DWIZ 882

Nagtalaga ang pamunuan ng Metro Rail Transit-3 (MRT-3) ng nasa 30 uniformed security personnel o train marshals sa loob ng mga tren nito.

Ito ay para bigyan ng seguridad ang mga pasahero na araw- araw bumabyahe at panatilihin ang kaayusan.

TRAIN MARSHALLS AT WORK

Upang siguruhin ang kaligtasan at seguridad ng mga pasahero, naglagay ang DOTr-MRT 3 ng mga train marshalls sa loob ng mga tren. Nagsimula noong 01 Marso 2020 ang duty ng mga nasabing uniformed security personnel. pic.twitter.com/xPdHnwgcmv

— DOTr MRT-3 (@dotrmrt3) March 5, 2020

Ayon sa pamunuan ng MRT-3, responsibilidad din ng mga marshal na gawing organisado ang pagsakay ng mga pasahero.

Ang mga ito ang magpapaalala sa mga mananakay ng mga alituntunin sa tren gaya ng kung sino lamang ang maaaring sumakay sa priority area.

Magsisilbi rin umanong first responder ang mga nakatalagang marshal sakaling magkaaberya ang tren o magkaroon ng emergency.

Suportado ng Malacañang ang plano ng Department of Finance (DOF) na hilingin sa Kongreso na tanggalin ang suspensyon sa Bank Secrecy Law.

Ito ay para maging transparent ang mga bank account ng mga posibleng sangkot sa money laundering sa bansa matapos mabunyag ang pagkakapuslit ng “dirty money” sa Pilipinas ng ilang Chinese national.

Ayon kay Presidential Spokesman Salvador Panelo, madalas na pinakikinggan ni Pangulong Rodrigo Duterte ang mga ideya o plano ni Finance secretary Sonny Dominguez.

Ani Panelo, kung sa tingin ni Dominguez ay makabubuti ang naturang hakbang para sa ikalulutas ng usapin ay hindi malayong suportahan ito ng pangulo.

Gayunman, sinabi ng tagapagsalita na ang huling desisyon ay nasa mga mambabatas pa rin.

Sila umano kasi ang mag-aamyenda ng Bank Secrecy Law matapos alisin ng mga mambabatas ito sa unang draft ng Tax Reform for Acceleration and Inclusion Act.

Makatatanggap ng refund ang mga kostumer ng Meralco ngayong buwan ng Marso.

Ito’y bilang pagsunod ng Meralco sa utos ng Energy Regulatory Commission (ERC) na ibalik sa mga consumer ang mahigit P657-milyon na over recovery at P545-milyon na sobrang nakolekta sa universal charge.

Umaasa naman ang Meralco na makatutulong ang refund na ito para mabawasan ang epekto ng inaasahang taas-singil sa kuryente.

Paliwanag ni Meralco spokesperson Joe Zaldarriaga, karaniwan nang nagsisimula ang pataas na paggalaw ng presyo ng singil sa kuryente.

Lusot na sa ikalawang pagbasa ng Kamara ang panukalang taasan ang Motor Vehicle Road Users Tax o mas kilala sa road users tax.

Layon ng house bill 6136 na amyendahan ang road users tax kung saan ang mga passenger cars na mayroong gross vehicle weight (GVW) na hanggang 1,600 kilograms ay magiging P2,080.00 sa 2020; P2,560.00 sa 2021 at P3,040.00 sa 2022.

Para naman sa mas mataas sa 2,300 kilograms, magiging P10,400.00 sa 2020; P12,800.00 sa 2021 at P15,200.00 sa 2022.

Kabilang din sa mga may pagbabago ay ang mga utility vehicles, sports car, bus, truck at trailers.

Sa oras na maging batas, inaasahan na kikita ang pamahalaan ng nasa P200-bilyon mula 2020 hanggang 2024.

Ilalaan ang malaking bahagi ng kita sa Public Utility Vehicle modernization program.

Tiniyak ng Malacañang ang aksyon ng pamahalaan kaugnay sa inilabas na impormasyon ni Senador Panfilo “Ping” Lacson hinggil sa presensya sa bansa ng nasa 3,000 Chinese na umano’y miyembro ng People’s Liberation Army (PLA).

Ayon kay Presidential Spokesman Salvador Panelo, biniberipika na ito ng Armed Forces of the Philippines (AFP).

Ani Panelo, anumang makalap na impormasyon na maaaring malagay sa alanganin ang seguridad ng bansa ay dapat ipangamba.

Ngunit sinabi ni Panelo na hanggat hindi pa ito napatutunayan ay ituturing itong isang espekulasyon lamang.

Sa ngayon kasi umano ay wala pang ibinibigay sina Defense secretary Delfin Lorenza at National Security Adviser Hermogenes Esperon hinggil sa nasabing ulat.

Inimbitahan ni Pangulong Rodrigo Duterte sa isang pulong ang negosyanteng si Manny V. Pangilinan.

Ito ang inihayag ni Senador Christopher “Bong” Go matapos magkita ang pangulo at si MVP sa inspeksyon at project presentation ng NLEX Harbor Link C3-R10 section sa Caloocan city, kahapon, ika-5 ng Marso.

Kasabay nito, dinepensahan din ni Go ang pangulo matapos hindi nito mabanggit ang pangalan ng negosyante sa pagbati nito bilang bahagi ng kaniyang panimulang talumpati.

Ani Go, hindi iyon sinasadya ng pangulo at sa katunayan pa umano ay binati nito si Pangilinan at nakipagkamay.

Magugunitang isa sa mga binabanatang negosyante ng pangulo si Pangilinan dahil sa kwestiyonableng kontrata sa pagitan ng gobyerno at ng Maynilad bilang water concessionaire.

Mayorya ng mga Pilipino ang naniniwala na kayang ipagtanggol ng militar ang mga teritoryo ng Pilipinas kabilang na ang West Philippine Sea.

Ito ay batay sa survey ng Social Weather Sations (SWS) kung saan 79% ng mga Pilipino ang nagsasabing sila ay kuntento sa performance ng mga sundalo at tiwala sila sa kakayahan ng mga ito.

Isinagawa ang survey sa 1,2000 adults noong Disyembre.