DWIZ 882

Bahagyang tataas ang singil sa kuryente ng Meralco sa paparating na billing ngayong Marso.

Ayon sa Meralco, ito ay bunsod ng 18 centavos per kilowatt hour na itinaas sa generation at transmission charge.

Gayunman, natapyasan ito at naging .0278 centavos per kilowatt hour na lamang matapos ipag-utos ng Energy Regulatory Commission (ERC) ang pag-refund sa sobrang nasingil sa mga consumers.

Dahil dito, asahan na ang P5. 60 centavos na dagdag sa billing ng mga komukonsumo ng 200 kilowatt hour kada buwan; P8. 40 centavos sa mga komukonsumo ng 300 kilowatt hour kada buwan.

P11.20 centavos na dagdag para sa mga komukonsumo ng 400 kilowatt hour kada buwan at P14 sa mga komukonsumo ng 500 kilowatt hour kada buwan.

Nananatiling comatose at nasa kritikal na kondisyon si Police Major General Jovic Ramos, isa sa mga matataas na opisyal ng Philippine National Police (PNP) na sakay ng bumagsak na helicopter sa Laguna.

Ayon kay Dr. Elvis Bedia ng Southwoods Unihealth Hospital sa Biñan kung saan naka-confine si Ramos, patuloy nilang minomonitor ang kondisyon ng Heneral.

Bahagyang namamaga pa rin aniya ang mukha nito gayundin ang tinamong pinsala sa kanyang utak.

Dagdag ni Bedia, bagama’t may nakikitang improvement sa kalagayan ni Ramos, hindi aniya ito tuloy-tuloy.

Samantala, sinabi ni PNP Deputy Chief for Operations Lt. General Guillermo Eleazar na nananatili pa ring kritikal ang kondisyon ni PNP Intelligence Director Mariel Magaway na naka-confine naman sa Asian Hospital sa Muntinlupa.

Dinalaw ni Philippine National Police (PNP) chief General Archie Gamboa ang isa pang heneral na nasa kritikal pa ring kondisyon kasunod ng pagbagsak  ng chopper na kanilang sinasakyan sa Laguna.

Matatandaang Biyernes ng hapon ay nakalabas na ng St. Lukes Medical Center sa Taguig si Gamboa isang araw matapos ang aksidente.

Bagama’t maayos na ang kalagayan ni Gamboa ay naka semento pa rin ang isang kamay nito.

Mula sa naturang ospital ay dumiretso si Gamboa sa Unihealth Hospital sa Laguna kung saan naka confined pa rin si PNP Comptrollership Chief Major General Jovic Ramos na nasa kritikal pa ring kondisyon.

Habang hindi pa rin stable ang kondisyon ni PNP Inteligence Director Major General Mariel Magaway na nasa Asian hospital sa Muntinlupa.

Handa ang gobyerno na i-repatriate ang daan–daang mga Pilipinong kabilang sa na lockdown sa isang cruise ship sa California sa Amerika dahil sa coronavirus disease 2019 (COVID-19).

Ayon kay Presidential spokesman Salvador Panelo, agad na kikilos ang gobyerno sakaling hilingin ito ng naturang mga Pilipino.

Tinatayang nasa mahigit 500 mga Pilipino karamihan ay mga tripulante ang sakay ng Grand Princess cruise ship.

Isinailalim sa quarantine ang naturang barko matapos mamatay ang isa sa mga pasahero nito dahil sa COVID-19.

Muling umapela ang Department of Health (DOH) sa publiko na huwag mag panic–buying ng facemask sa gitna ng 2 panibagong kaso ng corona virus disease 2019 (COVID-19) sa bansa.

Ayon kay Health Secretary Francisco Duque III, ipaubaya na ang pag gamit ng mask sa mga health workers na pawang mga frontliners sa pangangalaga sa mga taong may sakit.

Aniya, ang kinakailangan lamang na magsuot ng mask bukod sa mga health workers ay ang mga may nararamdaman o may sakit.

Samantala, pinayuhan naman ni Duque ang mga indibwal na mayroong respiratory illness na iwasan muna ang paglabas ng bahay.

Una nang kinumpirma ng DOH ang dalawang karagdagang kaso ng COVID-19 sa bansa kabilang ang isang lalaki na mula sa China habang ang isa pang lalaki ay wala namang travel history mula sa mga bansang apektado ng naturang sakit.