DWIZ 882

Idinaos kaninang madaling araw ang vigil mass bago ang Traslacion ngayong taon.

Pinangunahan ni Basilica of the Black Nazarene Rector Msgr. Hernando Coronel ang misa, samantalang si Cardinal Luis Antonio Tagle naman ang nagbigay ng homiliya.

Sa kanyang sermon, humingi ito ng panalangin para sa kapayapaan at kaligtasan partikular na ang mga nasa Gitnang Silangan.

Dagdag pa ng Cardinal, hinikayat nito na tularan ang misyon ni Hesus at ang kaniyang debosyon.

Samantala, umabot naman sa higit 100,000 katao ang dumalo ng misa sa loob ng Quirino Granstand.

Pinirmahan na ni Pangulong Rodrigo Duterte ang batas nag magtataas ng sweldo ng mga government workers.

Sa ilalim ng Salary Standardization Law of 2019, mula P11,000 hanggang P13,000 ang dagdag sa minimum basic salary.

Kasama sa mga tataasan ng sweldo ang mga guro.

Samantala, magsisimula ang implementasyon ng unang bugso ng bagong salary schedule ngayong buwan.

Ipadadala ng Pilipinas ang pinakamalaki nitong eroplano at sasakyang pandagat sa Gitnang Silangan.

Ito ang kinumpirma ng Department of National Defense (DND) kasunod ng utos ni Pangulong Rodrigo Duterte na repatriation ng mga Pilipino doon.

Ayon kay Defense Secretary Delfin Lorenzana, pinaplano nila ng maigi ang kanilang mga hakbang para dito.

Aniya, nakikipag-usap na ang Department of Foreign Affairs (DFA) sa ibang bansa hinggil sa pagpapadala ng mga ito.

Samantala, nilinaw naman ni Lorenzana na hindi pupunta sa Gitnang Silangan ang mga ito para makipaglaban kun’di para sunduin ang mga Pilipino.

Aabot sa mahigit 160 dayuhang sex offenders ang naharang ng Bureau of Immigration (BI) na makapasok sa bansa sa nagdaang 2019.

Ayon kay BI Port Operations Division Chief Grifton Medina, mas mataas ang nasabing bilang kumpara sa naitala noong 2018.

Ipinagmalaki ni Medina ang mabilis na aksyon ng ahensya para hindi na makapasok pa ng bansa ang naturang mga dayunhan.

Nangunguna umanong dayuhang sex offenders ang mga Amerikano na umabot sa 128 na sinundan ng mga Briton, Australiano at Chinese.

Tiniyak ng Department of Foreign Affairs (DFA) ang patuloy na pagtutok sa kaso ng nasawing Overseas Filipino Worker (OFW) na si Jeanelyn Padernal Villavende sa Kuwait.

Ayon kay Foreign Affairs Sec. Teddy Locsin Jr., lahat ng tulong o legal assistance ay handa nilang ibigay sa pamilya para lang makamit ang hustisya sa pagpatay kay Villavende.

Bilang paunang tulong ay binigyan na ng ahensya ang pamilya ng abogado at P100,000 financial assistance.

Ganap na alas-4:40 ng hapon, kahapon, ika-8 ng Enero, dumating ang labi ni Villavende.

Nangangamba ang Department of Education (DepEd) sa pagtapyas ng halos P7-bilyong pondo para sa pagpapagawa ng mga silid-aralan.

Ayon kay DepEd Usec. Annalyn Sevilla, dahil sa nasabing pagbawas ng pondo, may ilang mga pampublikong paaralan na ang hindi na matatayuan ng karagdagan pang mga classroom.

Dahil ditto, sinabi ni Sevilla na posibleng hindi na masunod ang tamang student-teacher ratio at bumalik sa double shifting ang ilang mga paaralan.

Bumaba ng 6% sa loob ng anim na taon ang birth rate sa Pilipinas.

Ito ay batay sa pinakahuling datos ng Philippine Statistics Authority (PSA) kung saan lumabas na may 190 sanggol ang ipinapanganak kada oras noong 2018.

Ayon sa PSA, may mahigit 1,600,000 ang naireshistrong ipinanganak noong 2018.

Sa parehas na datos, ipinakita rin na mas maraming lalaking sanggol ang ipinanganak kumpara sa babae.

Samantala, nagmula naman sa Luzon ang 58% ng kabuuang bilang ng mga ipinanganak na sanggol, habang 23% naman ay sa Mindanao at 18% naman ay sa Visayas.

Humingi ng tawad ang pamunuan ng ride-hailing app na Angkas sa Land Transportation Franchising and Regulatory Board (LTFRB) matapos nitong pagbantaan na ipaba-blacklist sila dahil sa mga nakitang paglabag sa pilot testing ng motorcycle-taxis.

Magugunitang nagbanta ang Technical Working Group (TWG) ng Department of Transportaion (DOTr) na ipatatanggal ang Angkas dahil sa mga paglabag gaya ng pagpataw ng surge, usaping pagmamay-ari ng foreign firm at pagpapatakbo ng naturang ride-hailing app sa mga lugar na hindi kabilang sa guidelines.

Paliwanag naman ni Angkas Chief Transport Advocate George Royeca, nagpapataw sila ng surge price kapag rush hour o sa mga lugar na walang maraming biker –isa umano ito sa paraan para ma motivate sa daan ang mga biker.

Nangako rin ang Angkas na tatanggalin na nila ang kanilang operasyon sa mga lugar na hindi sakop ng ride-hailing app.

Kasabay nito itinanggi rin ng Angkas na sila ay pagmamay-ari ng mga dayuhan.

Tiniyak ni Pangulong Rodrigo Duterte na hindi makakatakas ang mga lumalabag sa batas, partikular tungkol sa kwestiyonableng kontrata ng tubig na pinasok ng gobyerno sa Maynilad at Manila Water.

Sa kaniyang talumpati sa mass oathtaking sa Malakaniyang ng mga bagong opisyal ng gobyerno, sinabi ng pangulo na walang katiyakang hindi mahaharap sa mga kaso ang mga may-ari ng dalawang water concessionaire dahil sa umano’y pandedehado sa mga Pilipino.

Banta pa ng pangulo, sakaling magtangkang tumakas ang mga ito ay hindi na makakabalik pa ng Pilipinas at magiging ‘wanted’ na sila habang buhay.

Giit ng pangulo, malinaw na may nangyaring sabwatan sa pagitan ng mga abogado ng gobyerno at abogado ng Maynilad at Manila Water para lokohin ang gobyerno at publiko.