DWIZ 882

Ikinalugod ni Bureau of Corrections (BuCor) Chief Gerald Bantag ang kanyang pagkakawalang-sala sa kaso hinggil sa madugong pagsabog sa Parañaque City noong 2016.

Ayon kay Bantag, kanyang pinasasalamatan ang Panginoon sa ibinibigay sa kanyang suporta at patnubay matapos ang naging pasiya ng hukuman.

Sa ipinalabas na desisyon ng Parañaque Regional Trial Court, kahapon, ika-8 ng Enero, kanilang inabsuwelto sa kasong homicide si Bantag at dalawang pang jail guard ng Parañaque City Jail.

Kaugnay ito ng pagkamatay ng 10 inmates bunsod ng pamamaril at pagsabog sa loob ng tanggapan ni Bantag nang siya ay jail warden pa ng Parañaque City Jail noong Agosto ng 2016.

Ayon sa Parañaque Regional Trial Court, nabigo ang prosekusyon na patunayang nagtulungan ang mga akusado para patayin ang 10 inmates.

Hindi pa natatanggap ng Maynilad at Manila Water ang bagong kontratang iniaalok ng pamahalaan.

Ayon kay Maynilad Spokesperson Jennifer Rufo, kanila pang hinihintay ang kopya ng nirepasong concession agreement.

Sa kabila nito, tiniyak ni Rufo ang patuloy na pakikipag-ugnayan at kooperasyon ng Maynilad sa pamahalaan.

Sa panig naman ng Manila Water, tumanggi muna si Jeric Sevilla, tagapagsalita ng kumpanya na magbigay ng komento hangga’t hindi pa nila natatanggap ang kopya ng bagong kontrata.

Magugunitang nitong Martes, ika-7 ng Enero, nag-alok ng bagong concession agreement si Pangulong Rodrigo Duterte sa Maynilad at Manila Water kung saan inalis na ang mga sinasabing kontrobersiyal at hindi patas na probisyon sa kontrata.

Binalaan rin ng pangulo ang dalawang water concessionaires na itutuloy ang planong nationalization sa operasyon ng distribusyon ng suplay ng tubig at pagpapanagot sa mga nasa likod ng naunang kontrata sakaling hindi tanggapin ng mga ito ang bagong concession agreement.

Posibleng hindi na kailanganin pa ang malawakang repatriation sa mga Pilipinong manggagawa sa Iraq.

Ito ang inihayag ni OFW Rights Activist at dating Labor Undersecretary Susan “Toots” Ople matapos umatras ng Estados Unidos sa napipintong giyera laban sa Iran.

Sa kabila nito, iginiit ni Ople na dapat gamitin ng pamahalaan ang pagkakataon para mas paigtingin pa ang mga contingency plans sa mga lugar sa Middle East na nakararanas ng kaguluhan tulad ng Iraq.

Dagdag ni Ople, kinakailangan na rin ng crisis committee ng Palasyo, Department of Labor and Employment (DOLE) at Department of Foreign Affairs (DFA) na bumuo ng isang network ng mga personalidad o grupo na maaaring lapitan ng Embahada ng Pilipinas sakaling tuluyang sumiklab ang krisis.

Samantala, naniniwala naman si Ople na hindi kinakailangan pang ituloy ng militar ang kanilang plano na ipadala ang pikamalaking eroplano at barko ng Pilipinas para tumulong sa repatriation ng mga OFW sa Middle East.

Aniya, hindi ito magiging mabisa dahil nananatili pa ring gumagana ang paliparan ng Iraq at posible rin itong mapagkamalan bilang military operation.

Hindi na magpapatupad ng mandatory repatriation sa mga Pilipino sa Iran at Lebanon ang pamahalaan ng Pilipinas.

Ito ang inihayag ni Labor Secretary Silvestre Bello III, matapos niyang makatanggap ng impormasyong ibinaba na sa level 2 ang alerto sa Lebanon habang wala nang alert level sa Iran, bagama’t hindi pa aniya ito opisyal.

Sa kabila nito, sinabi ni Bello na pansamantala pa ring suspendido ang pagpoproseso ng Philippine Overseas Employment Administration (POEA) sa deployment application ng mga manggawa sa Iran at Lebanon.

Samantala, tuloy naman aniya ang mandatory evacuation ng mga OFWs sa Iraq gayundin ang deployment ban dito.

Umaabot na sa mahigit 700 indibiduwal ang nabigyan ng tulong medikal ng Philippine Red Cross (PRC) sa gitna ng paghahanda at pag-usad ng Traslacion ng Itim na Nazareno.

Ayon sa PRC, mula kahapon, ika-8 ng Enero hanggang alas-9 kaninang umaga, nasa apat (4) na pasyente na ang kanilang isinugod sa mga ospital.

12 ang hinimatay, 165 ang nakaranas ng minor injuries tulad ng pagkahilo, hirap sa paghinga at pagtaas ng blood pressure habang 29 ang binigyan ng psychological first aid.

Umaabot naman sa 524 ang nagpakuha ng blood pressure.

As of 11:00 AM, our teams catered to a total of 737 individuals since January 8. We provided blood pressure monitoring to 524 individuals, provided first aid to 165 patients due to dizziness, shortness of breath, elevated blood pressure, abrasion, laceration, and sprain. pic.twitter.com/5dgK2DmM2t

— Philippine Red Cross (@philredcross) January 9, 2020

Una nang sinabi ni Prc Chairman, Senador Richard Gordon, na nasa 1,000 mga volunteers ang kanilang ipinakalat sa 13 first aid stations at welfare desks.

Nagkapagdeploy din ang PRC ng isang emergency medical unit at 15 ambulance.

Habang nakaistandbay naman ang 32 dalawa pang ambulansya, dalawang water tankers, tatlong rescue boats, isang amphibian, isang rescue truck at isang fire truck.

Maagang nagsimula ang Traslacion ng Poong Itim na Nazareno ngayong taong 2020.

Pasado alas-4:20 kaninang madaling araw nang magsimulang umusad ang ‘andas’ ng Poong Itim na Nazareno mula sa Quirino Grandstand.

Sa kauna-unahang pagkakataon din, pinangunahan ng pulisya ang Traslacion kung saan gumawa sila ng barikada sa unahan batay na rin sa napagplanuhan.

Ito rin ang maituturing na pinakamabilis na usad ng Traslacion matapos marating ng ‘andas’ ang bahagi ng Ayala Bridge sa loob lamang ng apat na oras –magmula nang umalis ito ng Quirino Grandstand.

Traslacion 2020 inaasahang matatapos sa loob ng 14-hrs —organizer

Inaasahang matatapos ang Traslacion ng Itim na Nazareno sa loob lamang ng 14 na oras.

Ayon sa organizer ng Traslacion 2020 na si Fr. Douglas Badong, Vicar of Minor Basilica of the Black Nazarene, inaasahan nilang makabalik ng ala-6 ng gabi ang ‘andas’ ng Nazareno, dahil na rin sa pinaiksing ruta kumpara noong nakaraang taon.

Aniya, kanila ring inaasahan na dodoble pa ang bilang ng makikilahok sa prusisyon gayong papauwi na ang ilang mga deboto na may mga pasok.

Samantala, umarangkada ang Traslacion dakong alas-4:20 ng madaling araw na mas maaga kaysa sa nakagawiang oras na ala-5 ng umaga. —sa panulat ni Lyn Aurora Legarteja

Posibleng isang bagong usbong ng corona virus ang sanhi ng naitalang mahigit 50 kaso ng misteryosong sakit sa Wuhan City sa China.

Ito ay ayon sa World Health Organizations (WHO) kung saan maaaring kabilang ito sa klase ng mga virus na nagdulot noon ng Severe Acute Respiratory Syndrome (SARS) at Middle East Respiratory Syndrome (MERS) outbreak.

Sinabi ni WHO na kinakailangan pa nila ng mas komprehensibong impormasyon para makumpirma ang uri ng pathogen na dahilan ng impeksyon sa Wuhan.

Gayundin ang matukoy ang epidemiology, clinical picture, pinagmulan, paraan ng pagkakahawa, lawak ng impeksyon at kinakailang ipatupad na countermeasures laban dito.

Disyembre noong nakaraang taon nang magsimula ang misteryosong pneumonia outbreak sa Wuhan na nakapagtala na ng 59 na kaso.

Mayorya ng mga Pilipino ang may mataas na tiwala kay U.S. President Donald Trump.

Batay ito sa pinakahuling survey ng American think tank na Pew Research Center kung saan lumabas na 77% ng mga Pilipino ang naniniwalang tama ang mga gagawing hakbang ni Trump hinggil sa mga pandaigdigang usapin.

Ito ay sa kabila naman ng kawalan ng tiwala ng malaking bilang ng mga tao mula sa 33 bansa sa buong mundo na isinailalim sa survey.

Ayon sa Pew Research Center, sa kabuuan ay 29% lamang ng mga tao sa buong mundo ang nagpahayag ng tiwala sa pangulo ng Estados Unidos habang 64% ang walang tiwala.

Samantala, lumabas din sa kaparehong survey na may mataas na pagtitiwala rin ang mga Pilipino kay Russian President Vladimir Putin na nakakuha ng 61%.

Isinagawa ang survey sa pamamagitan ng face-to-face interview sa halos 37,000 respondents mula sa 33 mga bansa sa buong mundo mula ika-18 ng Mayo hanggang ika-2 ng Oktubre noong nakaraang taong 2019.

Maagang sinimulan ang Traslacion ngayong taon.

Pasado alas-3:54 ng madaling araw nang magsimula ang morning prayer sa Quirino Grandstand.

Pinangunahan ito ng Rector ng Minor Basilica ng Itim na Nazareno na si Fr. Hernando Coronel.

Samantala, pasado alas-4:10 naman ng madaling araw nang magsimulang buhatin ng mga miyembro ng Hijos Del Nazareno ang imahe ng Poong Itim na Nazareno na hudyat ng pagsisimula ng Traslacion.