Bumaba ng 70% ang bilang ng mga turista sa Tagaytay matapos ang pagputok ng bulkang Taal.
Ayon sa Tourism Office ng syudad, hindi muna nila hinihikayat ang mga turista na pumunta sa Tagaytay City.
Anila, sa ngayon ay nagsasagawa pa ng assessment at clearing operations ang lokal na pamahalaan.
Magugunitang nabalot ng abo ang Tagaytay dahil sa patuloy na pagaalburoto ng bulkan.
Siniguro ng National Food Authority (NFA) na sapat ang suplay ng bigas sa mga lugar na apektado ng pagputok ng bulkang Taal.
Ayon kay NFA administrator Judy Dansal, 24 oras na bukas ang kanilang mga operation centers.
Anila, ang kanilang mga empleyado ay handang umalalay sa mga lokal na pamahalaan at mga evacuees.
Samantala, aabot naman sa halos 2-milyong sako ng bigas ang mayroon sa mga warehouse ng NFA sa Southern Tagalog na lubhang naapektuhan ng pagputok.
Nahihirapan na ang Phivolcs na malaman ngayon ang tunay na kaganapan sa loob ng bulkang Taal matapos masira ang kanilang mga instrumento dahil sa mga putik na tumabon dito.
Ayon kay Antonia Bornas, pinuno ng Volcano Monitoring and Eruption Prediction Division ng Phivolcs, hindi nakatakas sa pag-aalburoto ng bulkang taal ang ilang instrumento ng ahensya na nasa mismong bunganga ng nasabing bulkan.
Dahil dito aniya nahihirapan sila sa komunikasyon sa kanilang mga remote station na pinapagana ng mga solar power.
Gayunman, sinabi ni Bornas na may mga tauhan na silang nagtungo sa may malapit sa bulkang taal at may dalang mga instrumento na maaari rin nilang magamit para ma-monitor ang aktibidad ng nasabing bulkan.
Ilang pagyanig muli ang naitala sa Batangas kagabi, Enero 13.
Naramdaman ang pagyanig ng Magnitude 3.8 na lindol sa San Nicolas, Batangas dakong 10:55 p.m.
Naramdaman naman ang Intensity III sa Tagaytay City.
Magnitude 4 na lindol naman ang yumanig sa Agoncillo, Batangas dakong 11:39 p.m.
Namataan ang episentro ng lindol sa layong 6 kilometro northwest ng nasabing bayan.
Naramdaman ang Intensity III sa Tagaytay City habang Intensity II sa Malabon City.
Umapela ang Metro Manila Development Authority (MMDA) at Metro Manila Disaster Risk Reduction and Management Council (MMDRRMC) sa mga Local Government Units (LGUs) na tumulong sa evacuation at relief operations sa mga apektado ng pagaalburoto ng bulkang Taal.
Ayon kay Michael Salalima, MMDA Public Safety Office and Disaster Risk Reduction and Management focal person head, nagpapatuloy ang evacuation at relief operations sa mga lugar na lubos na apektado ng pagsabog ng bulkang Taal.
Una nang nagtalaga ang MMDA ng mga tauhan para umalalay sa paglilikas ng mga residente.
Kasabay nito, ipinabatid din ni Salalima na maglalagay ang MMDA ng dalawang portable water purifiers sa Santo Tomas, Batangas para sa ligtas na inuming tubig ng mga evacuees.
Maliban dito, mayroon din silang itatalagang radio personnel para sa communication facility sa lugar.
Binalaan ng Department of Trade and Industry (DTI) ang mga negosyanteng mahuhuling nagtataas ng presyo ng face mask.
Ito’y matapos mapaulat na may nagbebenta ng mga face mask sa halagang P200 kada piraso.
Ayon sa DTI, mahaharap sa kaukulang kaso ang mga negosyanteng mapapatunayang nananamantala sa presyo ng face mask lalo na sa N95.
Giit ng ahensya, maitututring anila itong profiteering o labis-labis na paniningil.
Kasabay nito, tiniyak ng DTI na nagpakalat na sila ng mga tauhan na magbabantay at susuri sa paggalaw ng presyo ng mga ibinebentang masks.
Naka alerto na rin ang mga local Disaster Risk Reduction Management Office sa buong Central Luzon dahil sa patuloy na pag-aalburoto ng bulkang Taal.
Handa na rin magpadala ng volunteers ang Pampanga Provincial Risk Reduction Management Office para tumulong sa paglilikas ng mga residenteng nasa malapit sa bulkang Taal.
Ayon kay Pampanga Gov. Dennis Padilla, naaalala nila ang kanilang sitwasyon nuong sumabog ang Mt. Pinatubo.
Ani Padilla, marami ang nagpaabot ng tulong sa kanilang lugar kaya naman ngayon ay handa rin silang tumulong sa mga apektado ng bulkang Taal.
Bukod sa mga volunteers, magpapadala rin ang konseho ng pagkain, hygiene kits, tents, at iba pang mga gamit na kakailanganin ng mga evacuees.
Pinayuhan ni Pangulong Rodrigo Duterte ang mga sundalo na mag-reserba ng bala ng baril para sa kanilang sarili sakaling madukot ng mga terorista.
Sa talumpati sa harap ng Philippine Marine Corps sa Fort Bonifacio, sinabi ng pangulo na mas mabuti pang kitilin ng mga sundalo ang kanilang sariling buhay sa halip na pahirapan ng mga terorista.
Ayon sa pangulo, ayaw niyang makita o mabalitaang dinukot ang kaniyang mga sundalo at tinatratong parang aso habang nasa kampo ng mga terorista at makalipas ng ilang buwan ay maglalabas ng video para ipakita na pupugutin na ang kanilang ulo.
Sinabi ng punong ehekutibo na may mga armas ang mga sundalo na maaari nilang gamitin para patayin ang mga kalaban at magagamit din nila sa kanilang sarili sakaling magkagipitan na.
Kasabay nito, tiniyak ng pangulo sa mga sundalo na hindi pababayaan ng gobyerno ang kanilang pamilya sakaling may mangyari sa kanilang masama dahil sa pagseserbisyo sa bayan.
Ipinag-utos ng Pangulong Rodrigo Duterte na dalhin sa mga lugar na apektado ng pagputok ng bulkan ang lahat ng resources ng pamahalaan.
Ayon sa Pangulo, personal n’yang nais maikot ang lahat ng lugar na apektado ng Bulkang Taal subalit pinaghihinay-hinay s’ya ng kanyang doktor dahil delikado aniya ang abo lalo na sa katulad n’ya na dating naninigarilyo.
Gayunman, sinabi ng Pangulo na posible pa ring mag-ikot s’ya sa Batangas sa pamamagitan ng helicopter.
All government resources have been brought there including the human workers, we have anticipated it and pati mga Marines ko, mga sundalo ko nandun and the resources I said are there yung mga forward supplies they were carried over there 24 hours since its first explosion,” ani Duterte.
Kasabay nito ay binalaan ng Pangulo ang mga negosyante na magtatago at mag-overprice ng N95 masks na ipasasalakay nya ang mga ito sa otoridad.
Sinabi ng Pangulo na handa ang pamahalaan na mamigay ng libre na N95 masks para matiyak ang kaligtasan ng publiko.
Suspendido pa rin ang klase sa lahat ng antas sa Metro Manila, Calabarzon at pasok sa mga tanggapan ng pamahalaan.
Ang Pangulong Rodrigo Duterte pa mismo ang nag-anunsyo sa suspension ng pasok sa government offices at paaralan.
Ayon sa Pangulo, maliit na bagay ang isa pang araw ng sakripisyo para mapangalagaan mula sa ash fall ang kalusugan ng mamamayan.
Yes, it’s not because of anything, it’s public health, we are invoking public health to suspend classes and government workers and hopefully the private sector will follow,” ani Duterte.