DWIZ 882

Hindi kabilang ang palarong pambansa sa mga posibleng makanselang event dahil sa pangambang dulot ng novel coronavirus acute respiratory disease (2019-nCoV ARD).

Ito ang ginawang paglilinaw ng Department of Education (DepEd) matapos ihayag ni Secretary Leonor Briones sa pagdinig ng Senado na kabilang sa mga ipagpapaliban na event ng ahensiya ang palarong pambansa.

Sa isang facebook post, inanunsyo ng DepEd na magpapalabas sila ng memorandum hinggil sa listahan ng mga makakanselang event na ipo-post sa website at social media accounts ng ahensiya.

Iginiit naman ng DepEd na hindi kabilang sa mga kanseladong event ang palarong pambansa dahil opisyal pa itong magsisimula sa mayo.

Ilan naman sa mga isinasagawang national events ng DepEd tuwing Pebrero ang National Science and Technology Fair, National Festival of Talents at National Schools Press Conference.

Mananatiling bukas ang mga pantalan sa buong Pilipinas para sa lahat ng mga dadaong na barko kabilang na ang mga magmumula sa China at mga special administrative regions nito tulad ng Hong Kong.

Ito ang inihayag ng Philippine Ports Authority (PPA) sa gitna na rin ng pangambang hatid ng novel coronavirus acute respiratory disease (2019-nCoV ARD).

Ayon kay PPA General Manager Jay Santiago, hindi maaaring magpatupad ng entry ban sa mga barko dahil mapaparalisa nito ang import at export ng bansa na makakaapekto rin sa suplay ng ilang mga bilihin.

Gayunman, binigyang diin ni Santiago na pagbabawalan namang pababain ng barko ang mga tripulanteng nanggaling sa China at mga special administrative regions nito sa nakalipas na 14 na araw.

Sakali naman aniyang magpapalit ng mga tripulante ang dumaong na barko, kinakailangan aniyang sumailalim sa 14 na araw na quarantine ang pinalitang crew at papayagan lamang makauwi ng bahay kapag pinayagan na ng Department of Health (DOH).

Nilinaw naman ni Santiago na hindi na kakailanganin pang sumailalim sa mga nabanggit na panuntunan ang mga dadaong barko kung nakalipas na ng 14 na araw magmula ng magtungo ito sa China at mga rehiyon nito.

Kinastigo ng mga senador si Health Secretary Francisco Duque III sa pagharap nito sa pagdinig ng senate committee on health hinggil sa novel coronavirus acute respiratory disease (2019-nCoV ARD).

Ito ay matapos lumitaw na mabagal ang isinasawang contact tracing sa mga pasahero na nakasabay sa eroplano ng dalawang Chinese nationals na nagpositibo sa 2019-nCoV ARD sa bansa.

Sa naging pagtatanong ni Senadora Nancy Binay, sinabi ni Duque na nasa 17% pa lamang mula sa 351 pasaherong nakasabay ng dalawang Chinese ang kanilang nako-contact.

Katwiran ni Duque, hindi nakikipagtulungan sa kanila ang Philippine Airlines at Cebu Pacific kung saan ayaw aniya ibahagi ng mga ito ang contact details ng mga pasahero dahil sa confidentiality.

Gayunman pinabulaan ito ni Philippine Airlines Vice President for Security Cesar Ronnie Ordoyo at iginiit na kanila nang ibigay ang mga impormasyon hinggil sa mga pasahero sa bureau of epidemiology bilang bahagi ng protocol.

Kasunod nito, itinuro ni Duque si DOH bureau of epidemiology chief Dr. Ferchito Avelino at iginiit na kaniya pang aalamin ang proseso hinggil sa contact tracing.

Dahil naman dito, kinuwestiyon nina Senador Francis Pangilinan at Panfilo Lacson ang sitwasyon ng unity of command sa DOH.

Anila, tila nagkaroon ng failure of leadership si Duque sa paghawak sa isyu ng 2019-nCoV ARD sa bansa.

Mahigpit na binabantayan ng Department of Health (DOH) ang kalagayan ng posibleng pangatlong kumpirmadong kaso ng novel coronavirus acute respiratory disease (2019-nCoV ARD) sa Pilipinas.

Ayon kay Health Secretary Francisco Duque III, bukas pa nila malalaman ang resulta ng isinasagawang verification sa pasyente at agad ding iuulat ang resulta nito sa publiko.

Aniya, sa ngayon ay dalawa pa lamang ang kumpirmadong kaso ng 2019-nCoV ARD sa bansa.

Una nang kinumpirmang may 2019-nCoV ARD ang isang 38 taong gulang na babaeng turistang Chinese.

Habang ang ikalawang kumpirmadong kaso naman ay ang partner nitong 44 na taong gulang na lalaking Chinese na nasawi noong February 2, linggo.

Dagdag ni Duque, sa kasalukuyan pumalo na sa 155 ang kabuuang bilang ng mga persons under investigation (PUI) dahil sa 2019-nCoV ARD kung saan 12 na sa mga ito ang na-discharge o pinalabas na ng mga ospital.

Natapos na ng Department of Justice (DOJ) ang kanilang isinagawang pag-aaral hinggil sa implikasyon ng posibleng pagbasura sa Visiting Forces Agreement (VFA) sa pagitan ng Pilipinas at Estados Unidos.

Ayon kay Justice Secretary Menardo Guevarra, kanila nang isusumite ang resulta ng nabanggit na pag-aaral sa tanggapan ng Pangulo ngayong linggo.

Aniya, ipauubaya na lamang nila kay Pangulong Rodrigo Duterte ang pagpapasiya sa kanilang naging impact assessment.

Kasama sa pinag-aralan ng DOJ ang legal procedure sa pagbasura sa VFA gayundin ang posibleng maging epekto nito sa Enhance Defense Cooperation Agreement (EDCA).

Magugunitang inatasan ni Pangulong Duterte ang DOJ na magsagawa ng preliminary impact assessment sakaling tuluyan nang maibasura ang VFA. — ulat mula kay Bert Mozo (Patrol 3)

Nilagdaan na ng mga opisyal ng Pilipinas at Kuwait ang isang kasunduan hinggil sa standard employment contract ng mga Pilipinong household workers sa Kuwait.

Kasunod ito ng dalawang araw na joint committee meeting ng technical working group ng Pilipinas at Kuwait.

Layunin ng binuong standard contract ang mabigyan ng mas maigting na proteksyon ang mga Filipino household workers sa Kuwait.

Nakapaloob sa kontrata ang mga probisyon tulad ng panghahawakan ng mga Filipino house hold workers ang kanilang mga pasaporte at mobile phone, pagtukoy sa oras ng kanilang trabaho at pagtulog at pagkakaroon ng isang araw na day off.

Dumating delegasyon ng Pilipinas sa Kuwait noong Sabado sa pangunguna ni Labor Secretary Silvestre Bello III ang delegasyon ng Pilipinas kasama sina Labor Undersecreatry Claro Arellano, POEA Administrator Bernard Olalia at OWWA Administrator Hans Leo Cacdac. — ulat mula kay Bert Mozo (Patrol 3)