DWIZ 882

Pinag-aaralan na ng Department of Agriculture (DA) ang pagtatakda ng suggested retail price (SRP) sa galunggong.

Sa gitna ito ng mahal na bentahan ng galunggong sa mga palengke na halos umabot na sa P260 ang kada kilo mula sa dating P160 sa mga nagdaang buwan.

Ayon kay Agriculture Secretary William Dar, hindi dapat umabot sa P200 ang presyo ng galunggong kahit pa umiiral ang closed fishing season mula pa noong Oktubre.

Plano rin ni Dar na kanselahin ang pagdating ng nasa 18,000 metriko tonelada ng imported na galunggong mula sa China at Vietnam.

Sinabi ni Dar na dapat ay hanggang nitong Enero lamang ang pag-aangkat ng isda.

Inirekomenda ng Department of National Defense (DND) sa Philippine Military Academy na ipagpaliban muna ang gaganaping homecoming sa Baguio City.

Ito’y matapos isailalim sa lockdown ang lungsod dahil sa banta ng 2019 novel coronavirus.

Ayon kay Defense Sec. Delfin Lorenzana ito ay para maiiwas ang kadete, PMA alumni at maging ang kanilang pamilya sa nasabing virus.

Maliban dito sinabi rin ni Lorenzana na suportado ng DND ang desisyon ng PMA na pansamantalang isara ang kanilang kampo mula sa mga bisita o taga labas sa gitna pa rin ng banta ng nCoV.

Una rito, inanunsyo ni Baguio City Mayor Benjamin Magalong ang pagpapatupad ng mandatory city-wide lockdown para sa mga turista o bisita ng lungsod matapos makumpirma ang kauna-unahang kaso ng nCoV sa bansa.

Bumaba sa 7.9 million ang bilang ng mga filipinong walang trabaho sa ika-apat na bahagi ng 2019 ayon sa survey ng Social Weather Stations (SWS).

Mas mababa ito ng halos 4% o mula sa 10 milyong walang trabaho na naitala nuong September 2019.

Itinuturing ng SWS na “jobless adults” ang mga nagbitiw mula sa kanilang trabaho, naghahanap pa lamang ng trabaho at nawalan ng trabaho dahil sa problema sa kumpanyang kanilang pinapasukan.

Naging katuwang ang Filipino community sa iba’t ibang bansa para sa pagpapakalat ng tamang impormasyon upang mapigilan ang pagkalat ng 2019 novel coronavirus.

Ayon kay Consul General Val Roque ng Philippine Embassy sa Bangkok, Thailand, nuon pang nakaraang buwan sila nagpalabas ng mga paalala mula sa health experts para mapangalagaan ang kalusugan ng tinatayang 28,000 mga Pinoy sa nasabing bansa.

Nagkaroon din ng information session para sa Filipino community sa Germany para maunawaang mabuti ang nCoV at kung papaano makakaiwas dito.

Nagpaalala rin sa mga Pilipino ang Embahada ng Pilipinas sa Kuala Lumpur, Malaysia para sa tamang personal hygiene, pag-iwas sa matataong lugar at tamang paraan ng pagbahing at pag-ubo.

Kasabay nito, hinikayat ng nabanggit na mga embahada ang mga pilipino na agad magpatingin sa doktor sakaling makaramdam ng anumang sintomas ng pagkakaroon ng nCoV.

Nagpapatupad na ng no contact policy ang National Capital Region Police Office (NCRPO) sa harap na rin ng banta ng novel coronavirus (nCoV) sa bansa.

Sa isinagawang pulong balitaan sa Station 10 ng Quezon City Police District kahapon Pebrero 4, tumanggi munang makipagkamay na tulad ng nagkagawian si NCRPO Director Major General Debold Sinas sa 5 District Directors nito.

Nakasuot na rin ng facemask ang 5 Heneral ng NCRPO at kanilang mga tauhan alinsunod na rin sa kautusan ni PNP Chief Police General Archie Gamboa para makaiwas sa epekto ng nabanggit na virus ang mga pulis.

Gayunman, itinanggi ni Sinas na nagpapatupad sila ng no facemask no entry policy sa mga istasyon ng pulisya sa Metro Manila.

Paliwanag ni Sinas, ilang mga tauhan lamang ng NCRPO ang nagtatanong sa ilang mga bumibisita kung nagtungo ang mga ito sa China o may kasamahan at kakilalang nagmula sa nabanggit na bansa.

Ikinadismaya ni NCRPO Director Police Major General Debold Sinas ang pagkakakumpiska pa rin ng ilang mga ipinagbabawal na kontrabando sa loob ng New Bilibid Prison (NBP) sa Muntinlupa City.

Ayon kay Sinas, may mga nakuha pa ring iligal na droga sa loob ng bilibid tulad ng marijuana, shabu, cocaine at party drugs sa kanilang ikinasang oplan galugad kasama ang Bureau of Corrections noong Lunes.

Sinabi ni Sinas, target sana nilang makumpiska ang mga cellphone ng mga inmate na ginagamit pa rin umano para sa transaksyon ng mga sindikato ng iligal na droga sa loob ng bilibid.

Gayunman nasa 7 cellphone lamang aniya ang kanilang nakuha dahil may mga nakapagtimbre na sa ikinasa nilang operasyon.

Maliban sa mga iligal na droga, nakumpiska rin ng NCRPO at BuCor ang ilang mga ipinagbabawal na kagamitan tulad ng mga alak, sigarilyo, patalim, highly combustes materials tulad ng gasolina, pera, baraha, sex toys, appliances, alahas, gamit sa pagtatatto at mga hand tools—ulat mula kay Jaymark Dagala (Patrol 9).