pampalasa, ng P0.15 hanggang P2.00 taas presyo.

Ayon kay DTI Undersecretary Ruth Castelo, sa ngayon ay pinag aaralan pa rin nila ang iba pang mga requests na kanilang natanggap.

Aniya, may kamahalan na ang ginagamit na raw products ng ibang mga produkto.

Samantala, siniguro naman ng ahensya na walang paggalaw sa presyo ng mga basic commodities hanggang sa buwan ng Pebrero.

Aminado ang pamunuan ng Philippine National Police (PNP) na nanatiling malaking hamon ang gyera kontra iligal na droga ng pamahalaan.

Ayon kay PNP officer-in-charge (OIC) Lt. Gen. Archie Gamboa, kahit kaliwa’t kanan kasi ang ginagawa nilang operasyon ay hindi pa rin maubos-ubos at nagkalat pa ang iligal na droga sa bansa.

Paliwanag ni Gamboa, bagamat problema pa rin sa lahat ng rehiyon ang iligal na droga, 5 rehiyon ang kanilang tinututukan.

Kabilang na dito ang Metro Manila, Bangsamoro Autonomous Region in Muslim Mindanao (BARMM), Western Visayas, Central Visayas, at Zamboanga Peninsula.

Dagdag pa ng opisyal, karamihan sa mga iligal na droga na nakakalat ngayon ay nagmumula sa mindanao.

Kaugnay naman nito, ipinag utos nya sa lahat ng regional director na magsumite ng top 10 hanggang top 20 drug suspects sa kanilang hurisdiksyon para madetermina ang magiging prayoridad nila sa anti-drugs operations —ulat ni Jaymark Dagala (Patrol 9).

Susuriin na ng Philippine National Police (PNP) ang curriculum development ng mga paaralan na may kursong criminology.

Ito ay kasunod ng naging mga pagaaral na halos lahat ng mga nagtapos sa mga criminology schools na nagiging pulis, lalo na dito sa Metro Manila, ay nagiging problema ng organisasyon.

Ayon kay PNP officer-in-charge (OIC) P/LtGen. Archie Francisco Gamboa , partikular nilang problema sa mga pulis na nagtapos sa mga criminology schools ay ang pagiging laging late sa trabaho hanggang sa pagkakasangkot sa mga iligal na aktibidad.

Para kay Gamboa nais nyang maibalik ang tama at makabuluhang edukasyon para sa mga nagaaral sa pagkapulis upang matiyak na makakapagsilbi sila ng maayos sa PNP kapag sila ay narecruit.

Ngayong taon ay may 17,000 pulis na quota ang PNP para i-recruit, 10,000 rito ay annual qouta recruitment habang ang 7,000 ay ipapalit sa mga namatay, nag retiro, at nadismissed na mga pulis.

Muling nagbabala si Pangulong Rodrigo Duterte sa Maynilad at Manila Water kasunod ng nabuong bagong water concession agreement.

Ayon sa pangulo, mayroong opsyon ang naturang mga water concessionaire kung kanilang tatanggapin ang bagong kontrata o muling kukunin ng pamahalaan ang operasyon sa distribusyon ng tubig sa Metro Manila at kalapit na lalawigan.

Ipauubaya rin niya sa militar ang operasyon ng tubig at kakasuhan ang mga water concessionaire.

You accept it and if it’s to your liking, sign it. If you don’t and there is no water, I will order the military to take over,” ani Pangulong Rodrigo Duterte.

Nilinaw ni Pangulong Rodrigo Duterte ang dahilan kung bakit hindi natuloy ang kanyang pagdalaw sa mga biktima ng lindol sa Davao Del Sur nuong nakaraang linggo.

Matatandaang sinabi Senador Bong Go at Presidential spokesman Salvador Panelo na sumama ang pakiramdam ng pangulo kaya dalawang beses siyang hindi natuloy sa naturang event.

Ayon sa pangulo, hindi ang kanyang pakiramdam kundi ang sumamang panahon ang dahilan kaya hindi siya natuloy.

If the weather would not allowed, paano ako mag lipad? Diresto ka sa bukid,” ani Panglong Rodrigo Duterte.

Muling tiniyak ng Armed Forces of the Philippines (AFP) ang kanilang kahandaan na ipagtanggol ang mga Pilipino laban sa anumang banta ng digmaan.

Ito ang inihayag ng bagong AFP chief of staff na si Lt/Gen. Filemon Santos Jr. kasunod ng nagpapatuloy na sigalot sa pagitan ng Amerika at ng mga bansa sa gitnang silangan.

Ayon kay Santos, naitala na kasi sa kasaysayan na ang mga bansang kaalyado partikular na ng Amerika ay nadadamay sa digmaan.

Bagamat kaalayado rin ng Pilipinas ang Estados Unidos, nilinaw ni Santos na hindi naman kasama ang giyera sa gitnang silangan sa RP-US mutual defense treaty.

Nagbibigay lang aniya ng updates sa situasyon ang Estados Unidos pero wala pa namang inilalatag na plano sa possibleng mangyari sa gitnang silangan.

Sa ngayon aniya ang pangunahing concern ng pangulo ay ang kaligtasan ng lahat ng mga Pilipino sa gitnang silangan, at naghihintay lang ng go-signal ang AFP para sa paglikas ng mga Pilipinong nangangabib na maipit sa kaguluhan.