DWIZ 882

Aprubado sa Pangulong Rodrigo Duterte ang mahigit sa P2-bilyong pondo para sa pagbili ng personal protective equipment para sa mga health workers.

Ayon kay Health Secretary Francisco Duque III, mahalaga ito para hindi mahawa at hindi rin makahawa ang mga health workers na front liners sa paglaban sa 2019 novel coronavirus acute respiratory disease (2019 nCoV-ARD).

P1,500 anya ang presyo ng isang set ng  personal protective equipment na ipagkakaloob sa may 5,000 health workers sa mga ospital ng pamahalaan.

Batay anya sa kanilang pagtaya, posibleng tumagal ng tatlong buwan ang problema sa 2019 nCoV-ARD kaya’t kailangang protektado ang mga health workers sa kahit anong shift sila maitalaga.

Samantala, naglaan rin anya ang pamahalaan ng mahigit sa P10-milyon para pambili ng face masks na ibibigay naman sa lahat ng pasyente ng mga ospital ng pamahalaan.

Sinabi ni Duque na nais rin ng pangulo na magkaroon ng isang ambulansya na nakalaan lamang sa mga posibleng maging positibo sa 2019 nCoV-ARD.

Kumikilos na rin ang Metro Manila Disaster Risk Reduction and Management Council (MMDRRMC) na binubuo ng mga alkalde para mapigilan ang pagkalat ng 2019 novel coronavirus acute respiratory disease (2019 nCoV-ARD).

Ayon kay MMDA General Manager Jojo Garcia, mayroon nang hotlines ang bawat syudad sa Metro Manila kung saan pwedeng humingi ng tulong ang sinumang mayroong sintomas ng 2019 nCoV-ARD.

Sinabi ni Garcia na halos lahat na rin ng syudad sa Metro Manila ay mayroon nang kanya-kanyang isolation tents.

May ispesyal naman anyang papel ang Parañaque Local Government Unit (LGU) kung saan sila ang titiyak na walang mayroong sintomas ng 2019 nCoV-ARD sa mga manggagawa ng Philippine Offshore Gaming Operators (POGO).

Samantala, ang Philippine National Police (PNP) naman anya ang responsable sa sapilitang pagdadala ng mga hinihinalang 2019 nCoV-ARD patients na ayaw magpa-checkup sa ospital.

Itinanggi ng Philippine Hospital Association in the Philippines (PHAP) na may mga private hospitals na tumatanggi sa mga hinihinalang infected ng 2019 novel coronavirus acute respiratory disease (2019 nCoV-ARD).

Tiniyak ni Dr. Rustico Jimenez, pangulo ng PHAP, na agad nilang ipagbibigay-alam sa pamahalaan sakaling may mga pasyente sila na posibleng mayroong 2019 nCoV-ARD.

Ayon kay Jimenez, lahat naman ng ospital ay mayroong infectious room kung saan pwedeng manatili ang isang pasyente na hinihinalang infected ng virus habang sinisiyasat pa ang kanyang history lalo na ng kanyang mga biyahe.

Gayunman, duda si Jimenez kung kakayanin ng mga private hospitals na ma-accommodate ang lahat sakaling dumami ang ma infect ng 2019 nCoV-ARD sa Pilipinas.

Kailangan kasi anya sa ganitong kaso ang negative pressure room na iilang pribadong ospital lamang ang mayroon.

Dumulog na ang Bureau of Customs (BOC) sa Philippine Navy at Philippine Coast Guard (PCG) upang bantayan ang mga entry points ng Pilipinas kung saan posibleng ipinapasok ang frozen products mula sa China na mayroong African Swine Flu (ASF).

Ayon kay Customs Commission Vincent Philip Maronilla, hindi kaya ng BOC na tauhan ang lahat ng entry points ng Pilipinas.

Mayroon rin anyang posibilidad na sa mga pribadong daungan idinadaan ang mga smuggled na karne na may ASF.

Bukod po do’n, nakapag-purchase na rin po kami noong 2017 –2016 at 2017, ng mga pailan-ilan na watercraft para po ma-reactivate ‘yung water patrol unit namin na matagal na pong hindi nag-ooperate. Para at least po doon sa mga areas na kakayanin ng mga watercrafts na ‘to, ng mga speedboats na aming nabili, e, makatulong din po kami sa ating Philippine Coast Guard,” ani Maronilla.

Maliban sa paggamit ng backdoor, sinabi ni Maronilla na mayroon ring ibang modus ang mga smugglers.

Minsan ginagamitan pa ng night vision goggles, kumba ida-damp po nila, lalagay sa isang lalagyan na nagfo-flow sa dagat at ida-damp po ‘yon sa dagat, at habang nakafloat po ‘yon, may maliliit na lantsa na walang ilaw, naka-night vision goggles lang sila at kukunin ‘yung mga nakafloat na ‘yon para hindi po madetect sa gabi ‘yung mga ini-smuggle na mga produkto,” ani Maronilla. —sa panayam ng Ratsada Balita

Istranded ngayon sa sariling bansa ang mga Overseas Filipino Workers (OFWs) na nakabakasyon mula sa trabaho.

Inabutan ang mga OFWs ng ban sa pagbiyahe patungo at pabalik ng China, Hong Kong at Macau dahil sa banta ng 2019 novel coronavirus acute respiratory disease (2019 nCoV-ARD).

Batay sa datos ng Department of Labor and Employment (DOLE), nasa 30 OFWs ang nanunuluyan ngayon sa dormitoryo ng Overseas Workers Welfare Administration (OWWA).

Ayon kay Labor Usec. Renato Ebarle, ang mga istranded na OFWs ay tatanggap ng tag-P10,000 na kompensasyon at pamasahe pauwing muli sa kanilang mga probinsya.

Nanindigan ang pamahalaan na huwag munang payagan ang mga OFWs na narito sa bansa na makabalik sa kanilang employers sa China, Hong Kong o Macau.

Inamin ni Department of Information and Communications Technology (DICT) Undersecretary Eliseo Rio na mayroon silang pagkakaiba ng opinyon ni Dict Secretary Gregorio Honasan.

Kaugnay anya ito sa paggamit sa confidential fund ng Dict.

Ayon kay Rio, una nang pinuna ang maling proseso ng pagpapalabas ng confidential fund na una na ring sinita ng Commission on Audit (COA).

Naniniwala rin si Rio na ang confidential fund ay hindi dapat ginagamit sa surveillance dahil hindi ito kabilang sa mandato ng DICT.

Ang mandato anya ng ahensya ay tiyaking ligtas sa cyberattack ang lahat ng information infrastructure sa bansa.

Irereport niya ‘yan sa isang law enforcement agency at sila po ‘yung –they have the capability to identify… sila po ang nangangailangan ng intelligence o confidential funds, pero iba naman po ang posisyon ni Secretary Honasan at syempre siya ang secretary, sya po ang masusunod. ‘Yun na nga po ang difference ng aming opinion tungkol sa paggamit ng confidential fund,” ani Rio. —sa panayam ng Balitang Todong

Nakasalalay kay Pangulong Rodrigo Duterte kung tatanggapin o hindi ang pagbibitiw sa puwesto ni Department of Information and Communications Technology (DICT) Undersecretary Eliseo Rio.

Ayon kay Rio, nagpasya syang magbitiw sa puwesto upang makausap ang pangulo hinggil sa anya’y hindi tamang nangyayari sa DICT.

Aminado si Rio na hindi maganda ang kanyang working relationship sa mga undersecretaries at assistant secretaries na binitbit sa ahensya  ni DICT Secretary Gregorio Honasan.

Ang punto rito ay, kung ako ay amgsusumbong lang, syempre sasabihin ng tao –‘ay gusto niya lang makuha ulit ang pwesto niyan’, ‘di ba? So, ‘yun ang iniiwasan ko. SO, nagpasya ako na magresign nalang dahil ‘yung working condition sa DICT ay talagang iba na. ‘Yung mga aking –or naumpisahan ng mga programs, mga targets, umiba na talaga,” ani Rio.

Ayon kay Rio, sinubukan nyang magsabi kay Honasan hinggil sa problema nya sa mga undersecretaries at assistant secretaries nito.

Gayunman, sinabihan anya sya ng kalihim na sana ay huwag silang dumating sa punto na kailangan nyang mamili.

Dahil dito, sinabi ni Rio na nagpasya na lang syang umalis upang hindi na mahirapang mamili si Honasan.

Kino-complain ko na sa kanya, hindi na talaga ko makapagtrabaho with some of the usec that you brought in, e sabi niya, ‘wag mo sana akong papiliin between them and you’, ibig sabihin niyan na para hindi na siya mahirapan, ako na ang nagresign,” ani Rio. —sa panayam ng Balitang Todong Lakas

Naka-heightened alert ngayon ang Bangsamoro Autonomous Region in Muslim Mindanao (BARMM) dahil sa banta ng novel corona virus.

Batay sa pahayag na inilabas niBARMM Minister of Health Safrullah Dipatuan, isinailalim sa “code white” ang buong rehiyon para maging handa rin ang kanilang mamamayan sa banta ng nCoV.

Kasabay nito, mahigpit din binabantayan ng mga otoridad ang lahat ng pumapasok sa kanilang rehiyon upang makaiwas sa pagkalat ng nasabing sakit.

Positibo ang  naging pananaw ni Sen. Aquilino ”koko” Pimentel III sa naging hakbang ni Pangulong Rodrigo Duterte na magpatupad ng travel ban sa China dahil sa outbreak ng 2019 novel corona virus.

Ayon kay Pimentel, bagama’t nahuli ang nasabing hakbang mas mabuti na rin ito kaysa hindi na talaga ipinatupad.

Ani Pimentel, hindi agad-agad ipinag utos ng pangulo ng travel ban dahil kailangan ng panahon para pag-aralan ito dahil marami umano ang maaaring maapektuhan.

Tiniyak ni Pangulong Rodrigo Duterte na handa ang gobyerno na ipaalam sa publiko ang lahat ng kailangan malaman tungkol sa 2019 novel coronavirus sa Pilipinas.

Ayon sa pangulo walang itatago ang gobyerno at magiging transparent ito sa publiko.

Aniya kahit pa ang impormasyon ay maglilikha ng pangamba sa publiko ngunit ito naman ang totoo ay isasapubliko ito ng gobyerno.

Wala umanong kailangan itago dahil maraming buhay ang nakasalaylay dito.