DWIZ 882

Nakalabas na ng ospital si Philippine National Police (PNP) chief General Archie Gamboa isang araw matapos na masugatan sa pagbagsak ng kanyang sinasakyang chopper sa Laguna.

Ayon kay PNP acting spokesman Major General Benigno Durana Jr., maayos na ang kalusugan ng PNP chief matapos na magtamo ng minor injury.

Kasama rin ni Gamboa na nakalabas ng pagamutan ay ang kanyang aide de camp na si Capt. Keventh Gayramara.

Samantala, nanatili namang nasa pagamutan ang iba pang opisyal at kasama ni Gamboa sa bumagsak na chopper.

Sinabi ni Durana na nais na ring lumabas sa pagamutan ni PNP spokesman Brig. Gen. Bernard Banac bukas ngunit nakasalalay pa rin ito sa magiging desisyon ng mga doktor.

Habang nanatili namang unstable ang kalagayan nina PNP Comptrollership chief Major General Jovic Ramos at PNP inteligence Director Major General Mariel Magaway.

Inamin ng Cardinal Santos Medical Center na na–admit sa kanila ang isang Pilipinong nag positibo sa  coronavirus disease 2019 (COVID-19).

Ayon sa pahayag ng ospital, inilipat na ang pasyente sa Research Institute for Tropical Medicine (RITM).

Anila, patuloy na nakikitaan ng sintomas ng sakit ang lalaki na tinukoy na walang anomang travel history sa mga bansang apektado ng COVID-19.

Samantala, siniguro naman ng ospital na inilatag na ang karampatang hakbang para sa lahat ng nagkaroon ng close contact sa pasyente sa ilalim ng ipinatutupad na quarantine protocol ng Department of Health (DOH).

Sa ngayon, hindi naman nagpapakita ng anomang sintomas ng sakit ang mga taong nagkaroon ng contact sa pasyente.

Sa huli ay tiniyak ng pamunuan ng Cardinal Santos Medical Center na ang pangunahing prayoridad nito ay ang kanilang pasyente at mga empleyado.

May kabuuang 45 diplomatic protest ang inihain ng Pilipinas laban sa China dahil sa usapin ng West Philippine Sea.

Ayon sa Department of Foreign Affairs (DFA), ang lahat ng naturang reklamo ay inihain sa ilalim palamang ng administrasyong Duterte.

Ibinigay ang naturang dokumento sa Kongreso noong nakaraang linggo sa gitna ng national task force West Philippine Sea kung saan isinailalim ang briefing ng mga miyembro ng Kamara.

Kabilang sa mga inihaing reklamo ay ang pagpasok ng Chinese vessel kapwa ng gobyerno at civilian militia sa teritoryong sakop ng Pilipinas at ang harassment ng Chinese navy,coast guard at militar sa mga mangingisdang Pilipino.

Nananawagan si Senador Richard Gordon sa Malacañang na agarang aksyunan ang money laundering sa Pilipinas kung saan sangkot ang mga Chinese national sa Philippine Offshore Gaming Operator (POGO) industry.

Ayon kay Gordon, chairman ng senate blue ribbon committee, maaaring maging banta sa seguridad ng bansa ang ipinasok na pera.

Paliwanag ni Gordon, posibleng magamit ang pera sa kudeta at distabilisasyon ng gobyerno.

Maaari din aniyang magamit ito ng mga sindikato sa human trafficking at smuggling o pagpopondo sa mga teroristang may planong maghasik ng kaguluhan sa bansa.

Nagpasalamat si Philippine National Police (PNP) chief General Archie Gamboa sa lahat ng mga nag-alay ng panalangin para sa kaniyang kaligtasan at paggaling maging sa kaniyang mga kasama.

Ito’y makaraang bumagsak ang sinasakyan ni Gamboa na helicopter kasama ang iba pang heneral sa San Pedro, Laguna, kahapon, ika-5 ng Marso.

Sa video post ng PNP-Public Information Office (PIO), tiniyak ni Gamboa na siya ay nasa mabuti nang kalagayan at maaari na rin agad makabalik sa trabaho.

PANOORIN: PNP chief Police General Archie Gamboa, nasa maayos na kundisyon na matapos ang chopper crash sa Laguna kaninang umaga.

Ayon pa kay Gamboa, balik opisina na siya sa Lunes, Marso 9. | via @jaymarkdagala

PNP-PIO pic.twitter.com/fZqTSx0Oy0

— DWIZ Newscenter (@dwiz882) March 5, 2020

Kasabay nito umapela si Gamboa sa publiko na huwag nang ipakalat pa ang mga larawan o video na may kaugnayan sa naganap na aksidente.

Kasama ni Gamboa sa chopper sina Major Gen. Mariel Magaway, Major Gen. Jose Maria Victor Ramos, Police Brig. Gen. Bernard Banac at dalawa pang piloto.

Nakatakda sanang magtungo ang mga ito sa Camp Vicente Lim para sa isang scheduled command visit nang mangyari ang insidente.