DWIZ 882

Magbibigay ng libreng sakay sa lahat ng mga kababaihan ang Light Rail Transit (LRT) line 2 bukas Marso 8, linggo.

Ito ay bilang pakikiisa ng LRT 2 sa pagdiriwang ng International Women’s Day.

Ayon sa LRT 2, maaaring magamit ang libreng sakay mula alas 7:00 hanggang alas 9:00 ng umaga at alas 5:00 ng hapon hanggang alas 7:00 ng gabi bukas.

Sa kalasalukuyan, bumibiyahe pa rin ang LRT 2 mula Recto hanggang Cubao station matapos ng nangyaring sunog sa rectifiers nito noong Oktubre ng nakalipas na taon.

Ikinalugod ng Malakanyang ang muling pagtaas sa net satisfaction rating ng administrasyong Duterte sa huling bahagi ng 2019.

Ito ay matapos maitala sa survey ng Social Weather Stations (SWS) ang plus 73 o katumbas ng excellent net satisfaction rating ng Duterte administration na isinagawa noong nakalipas na Disyembre.

Ayon kay Presidential Spokesperson Salvador Panelo, nangangahulugan itong nananatili pa ring malakas ang suporta ng mayorya ng mga Filipino kay Pangulong Duterte.

Malinaw na indikasyon din aniya itong nagtitiwala ang nakararaming Filipino sa pamahalaan sa ilalim ng pangangasiwa ng Pangulo.

Tiniyak naman ni Panelo na sa kabila ng mataas na rating, hindi magpapakampante ang pamahalaan at patuloy na magsusumikap para makapagbigay ng mas maigting na pagseserbisyo sa taumbayan.

Una nang lumabas sa survey ng SWS na 81% ng mga Filipino ang kontento o nasisiyahan sa kanbuuang performance ng adminsitrasyong Duterte, 12% ang hindi tiyak kung nasisiyahan o hindi habang 7% ang hindi nasisiyahan.

Nirerepaso na ng Presidential Security Group (PSG) ang mga ipinatutupad na helicopter protocols para sa ligtas na pagbiyahe ni Pangulong Rodrigo Duterte.

Kasunod na rin ito ng nangyaring aksidente sa helicopter sa Laguna kung saan sakay ang ilang matataas na opisyal ng Philippine National Police (PNP) kabilang si Police General Archie Gamboa.

Ayon kay PSG Chief Col. Jesus Durante, kabilang sa kanilang pinag-aralan ang pagpili sa landing zone at lugar na pagliliparan ng helicopter na sakay ang Pangulo.

Sinabi ni Durante, wala rin silang nakikitang dahilan para limitahan ang pagbiyahe ng Pangulo gamit ang helicopter.

Wala rin aniyang dapat ipag-alala sa pagsakay sa helicopter ng Pangulo kahit gabi dahil mga combat pilots mula Presidential airlift wing ang mga piloto nito.

Una nang sinabi ni Presidential Spokesperson Salvador Panelo na hindi nagpahayag ng anumang agam-agam si Pangulong Duterte sa pagsakay ng helicopter sa kabila ng nangyaring aksidente sa Laguna.

Paliwanag ni Panelo, mas gusto ng Pangulo ang gumamit ng helicopter kung magtutungo sa malalapit lamang na lugar dahil mas mabilis ito.

Nagpatupad na ng mga precautionary measures ang Cebu Pacific laban sa coronavirus disease (COVID-19).

Ito ay matapos mapaulat na isang babaeng Australian ang nagpositibo sa COVID-19 matapos bumiyahe ng Pilipinas at pabalik ng Sydney sakay ng eroplano ng Cebu Pacific.

Ayon kay Charo Logarta, tigapagsalita ng airline, sinimulan na nilang i-disinfect o linisin nang maigi ang eroplanong ginamit sa flight na sinakyan ng nabanggit na Australian national.

Isinailalim na rin aniya ito sa preventive quarantine.

Sinabi ni Logarta, sa kasalukuyan ay kanila na pa ring hinihintay ang opisyal na abiso hinggil sa detalye nang nabanggit na pasahero.

Tiniyak naman ni Logarta na patuloy silang nakikipag-ugnayan at nakikiisa sa mga programa ng pamahalaan para mapigil ang pagkalat ng coronavirus sa bansa.

Una nang sinabi ng Department of Health (DOH) na namasyal ng Metro Manila at Pangasinan ang nabanggit na pasyente bago bumalik ng Australia.