DWIZ 882

Mapanganib na sundan ang quo warranto petition na inihain ng Solicitor General laban sa ABS-CBN.

Ayon kay House deputy speaker Johnny Pimentel, posibleng maging daan ito upang lalong lumakas ang loob ng Office of the Solicitor General (OSG) na maghain ng mga kaso kung may interes sila sa iba pang mga kumpanya.

Nangangamoy krisis rin anya sakaling maaprubahan sa kongreso ang renewal ng prangkisa ng ABS-CBN at pinagbigyan ng Korte Suprema ang quo warranto petition ng OSG.

Gayunman, aminado si Pimentel na bagamat noong nakaraang taon pa mayroong nakahaing panukalang batas para sa renewal ng prangkisa ng ABS-CBN, hindi pa ito inaaksyunan ng committee on legislative franchises.

Posibleng hindi na magpalabas ng warrant of arrest ang korte laban kay Senador Antonio Trillanes at 10 iba.

Si Trillanes, Peter Advincula at iba pa ay kinasuhan ng conspiracy to commit sedition dahil sa paglikha ng “Bikoy videos” kung saan isinasangkot sa illegal drugs ang pamilya ni Pangulong Rodrigo Duterte.

Ayon kay Department of Justice (DOJ) undersecretary Markk Perete, spokesman ng DOJ, maaari kasing unahan na ng mga akusado ang korte at maghain na ng pyansa bago pa mailabas ang warrant of arrest.

Mula sa halos 30 kinasuhan sa DOJ, labing isa lamang ang nakitaan ng sapat na ebidensya upang iakyat sa korte ang kaso.

Sinabi ni Perete na ang mga kinasuhan ay yun lamang napatunayang may direktang kaugnayan sa paglikha ng “Bikoy videos”. —sa panayam ng Ratsada Balita

Inilunsad ng Department of Health (DOH) ang novel coronavirus tracker website.

Ayon sa DOH, sa halip na hinihintay ng publiko ang anunsyo ng ahensya kung mayroon bang kumpirmadong kaso ng 2019 novel coronavirus acute respiratory disease (2019 nCoV-ARD) sa kanilang lugar, maaari na ngayon itong makita sa pamamagitan ng website.

Sa website ay may makikita umanong mapa kung saan malo-locate ang lugar na mayroong person under investigation (PUI).

Makikita rin umano sa website kung gaano karaming pui ang na-aadmit sa ospital at ilan na rin sa mga ito ang nadischarge.

Ang nCoV tracker website ay may link na https://ncovtracker.doh.gov.ph.

Nanumpa na kay PNP Chief Gen. Archie Francisco Gamboa ang nasa 310 bagong pulis.

Ito’y kasabay ng pagdiriwang sa ika-29 anibersaryo sa pagkakatatag ng National Capital Regional Police Headquarters (NCRPO) sa Camp Bagong Diwa sa Taguig City.

Sasailalim ang mga bagong recruit sa anim na buwang pag-aaral at physical training bago sila sumabak muli sa anim na buwang field training program.

Sa nasabing training ay itatalaga ang mga pulis sa iba’t-ibang istasyon ng pulisya para matuto sa imbestigasyon, traffic at pagpapatrolya.

Disinfect ang mga “grab rails” o hawakan sa lrt 2.

Ito’y bilang hakbang para maiwasan ang pagkalat ng 2019 novel coronavirus.

Bagama’t wala pa umanong kumpirmasyon na airborne ang nasabing virus, kailangan pa rin tiyakin ang kaligtasan ng nakararami sa pamamagitan ng pagpapatupad ng mga health measures lalo na sa mga matataoong lugar.

Aminado si Pangulong Rodrigo Duterte na hindi niya kayang tuldukan ang kurapsyon sa pamahalaan.

Sa talumpati sa harap ng mga miyembro ng Chinese-Filipino Business Club Inc. sinabi ng Pangulo na bagama’t malabo niyang mapigilan ang kurapsyon ay makakatulong ang maraming negosyante sa bansa para mabawasan ang pagiging talamak nito.

Ayon kay Pangulong Duterte maaaring namang i-report ng mga negosyante sakaling may malaman silang insidente ng pagnanakaw o uri ng kurapsyon.

Tiniyak pa ng Pangulo na makakakuha ng insentibo ang mga negosyanteng maglalakas loob na magsumbong sa mga tiwaling opisyal o tauhan ng gobyerno.

Kasabay nito, hinikayat ni Pangulong Duterte ang mga negosyante na huwag matakot sakaling mayroong gumigipit sa kanila.

 If there is (someone) threatening you, tell me kung sino yan, at paluluhurin ko ‘yan sa harap ninyo. Really. Wag kayo matakot, kasi kayo rin ang kawawa… And as my practice, I will call him to my office with you, at pakinggan ko sa kanya kung ano, bakit nagka ganoon. Kung makita ko may kasalanan, p*tang i*a, asahan mo talaga, sasampalin ko ‘yan sa harap mo. I have done that many times already. I have done that to an undersecretary. May sinipa na rin ako noon na direktor,” ani Duterte.