DWIZ 882

Arestado ang siyam (9) katao sa magkakahiwalay na check point sa iba’t ibang bahagi ng Metro Manila.

Ayon kay Philippine National Police (PNP) Police Brig. Gen. Bernard Banac, nagpupumilit kasi ang mga ito na makatawid sa quarantine-controlled stations na inilatag para labanan ang pagkalat ng coronavirus disease 2019 (COVID-19) sa bansa.

Dagdag pa ni Banac, nagmamatigas ang mga ito na makalusot sa mga controlled areas kahit hindi sila kabilang sa mga exempted na essential workforce.

Kinumpirma ng pamunuan ng GMA Network na nagpositibo sa coronavirus disease 2019 (COVID-19) ang isa nitong freelance production talent.

Sa pahayag na inilabas ng network, sinabi nito na sila’y nakikipagtulungan sa Department of Health (DOH) maging sa mga opisyal ng barangay para sa maayos na pagresolba sa pangyayaring ito.

Huling nagpunta ang naturang talent noong Pebrero 28 sa Annex Building ng network.

Pinayuhan na rin ng network ang lahat ng mga empleyado at talents na nakasalamuha –direkta man o second level –na imonitor ang kanilang kalusugan.

Siniguro naman ng network na binawalan na nitong ipagamit ang mga lugar na napuntahan ng talent at agad din itong isinailalim sa disinfection alinsunod sa DOH protocols.

Samantala, kasalukuyan nang nasa ospital ang pasyente at ginagamot kontra COVID-19.

Nanawagan ang Department of Health (DOH) sa mga nais na magvolunteer na health workers sa harap ng banta ng coronavirus disease 2019 (COVID-19).

Ayon kay DOH undersecretary Maria Rosario Vergeire, ang panawagang ito ay para sa dagdag-tulong na health workers sa mga itatalagang ospital para sa COVID-19 patients.

Dagdag pa ni Vergeire, sinasapinal na nito ang kasunduan sa pagitan ng tatlong pampublikong ospital kabilang ang Philippine General Hospital (PGH) sa Maynila, Jose M. Rodriguez Memorial Hospital sa Caloocan at Lung Center of the Philippines sa Quezon City na magsisilbing referral centers.

Samantala, siniguro ng DOH na sa oras na matapos ang mga paguusap sa pagitan ng ospital ay agad na tatanggap ang mga ito ng COVID-19 patients.

Negatibo sa coronavirus disease 2019 (COVID-19) si Chief Justice Diosdado Peralta.

Ayon sa Public Information Office (PIO) ng Korte Suprema, isinailalim ang punong mahistrado sa pagsusuri sa COVID-19 alinsunod sa abiso ng mga doktor nito matapos siyang makitaan ng ilang sintomas ng virus tulad ng pag-uubo –matapos na bumyahe sa Netherlands na may higit 2,000 nang naitatalang kaso ng COVID-19.

Magugunitang dumalo si Peralta kasama ang delegasyon ng bansa sa The Hague, Netherlands mula March 1 hanggang March 7, 2020 para sa isang pagtitipon.

Siniguro naman ni Peralta na patuloy niyang ginagampanan ang mga tungkulin sa kanyang tahanan habang minomonitor ang sitwasyon sa bansa.

Tiniyak ng pamunuan ng SM sa kanilang mga empleyado ang pagbibigay ng regular na sahod at tulong pinansyal para sa kanilang mga gwardiya at janitors na pawang naapektuhan ng enhanced community quarantine sa buong Luzon.

Sa pahayag na kanilang inilabas, sinabi nito na bukod sa sahod na matatanggap ng mga empleyado nito ay tatanggap din sila ng financial assistance, habang may dagdag na premium pay sa kanilang mga front liners na bumuo sa skeletal workforce nito, at P5,000 naman para sa kanilang mga gwardiya.

Samantala, siniguro din ng pamunuan ng SM na ginagawa nito ang lahat para matiyak ang kaligtasan ng kanilang mga frontline workers kung kaya’t sila ay magbibigay ng protective gears, pagkain at masasakyan para maghatid-sundo sa mga empleyado nito.

Tiniyak ng Philippine National Police (PNP) Civil Security Group (CSG) na walang babayarang multa ang mga magrerenew ng pasong rehistro at lisensya ng mga security agency, security guards at mga armas nito.

Iyan ang inihayag ni PNP CSG Director P/MGen. Roberto Fajardo matapos nilang palawigin pa ang validity ng mga firearms registration, license to operate firearms ng private security agencies at license to exercise security profession.

Ayon kay Fajardo, inaprubahan ni PNP Chief P/Gen. Archie Francisco Gamboa ang kaniyang naging rekomendasyon sa kabuuan ng panahong umiiral ang enhanced community quarantine hanggang sa ika-14 ng Abril.

Mahalaga aniya ang papel ng mga security guard bilang force multipliers sa pagbabantay sa mga establisyemento sa panahong umiiral ang community quarantine.

Kabilang ang mga security guard sa exempted sa quarantine, basta’t ipakita lang ang kanilang mga identification o I.D. cards para payagang makalabas ng bahay at makapasok sa trabaho.

Pananagutin ng Department of the Interior and Local Government (DILG) ang sinumang pasaway na nananamantala sa mga essential goods tulad ng pagkain, medical at hygine supplies.

Ito ang tiniyak ni DILG Sec. Eduardo Año kasunod ng sunod-sunod na pagkakaaresto ng ilang mga online sellers na nagbebenta ng mga produkto na doble ang ipinapatong na presyo.

Sa panayam ng DWIZ kay Año, sinabi nitong kaniya nang inatasan ang Philippine National Police (PNP) na makipag-ugnayan sa Department of Trade and Industry (DTI) upang magkasa ng inspeksyon sa mga bodega.

Magugunitang sunod-sunod ang naging operasyon ng pulisya laban sa mga hoarder ng ilang hygine supplies tulad ng alcohol kung saan, sobra-sobra ang ipinapatong na presyo nito sa merkado.

Kasunod niyan, sinabi ni Año na tukoy na nila ang ilan sa mga hoarders kaya’t bubuo na sila ng tracker teams na siyang tutugis dito.

Inanunsyo ng University of the Philippines (UP) ang pagpanaw ni Prof. Aileen Baviera ng UP Asian Center.

Batay sa anunsyo ng UP, pumanaw si Prof. Baviera sa San Lazaro Hospital sa Maynila, mag-4:00 kaninang umaga.

Nabatid na pumanaw si Prof. Baviera sanhi ng pneumonia dulot na rin ng 2019 coronavirus disease (COVID-19).

Si Prof. Baviera ay hipag ng Vice President for finance ng Aliw Broadcasting Corporation na si ginoong Cholo Baviera.