Nakapagtala na ang Phivolcs ng higit 50 volcanic eruption dahil pa rin sa pagaalburoto ng bulkang Taal.
Ayon sa ahensya, may kabuuang 52 ang naitalang pagyanig sa mga lugar malapit sa bulkan.
26 dito ang naramdaman sa Tagaytay City, Cabuyao, Laguna; Talisay, Alitagtag, Lemery at Bauan, Batangas.
Mula Intensity II hanggang Intensity V ang naitalang lakas nito.
Samantala, inilikas na ang mga nakatira malapit sa 10-kilometer danger zone ng bulkang Taal.
Nagpapatuloy pa rin ang pag aalburoto ng bulkang Taal ngayong araw.
Base sa tala ng Phivolcs, isang strombolian fountain ang namataan sa main crater ng bulkan pasado 3:20 a.m. ngayong Lunes, Enero 13.
Ang strombolian fountain ay ang paglalabas ng lava at maiinit na bato ng isang bulkan.
Samantala, nakataas pa rin ang alert level 4 sa bulkang Taal.
Nagkakaubusan na ng face mask sa mga pharmaceutical store maging sa mga hardware.
Ito’y matapos magsimulang magbilihan ang publiko dahil sa patuloy na ash fall na nararanasan bunsod ng nag aalburutong bulkang Taal.
Ilan sa mga netizen na ang nagtatanong-tanong kung saan maaari pang makabili ng face mask dahil sa kanilang lugar umano sa Batangas ay wala nang mabilhan.
Makikita rin sa isang post sa social media ang isang picture ng isang drug store sa las piñas na may sign sa pinto na “out of stock face mask”.
Samantala, sinabi naman ng Department of Health (DOH) na maaaring maging alternatibong proteksyon maliban sa face mask ay ang basang bimpo.
Hindi magkamayaw ang mga tao sa pagbili ng face mask, marami sa ating drug store ang out of stock, wag po sana mag hoard ng face mask at wag po sana tayo abuso sa price nito. At this time kailangan natin magdasal at mag kaisa. #Taal #TaalVolcanoEruption pic.twitter.com/OtGawTkU5t
— ️ Geri General ♏ (@iamfabulousgeri) January 12, 2020
Mas hihigpitan na ng pamahalaan ang mga patakaran na ipatutupad sa pagkuha ng visa ng mga turistang Chinese na nais magtungo sa Pilipinas.
Ito ang inihayag ni Department of Justice Undersecretary Mark Perete bilang bahagi aniya ng nirepasong probisyon sa umiiral na visa upon arrival policy sa bansa.
Layunin aniya nitong matugunan ang nakitang butas sa panuntunan kung saan pumapasok ng Pilipinas ang mga Chinese national bilang turista atsaka kukuha ng special working permit para makapagtrabaho.
Sinabi ni Perete, sa ilalim ng bagong panuntunan, kinakailangang makapagpakita ng round trip plane ticket ng Chinese national bago ito bigyan ng visa upon arrival para matiyak na hindi ito mag-oover stay sa bansa.
Epektibo lamang ang visa upon arrival sa loob ng 30 araw at ituturing na rin itong paso oras na umalis na ng Pilipinas ang turistang chinese.
Maliban sa round trip tickets, kailangan ding ipakita ng isang Chinese na papasok sa Pilipinas bilang turista ang itinerary nito, ipina-book na accommodation, at accredited tour operator.
Isinusulong ni Labor Secretary Silvestre Bello III ang pagpapatupad ng permanent deployment ban ng mga manggagawang Pilipino sa Kuwait.
Kasunod aniya ito ng pagpapadala ng Kuwaiti authorities ng peke at dinoktor na resulta ng otopsiya ng pinaslang na OFW na si Jeanelyn Villavende.
Ayon kay Bello, kanyang pinagdududahan ngayon ang kredibilidad ng mga Kuwaiti forensic doctors matapos magpadala ng mga ito ng autopsy report na naglalaman lamang ng dalawang pangungusap.
Nakasaad din dito na physical injuries ang tanging sanhi ng pagkamatay ni Villavende at wala nang iba pang detalye.
Sinabi ni Bello, ito ang dahilan kaya sumulat siya sa National Bureau of Investigation (NBI) para magsagawa ng sariling autopsy sa bangkay ni Villavende kung saan lumabas ang posibilidad na hinalay ito bago pinatay.
Dagdag ni Bello, kanya nang inirekomenda sa Philippine Overseas Employment Administration (POEA) board ang pagpapatupad ng total deployment ban ng mga houshold service workers sa aniya’y mga inutil na Kuwaiti.
Nahulog sa bangin ang isang jeep na may lulang 21 pasahero sa Agoncillo, Batangas.
Ayon kay Mayor Wilson Maralit ng Balete, Batangas karamihan sa mga sakay ng jeep ay residente ng Balete at nagta-trabaho sa iba’t ibang palaisdaan.
Lilikas umano sana ang mga ito dahil sa nag-aalburutong bulkang Taal.
Sa ngayon ay ina-alam pa ang karagdagan pang detalye hinggil sa aksidente.
Hindi pa rin kasi nila umano matiyak ang kalagayan ng mga sakay ng jeep lalo’t madilim at maputik sa nasabing lugar.
Pinag-iingat ng Philippine Red Cross (PRC) ang publiko kaugnay sa patuloy na pag-ulan ng abo dahil sa pagaalburuto ng Taal volcano.
Sa ipinadalang mensahe sa DWIZ ni PRC chairman Dick Gordon, sinabi nito na malala ang sitwasyon partikular sa mga lugar na malapit sa bulkang Taal.
Ayon kay Gordon, bukod sa paglalagay ng mask, dapat din ay tinitingnan ng publiko ang kanilang mga bubungan dahil maaari aniyang bumigay ang mga ito lalo na kung hindi konkreto dahil sa posibleng pagkapal ng abong bumabagsak dito.
Dagdagan pa umano ito ng maya’t mayang pagyanig na nararanasan sa mga karatig lugar.
Niyanig ng magnitude 4.1 na lindol ang Agoncillo, Batangas dakong 11:56 p.m. ng Linggo, Enero 12.
Namataan ng Phivolcs ang sentro ng lindol sa layong 7 kilometro hilagang silangan ng Agoncillo.
Mayroon itong volcanic origin na may lalim na 8 kilometro.
Naramdaman ang Intensity V sa Tagaytay City.
Sa kasalukuyan ay ito ang pinaka malakas na pagyanig na naitala simula nang mag alboroto ang bulkang Taal kahapon.
Nanawagan ang isang grupo sa Department of Labor and Employment (DOLE) na gawing pantay ang sweldo ng mga nurse sa pribadong kumpanya sa mga nasa government health institutions.
Ayon kay Anakalusugan Party-list Representative Micheal Defensor, marami pa ring mga nurse ang nasa bansa para dito magserbisyo at hindi sa abroad.
Aniya, kailangang hikayatin ng gobyerno ang mga bagong nursing graduates na magtrabaho sa bansa.
Isa na raw na paraan dito ang pagbibigay ng maayos na sweldo.
Magugunitang sa ilalim ng Salary Standardization Law (SSL) ay tataas ng higit 20% ang sweldo ng mga government employees.
Suspendido ang klase sa lahat ng antas, maging ang lahat ng tanggapan ng pamahalaan ngayong Lunes, Enero 13, sa Metro Manila, Calabarzon, at Region 3 dahil sa ash fall na dulot ng pagputok ng bulkang Taal kahapon.
Ayon sa inilabas na anunsyo ni Executive Secretary Salvador Medialdea, tanging mga nasa disaster response at health services ang may pasok.
Aniya, ito ay derektiba mula sa mga otoridad ng pangulo na base sa rekomendasyon ng National Disaster Risk Reduction ang Management Council.
Samantala, hinikayat din ni Medialdea ang mga pribadong kumpanya na magsuspinde na rin ng kanilang mga pasok.