DWIZ 882

Kinumpirma ng Department of Foreign Affairs na walang Pilipino na nasaktan o nasawi sa ginawang pag atake ng Iran sa US base sa Iraq.

Ayon kay Foreign Affairs Secretary Teodoro Locsin Jr.,  sa ngayon ay walang Pilipinong napaulat na nasaktan ngunit hindi pa tapos ang isinagasawang search at damage assessment.

Matatandaang pinuntirya ng Islamic revolutionary guard corps ang Al Asas Airbase na kinaroroonan ng sundalong amerikano bilang ganti sa naging pagpatay ng amerika sa top Iranian general.

Una nang itinaas ang alert 4 sa Iraq kung saan mandatory repatriation na ang ipinatutupad sa naturang bansa dahil sa tumitinding tensiyon duon.

Hinikayat ni Senador Joel Villanueva ang Philippine Embassy sa Iraq na siguruhing bukas ang lahat ng komunikasyon para mabilis na mako-kontak ng mga Pilipino duon.

Kasunod ito ng itinaas na alert level 4 sa Iraq kung saan nagpatupad na ng mandatory repatriation sa mga Pilipinong nanatili pa rin duon sa kabila ng tumitinding kaguluhan.

Ayon kay Villanueva, madali sanang makontak ng mga Pilipino ang Embahada para mabilis silang makuha at maayos ang kanilang pag aalis sa naturang bansa.

Aniya, inaasahang walang kahit isang Pilipino ang maiiwan sa repatriation na gagawin sa Iraq.

Irerekomenda ng Department of Labor and Employment na mabigyan ng alternatibong trabaho sa ibang bansa ang mga OFW na ire-repatriate mula sa Middle East.

Ayon kay Labor Secretary Silvestre Bello III, target na maipadala ang mga ito China, Russia, Canada, Germany at Japan.

Aniya, minamadali na ang pagplantsa sa mga labor agreement sa nasabing bansa na maaring puntahan ng mga maapetuhang OFW.

Tinatayang nasa mahigit 2 milyong mga OFW ang mawawalan ng trabaho mula sa Saudi Arabia at iba pang bansa sa Middle East.

Naikabit na ang mga bagong riles sa ilang istasyon ng Metro Rail Transit (MRT) line 3.

Ayon sa Department ng Transportation, partikular na nilagyan ng bagong riles ay mula sa istasyon ng Buendia hanggang Taft avenue southbound at istasyon mula Buendia hanggang Magallanes northbound.

May kabuuang 68 na piraso ng 180 meter long–welded rails ang inilagay na rail tracks.

Dahil dito, maiiwasan na ang matagtag na byahe ng mga pasahero na kung minsan ay nagiging sanhi ng nangyayaring aberya sa tren.

Sinimulan ang paglalagay ng riles nuong Nobyembre 2019 at inaasahang nakukumpleto ito sa Pebrero 2021.

Nagpapatuloy ang pagsisikap ng Philippine National Police na linisin ang kanilang hanay mula sa mga ninja cops.

Kasunod ito ng survey na naniniwala pa rin ang mayorya ng mga pilipino na mayroon pa ring ninja cops sa hanay ng kapulisan.

Ayon kay DILG Secretary Eduardo Año, mayroon nang listahan ang PNP ng mga natitirang ninja cops at kumikilos na upang maalis at maparusahan ang mga ito.

Una nang inatasan ni Pangulong Rodrigo Duterte si Año para linisan at pangunahan ang PNP habang wala pa siyang naitatalagang PNP Chief.

Siniguro ng gobyerno na sapat ang pondo nito para tugunan ang repatriation ng mga Pilipino sa Middle East sakaling mas tumindi pa ang kaguluhan.

Ayon kay Budget Assistant Secretary Rolando Toledo, mayroong 1.8 billion repatriation fund sa ilalim ng 2020 national budget.

Bukod pa aniya ito sa 13 billion na contigency fund na maaring magamit sakaling kulangin ang inilaang naunang budget ng DFA at OWWA.

Una nang nag abiso si Pangulong Rodrigo Duterte kay Budget Secretary Carlos Dominguez at sa Kongreso na maghanda na ng emergency fund para sa pag papauwi sa mga Pilipino sa Middle East.

Naghahanda na ang dalawang batalyon ng sundalo na ipadadala sa Middle East sa gitna ng tumitinding tensiyon duon.

Ayon kay Defense Secretary Delfin Lorenzana, isang batalyon ng army at isang marine battalion ang ide-deploy batay na rin sa naging kautusan ni Pangulong Rodrigo Duterte.

Nilinaw naman ni Lorenzana na hindi makikipag bakbakan ang naturang mga sundalo bagkus ay tutulong ang mga ito sa repatriation ng mga Pilipino.

Inaayos na lamang ang logistics at documentation ng mga sundalo pagkatapos ay aalis na ang mga ito sa lalong madaling panahon.