Nagbukas ng oportunidad ang bansang Germany para sa 550 Filipino nurse.
Ayon sa Philippine Overseas Employment Administration (POEA), aabot sa mahigit P100,000 ang sahod kada buwan na matatanggap ng kwalipikadong nurse.
Maliban dito, malaki rin ang tyansang makakuha ng permanent residence ang mga nurse na magtatrabaho dito.
Mula 2013, umaabot na umano sa 800 Filipino nurse ang napadala sa Germany.
Aabot sa 2,000 pamilya ang naapektuhan ng sunog na sumiklab sa Jolo Sulu.
Batay sa ulat, nagsimula ang sunog sa isang bunkhouse at mabilis na kumalat ito sa mga kalapit barangay.
Agad namang rumesponde ang lokal na Bureau of Fire Protection para apulahin ang sunog na tumagal ng halos 4 na oras.
Sa ngayon ay inaalam pa ng mga otoridad ang tunay na sanhi ng sunog at kabuuang halaga ng ari-ariang natupok ng apoy.
Nanawagan ang Gabriela Partylist sa mababang kapulungan ng kongreso para magsagawa ng imbestigasyon sa ‘di umano’y kwestyonableng paggasta sa confidential fund ng Department of Information and Communications Technology (DICT).
Kasunod ito ng naging pagbibitiw ni DICT Usec. Eliseo Rio sa kanyang posisyon dahil sa kwestyobale umanong disbursement sa 300-M na pondo ng DICT.
Ayon sa Gabriela, ang naturang rebelasyon ay posibleng mag turo pa sa mas marami pang mga illegal na paggamit ng pondo ng ahensiya.
Nanawagan naman ang grupo sa iba pang opisyal ng gobyerno na lumabas at magsalita ukol sa mga anomalayang nagaganap sa kani – kanilang mga ahensiya.
Iniimbestigahan na ng Department of Health (DOH) ang hinihinalang kaso ng isang Pilipino na mayroong novel coronavirus (2019-nCoV ARD).
Ayon kay DOH Eastern Visayas Regional Director Dr. Minerva Molon, dumating ang babae sa Leyte noong January 26 matapos ang kanyang byahe sa Macau at Hong Kong, dalawang teritoryo ng China na may mga kumpirmadong kaso ng nCoV.
Nakaranas ng sore throat at ubo ang babae noong dumating ito sa bansa at kasalukuyang naka – confined sa isang pagamutan sa syudad.
Simula umano ng madala ito sa ospital ay umayos na ang kalagayan nito ngunit kinakailangan pa rin itong manatili sa pagamutan at ma- quarantine ng 14 na araw.
Ang naturang biktima ang kauna – unahang non – Chinese na hinihinalang mayroong nCoV sa rehiyon.
Arestado ang isang hinihinalang Thai drug mule sa Ninoy Aquino International Airport (NAIA).
Ayon sa NAIA – inter agency drug interdiction task group ng PDEA – NCR, nakuha sa suspek na si Pakijira Janwong, 27 anyos ang 4.1 kilong shabu papasok sa bansa.
Tinatayang nagkakahalaga ng P28-M ang naturang illegal na droga na itinago sa maleta ng dayuhan.
Nai- turn over na sa PDEA laboratory service ang nakumpiskang kontrabando para sumailalim pa sa mga pagsusuri.
Nahaharap naman sa kasong kriminal ang suspek dahil sa paglabag sa republic act number 9165 o the comprehensive dangerous drugs act of 2002.
Posibleng makasuhan ang isang lalaking nagbirong mayroon siyang 2019 novel coronavirus sa Legazpi City.
Ayon kay ulat, nakitang nahimatay at nanginig pa sa harap ng isang mall si Marlon De Vera na naging dahilan para magpanic ang mga tao lalo pa’t mayroong 2019-nCoV ARD scare ngayon.
Ginawa ng lalaki ang prank para mapagkamalang tinamaan ng naturang sakit at makakuha ng atensiyon.
HumingI na ng paumanhin ang lalaki ngunit posible pa rin siyang maharap sa kasong alarming scandal.
Pinapurihan ng World Health Organization (WHO) ang pamahalaan ng Pilipinas sa pagharap nito sa 2019 novel coronavirus (2019-nCoV ARD).
Ayon kay WHO country representative in the Philippines Dr. Rabinda Abeyasinghe, kuntento ang WHO sa mga aksyon na ginagawang Pilipinas para masolusyunan at makontrol ang naturang sakit.
Naging proactive aniya ang pamahalaan dahil naging alerto ito at hind nagkait ng impormasyon sa publiko.
Mahigpit aniya ang ginawang pakikipag-ugnayan ng DOH sa WHO para ma update sa fact – based developments and approach mula sa mga medical experts.
Kaya naman dahil dito ay naniniwala ang WHO na kakayanin ng Pilipinas na makontrol at matigil ang outbreak ng naturang coronavirus.
Nagdeklara ng state of emergency ang Mactan – Cebu International Airport Authority (MCIAA) kasunod ng ipinatupad na travel ban ng gobyerno sa lahat ng manggagaling sa China, Hong Kong at Macau.
Ayon kay MCIAA General Manager Steve Dicdican, dahil sa naging deklarasyon ay binibigyan nito ng otoridad ang airport authorities para mag invoke ng police powers at magsakatuparan ng emergency procurement.
Samantala, dahil sa travel ban hindi pinayagang pumasok sa cebu ang 121 dayuhan mula sa China at special administrative regions nito.
Habang ang halos 80 mga Pilipino na kasama sa naturang mga eroplano ay pinapasok naman sa bansa ngunit kinakailangan na sumailalim sa 14 na araw na quarantine.
Pinag-iingat ng Department of Labor and Employment (DOLE) ang mga Overseas Filipino Workers laban sa 2019 novel coronavirus.
Ayon kay Labor Secretary Silvestre Bello III, dapat na umiwas ang mga OFW sa mga mataong lugar, gumamit ng facemask, palagiang paghuhugas ng kamay, paggamit ng alcohol at iwasan ang paglapit sa mga farm at wild animals.
Pinayuhan din ang mga ito na agad na iulat sa embahada o sa pinakamalapit na ospital sakaling mayroong kapwa Pilipino na makikitang may sintomas ng nCoV
Siniguro naman ni Bello na nakatutok ang ahensiya sa anomang development sa naturang sakit.
Nasa 200 mga biyahero mula China at special administrative regions nito ang dumating sa Mactan Cebu International Airport Authority (MCIAA) kahapon, Pebrero 2.
Ayon kay MCIAA General Manager Atty. Steve Dicdican, 79 sa nabanggit na bilang ang mga Filipinong balik bansa na kasalukuyan na aniyang sumasailalim sa self-quarantine.
Habang ang mga nalalabing pasahero naman ay hindi pinayagang makapasok ng bansa at agad nang pinabalik sa lugar na kanilang pinanggalingan.
Dagdag ni Dicdican, lumagda rin sila sa isang memorandum para magdeklara ng state of emergency sa Mactan Cebu International Airport.