DWIZ 882

Hinimok ni Pangulong Rodrigo Duterte ang Philippine Military Academy Alumni Association Incorporated (PMAAAI) na makiisa sa paglaban sa anumang uri pang-aabuso mula sa kanilang hanay.

Bahagi ito ng naging talumpati ng Pangulo sa kanyang pagdalo sa annual general membership meeting ng PMAAAI sa Pasay City.

Ayon kay Pangulong Duterte, hindi dapat hayaan ng PMAAAI na mabahiran ang imahe ng akademiya bilang isang institusyon.

Lalo na’t saan mang bahagi aniya ng pamahalaan, kongreso man o mga ahensiya sa ilalim ng ehekutibo ay may mga nakaupong PMA graduate.

Dagdag ni Pangulong Duterte, dapat mag-ingat ang bawat PMA’yer sa pride na maaaring mauwi sa pagmamayabang at kalauna’y pang-aabuso oras na lumala ito.

Kasabay nito pinangunahan din ng Pangulo ang pagbibigay ng outstanding achievement award ng PMAAAI sa kanyang walong appointees kabilang sina dating PNP Chief at SENADOR RONALD DELA ROSA, AFP chief of staff Filemon Santos Jr. at PNP Chief Archie Gamboa.

There is a reason for a PMA’yer to be proud, proud of his mistahs, proud of his alma mater and proud of the alumni association, proud of himself this is ample reason to be the best so to speak but there is also a reason to fear and a cause to forebode, that pride if uncontrolled can easily degenerate into arrogance and from their the path of abuse open and after that only God knows,” ani Duterte.

Hindi tatantanan ng Philippine National Police (PNP) ang mga drug lords at iba pang mga personalidad na sangkot sa illegal na droga.

Ito ang matapang na pahayag ng bagong PNP Chief P/Gen. Archie Francisco Gamboa matapos na maging ganap ang pag-upo nito bilang pinuno ng 205,000 pulis.

Ayon kay Gamboa, ipinangako niya kay Pangulong Rodrigo Duterte na paiigtingin pa ang kanilang kampaniya kontra illegal na droga, krimen, lalo na ang katiwalian sa kanilang hanay hanggang sa tuluyan itong mawala.

Kasunod nito, nanawagan si Gamboa sa kaniyang mga kapwa pulis na sama-samang ipagpatuloy ang kanilang krusada kontra illegal na droga. — ulat mula kay Jaymark Dagala (Patrol 9)

Makikiusap si Interior and Local Government Secretary Eduardo Año kay Education Secretary Leonor Briones para palawigin ang pagpapagamit sa mga paaralan bilang evacuation center.

Ito’y sakaling wala talagang mahanap ang DILG at ang lokal na pamahalaan ng Batangas na ibang lugar na malilipatan ng mga apektado ng pag-aalburuto ng Bulkang Taal.

Ayon kay Año, makikipagpulong siya sa pamahalaang panlalawigan ng Batangas upang talakayin ang apela ni Briones na huwag nang gawing evacuation center ang mga paaralan.

Batid naman nila na mahalagang makabalik agad ang mga estudyante sa kanilang pag-aaral sa kabila ng epekto ng pag-aalburuto ng Bulkang Taal.

Alinsunod aniya sa panuntunan, hanggang dalawang linggo lamang maaaring gamiting evacuation center ang mga paaralan subalit sa pagkakataong ito, halos dalawang linggo na mula nang mag-alburuto ang bulkan.

Batay sa datos mula sa DepEd, nasa mahigit 7,000 mga paaralan ang apektado ngayon ng pag-aalburuto ng bulkan dahil karamihan ay ginagamit bilang evacuation center. — ulat mula kay Jaymark Dagala (Patrol 9)

Pinalaya na ng Senado ang dalawang testigo sa Good Conduct Time Allowance (GCTA) for sale na humingi sa kanila ng proteksyon.

Ito ay makaraang matapos na ang imbestigasyon ng Senado sa isyu ng GCTA for sale kung saan nakatakda na ang sponsorship speech ni Senador Richard Gordon.

Kahapon, nakalaya na ang mga testigong sina Godfrey Gamboa, dating inmate sa New Bilibid Prison (NBP) at common law wife nitong si Yolanda Camilon, matapos lagdaan ni Gordon ang kanilang release order.

Apat na buwang sumailalim sa senate custody sina Gamboa at Camilon simula noong Setyembre ng nakaraang taon.

Ito ay matapos na tumestigo ang dalawa laban sa ilang opisyal ng Bureau of Corrections (BuCor) na nakikipagsabwatan sa ilang mayayaman at maimpluwensiyang mga preso na naghahangad na makalaya ng maaga sa pamamagitan ng GCTA. — ulat mula kay Cely Ortega-Bueno (Patrol 19)

Isinusulong ni Senador Francis Tolentino ang panukalang batas na naglalayong palakasin ang mga paghahanda at pagresponde ng mga Local Government Units (LGU) sa panahon ng kalamidad.

Ito ay sa gitna na rin ng patuloy na pag-aalburuto ng Bulkang Taal.

Nakasaad sa senate bill number 1272 o disaster risk reduction and management framework act ni Tolentino ang pagsasagawa ng inter disaster drills.

Layunin aniya nitong makabuo ng inter-local government unit response mechanism kung saan kasama ang paghahanap at pagtayo ng permanenteng evacuation center, safe refuge zone, evacuation routes at assembly points.

Nakapaloob din dito ang pagbibigay ng evacuation transport at accommodation para sa tao at mga alagang hayop na apektado ng kalamidad.

Iginiit ni Tolentino, kinakailangang fully equipped at hindi lamang sumailalim sa training kundi may ipatutupad ring komprehensibong plano ang mga LGU’s bilang first responder sa lahat ng klase ng kalamidad. — ulat mula kay Cely Ortega-Bueno (Patrol 19)

Aalamin muna ng Senado ang kabuuang halaga ng available na calamity fund ng pamahalaan, NDRRMC fund at Local Disaster and Risk Reduction Management Fund (LDRRMF).

Ito ang inihayag ni Senador Panfilo Lacson bago aniya aprubahan ang hinihinging P30-B supplemental budget ni Pangulong Rodrigo Duterte para sa mga apektado ng pag-aalburuto ng Bulkang Taal.

Ayon kay Lacson, posibleng naipon ang LDRRMF ng mga apektadong LGU’s kung hindi naman ito nagastos dahil walang tumamang matinding kalamidad sa kanilang lugar sa nakalipas na limang taon.

Aniya, maaari pa nila itong magamit bilang special fund sa kasalukuyang pag-aalburuto ng Bulkang Taal.

Sinabi ni Lacson, kanilang ikukunsidera sa pagtalakay ng senado sa hirit ng Pangulo na supplemental budget, ang posibilidad na may sapat na pondo ang mga lugar na apektado ng pagsabog ng Bulkang Taal.

Binigyang diin naman ni Lacson na hindi ito nangangahulugang hindi niya suportado ang agarang pagpasa nabanggit na budget measure bagkus ay pag-aaral lamang kung sapat o sobra ang hirit na 30-B supplemental budget. — ulat mula kay Cely Ortega-Bueno (Patrol 19)

Masyado pang maaga para matukoy ng World Health Organization (WHO) bilang malala at nakamamatay na sakit ang bagong tuklas na novel coronavirus (2019-nCoV) mula sa China.

Ayon kay WHO Philippine Representative Dr. Rabindra Abeyasinghe, hindi pa sapat ang mga nakuha nilang impormasyon hinggil sa nabanggit na bagong coronavirus.

Sinabi ni Abeyasinghe, sa kasalukuyan ay nakabatay lamang sila sa datos ng mahigit 200 kumpirmadong naitalang kaso ng misteryosong pneumonia-like diesease kung saan nasa apat ang nasawi.

Sa nabanggit aniyang apat, tatlo sa mga ito ang nakitaan ng iba pang malalang kondisyon sa kalusugan na posibleng nakapagpalala sa sakit.

Too early now to say that it is a very severe infection that causes death, we are in the early stages of trying to understand how severe this infection is and how many deaths it is likely to cause,” ani Abeyasinghe.

Tiniyak naman ni Abeyasinghe na mahigpit nang nakikipag-ugnayan ang WHO sa Chinese health authorities hinggil sa nCoV.

As soon as we have access to such information that is reliable and verified we will share it not only to the Philippines but with other member states also. We are making every effort, WHO has activated a 3-level incident management team which includes the headquarters, regional office and country of it is in China and we are closely following the situation including Chinese authorities,” ani Abeyasinghe.

Tuloy na ang pilot testing para sa mga motorcycle taxis na tulad ng Angkas, Joy Ride at Move It.

Ito ang kinumpirma ni Transportation Interagency Technical Working Group Chairman Antonio Gardiola matapos ang pakikipagpulong kay Transportation Secretary Arthur Tugade at tatlong motorcycle taxi players, kahapon.

Ayon kay Gardiola, maganda ang kinalabasan ng kanilang pag-uusap kung saan napagkasunduang ipagpatuloy ng TWG ang pag-aaral hinggil sa operasyon ng mga motorcycle taxis.

Dagdag ni Gardiola, maliban sa mga nauna nang inilatag na panuntunan para sa pilot testing, may mga bago rin silang napagkasunduan.

Kabilang aniya rito ang pagtatakda ng mas mataas na capping o bilang ng pumapasadang riders sa Metro Manila.

Gayundin ang karagdagang lugar para sa pag-aaral sa operasyon motorcycle taxis.

Pinag-usapan, pinag-aralan kung talagang kulang kasi yun ang nagiging issue ngayon, we agreed upon, ay tinaasan natin ang cut natin and we even added area of the study para mapalawak ang pag-aaral natin. Itinataas natin ang 15,000 per participants bale sa Metro Manila 4-5,000, so yung dati pa din yung sa Cebu natin tig-3,000 sila, ang nadagdag nating area sa study is Cagayan De Oro kung saan magkakaroon din sila ng  tig- 3,000,” ani Gardiola. — panayam mula sa Teka, Teka (alas 4:30 na!)