DWIZ 882

Ipinagmalaki ng Philippine National Police (PNP) ang malaking pagbaba sa antas ng naitatalang mga krimen sa Metro Manila sa nakalipas na mga linggo.

Ito’y bunsod ng umiiral na enhanced community quarantine sa buong Luzon na nasa ilalim na rin ng national state of calamity dahil sa COVID-19.

Ayon kay PNP Spokesman P/Bgen. Bernard Banac, sa Metro Manila pa lamang, bumaba sa 766 ang naitalang index crime.

Katumbas ito ng 67.6% na pagbaba sa antas ng krimen na naitala sa kaparehong panahon noong isang taon na nasa 2,367.

Bagama’t kuntento naman sa peace and order situation, nangangamba naman si Sen. Panfilo Lacson na posibleng gamitin ng New People’s Army (NPA) ang sitwasyon gayung hindi nito tinanggap ang alok na tigil putukan ni Pangulong Rodrigo Duterte.

Minaliit lamang ni Senador Panfilo Lacson ang pangamba ng mga kritiko na mauwi na sa batas militar ang ipinatutupad na enhanced community quarantine sa buong Luzon.

Ito’y sa sandaling umarangkada na ang special session ng kongreso bukas para talakayin ang mga karagdagang kapangyarihang igagawad sa ehekutibo para tumugon laban sa COVID-19.

Sa panayam ng DWIZ kay Lacson, sinabi nito na handa silang ibigay sa ehekutibo ang lahat ng mga kinakailangang kapangyarihan salig pa rin sa itinatadhana ng konstitusyon.

Ginawa ng senador ang pahayag dahil sa patuloy na pagsuway ng ilan sa mga ipinatutupad na mga panuntunan tulad ng hindi paglabas ng mga ito sa kani-kanilang mga tahanan nang walang mahalagang pakay.

Basta hindi tayo lalabag sa probisyon ng konstitusyon sa mga legal liberties, mga rights, mga freedom, ay pwedeng ibigay sa kanila yun. Hindi naman pwede gumawa kami ng batas na labag doon sa tinatawag nating saligang batas,” ani Lacson.

Para kay Lacson, hindi na kakailanganin pa ng ehekutibo na isulong pa ang pagdideklara ng batas militar dahil sapat na ang ginagawang mga hakbang upang labanan ang sakit dulot ng COVID-19.

Alam mo yung martial law naman ay under the 1987 consitution, hindi pa rin nawawala yung mga individual rights doon diba? Yung mga basic rights nandoon pa rin, hindi pwedeng humuli ng walang warrant, hindi pwede mag-search ng walang search warrant, hindi pwedeng magkulong ng napakatagal kung wala namang kaso,” ani Lacson. — panayam mula sa Usapang Senado.

Nakatakdang magsagawa ng special session ang dalawang kapulungan ng kongreso 10:00 bukas ng umaga, Marso 23.

Ito’y ayon kay Senate President Vicente Sotto III matapos ang naging pagpupulong nila ni House Speaker Alan Peter Cayetano at Executive Secretary Salvador Medialdea kahapon.

Ayon kay Sotto, bibigyan nila ng kapangyarihan si Pangulong Rodrigo Duterte na dumiskarte sa kung paano gagamitin ang pondo kaugnay na rin sa paglaban kontra COVID-19.

Ilalaan aniya ang mapagkakasunduang pondo sa pagkain at iba pang ayudang ibibigay sa mga apektado ng krisis pangkalusugang nararanasan ngayon ng bansa.

Maliban sa agarang ayuda, sinabi ni Sen. Bong Go na iminungkahi rin ng Malakaniyang na payagan ang Pangulo na pondohan ang mga programa para sa rehabilitasyon ng sambayanan mula sa krisis na ito.

Nagbabala ang Department of Health (DOH) sa publiko laban sa paggamit ng antimalarial drug na Chloroquine bilang panlunas sa COVID-19.

Ayon kay DOH undersecretary Maria Rosario Vergeire, may side effects ang naturang gamot at hindi ito maaaring gawing pam-prophylaxis o pang-agap sa COVID-19.

Kinakailangan aniya ng sapat na patnubay ng doktor bago uminom ng mga gamot na lumalabas sa merkado.

Magugunitang noong Sabado, sinabi ni DOH secretary Francisco Duque III na kanila nang binabalangkas ang guidelines sa paggamit ng antimalarial drugs laban sa COVID-19, katuwang ang Philippine College of Physicians at Philippine Society for Microbiology and Infectious Disease (PSMID).

Nagpositibo sa coronavirus disease 2019 (COVID-19) ang dalawa pang Pinoy sa abroad.

Ayon sa Department of Foreign Affairs (DFA), isa sa mga ito ay nasa Brunei Darussalama at ang isa ay mula naman sa India.

Batay sa Ministry of Health ng Brunei Darussalam, ang Pinoy patient na naroon ay nasa isang local health facility at nasa stable na kondisyon.

Lumapag naman sa India ang isa pang pasyente noong Marso at na-ospital sa Mumbai nang makaranas ng hirap sa paghinga.

Tiniyak naman ng DFA na mahigpit ang kanilang koordinasyon ng Philippine Embassy sa Philippine Honorary Consulate ng Mumbai at Ministry of Health sa Brunei Darussalam upang matutukan ang lagay ng dalawang Pinoy.

Dagdag pa ng ahensya, magpapaabot sila ng tulong sa parehong pasyente upang matiyak na mabibigyan sila ng sapat na alaga at suporta para malabanan ang COVID-19.

Welcome naman sa pamunuan ng Philippine National Police (PNP) ang itinutulak na panukala ni Senador Panfilo Lacson.

Ito’y upang dagdagan ang natatanggap na hazard pay at insurance ng mga frontliners sa pagtugon sa coronavirus disease 2019 (COVID-19).

Ayon kay PNP Spokesman P/BGen. Bernard Banac, malaking tulong ito para sa mga frontliners na nagbubuwis ng kanilang buhay para masagip ang marami nating kababayan mula sa nakahahawang virus.

Suportado ng buong hanay ng PNP sa pangunguna ni Police General Archie Francisco Gamboa ang anumang panukala na magbibigay ng financial assistance o hazardous pay sa lahat ng ating mga frontliners. Hindi lamang ang mga pulis, kundi maging ang mga sundalo at mga health workers at maging ang ating mga government workers na nasa skeletal force ngayon na nagbibigay pa rin ng serbisyo,” ani Banac. —sa panayam ng Balitang 882

Nagnegatibo sa coronavirus disease 2019 (COVID-19) si Health Sec. Francisco Duque III.

Ito ang inihayag ni Department of Helath (DOH) Maria Rosario Vergeire matapos lumabas ang resulta ng isinagawang pagsusuri sa kalihim.

BREAKING: DOH secretary Francisco Duque III, negatibo sa COVID-19 test — DOH Usec. Vergeire | via @JILLRESONTOC pic.twitter.com/uzwetqlJaP

— DWIZ Newscenter (@dwiz882) March 22, 2020

Kasalukuyang nakawork-from-home si Duque matapos na magpasya itong sumailalim sa 14-day quarantine bilang bahagi ng protocols.

Sinasabing nagkaroon ng contact si Duque mula sa isang director ng DOH na nagpositibo sa COVID-19 sa nakalipas na mga linggo.

Dahil dito, tiniyak ni Vergeire na hindi naman napababayaan ng kalihim ang kaniyang tungkulin sa kagawaran dahil tuloy aniya ang pagtatrabaho nito at pagbabantay sa kanilang operasyon.

Isusulong ni Senador Panfilo Lacson ang panukalang dagdagan ang ibinibigay na hazard pay para sa mga nagsisilbing frontliners sa pagtugon sa coronavirus disease 2019 (COVID-19).

Ito’y sa sandaling hindi ito mapasama sa mga ilalatag na hakbang ng malakaniyang kaugnay sa pagbibigay ng karagdagang pondo para sa ayudang ibibigay ng pamahalaan sa mga apektado ng nagpapatuloy na krisis pangkalusugan.

Inihayag sa DWIz ni Sen. Panfilo “Ping” Lacson, kabilang sa mga mabibigyan ng dagdag na hazard pay at health insurance ang mga doktor, nurse, health workers gayundin ang mga miyembro ng Armed Forces of the Philippines (AFP) at Philippine National Police (PNP).

‘Yan ‘yung isang sinuggest, extra hazard pay at health insurance, dahil sila ang naka-expose sa virus,” ani Lacson.

Dagdag pa ng senador, sinimulan na aniya nilang talakayin ang nasabing panukala noon pang araw ng Biyernes kaya’t naniniwala siyang lahat ng kanilang napag-usapan ay mapagkakasunduan. —sa panayam ng Usapang Senado

Sisikaping matapos ng dalawang kapulungan ng kongreso ang isasagawa nilang special session bukas, Marso 23.

Ito’y para bigyan ng ibayong kapangyarihan ang ehekutibo na gamitin ang pondo ng pamahalaan para sa mga apektado ng coronavirus disease 2019 (COVID-19).

Sa panayam ng DWIZ kay Sen. Panfilo Lacson, re-alignment at hindi supplemental budget ang kanilang ipapasa dahil sa nakita nilang mga unused o hindi nagamit na pondo ng iba’t ibang ahensya ng pamahalaan.

Tinitingnan nga natin, depende kung ano ‘yong measure na ipapasa sa amin ng Malacañang at pag-aaralan namin na pwede naman naming amiyendahan. Ang isang naisip naming amendment, ire-align, lalo na ‘yong mga ahensya na malaki ‘yong kanilang unused appropriation, baka pwedeng bawasan at idagdag doon sa pantugon dito sa coronavirus,” ani Lacson.

Batay kasi sa pinakahuling datos na nakuha mula sa Department of Budget and Management (DBM), humigit kumulang P900-bilyon pa ang mga pondo na nasa kamay ng mga ahensya ng pamahalaan ang hindi pa nagagamit at may ilan ding hindi pa nailalabas ng DBM.

Nakita namin, napakalaki pa rin ‘yong unused appropriation, katunayan, ‘yong mga ahensya pa lamang ng gobyerno, ‘yong mga departamento, ang hindi pa nagagastos. Pag sinabi nating unused, ito ‘yong obligated narelease na ng DBM pero hindi pa rin nagagamit ng mga agencies at ‘yong unreleased, hindi pa narelease ng DBM, ang total no’n, nasa mga 989-billion,” ani Lacson.

Kahapon, nagsimula na aniya silang magsagawa ng roll call at bukas ay pormal lang nilang bubuksan ang sesyon sa gusali ng senado at ipagpapatuloy nila ang mga talakayan via online.

Ayon sa inisyal na pag-uusap namin, initial lang naman ang kailangan makapag-roll callat meron kaming forum, pagkatapos no’n pwede naman kaming magresort sa teleconferencing, online voting, sa diskusyon pwede kaming gumamit ng application nang sa ganon makapag-usap-usap kami via internet,” ani Lacson. —sa panayam ng Usapang Senado

Mas malaki na ang magiging kakayahan ng bansa sa pagdating sa pagsasagawa ng coronavirus disease 2019 (COVID-19) testing.

Ito’y sa inaasahang pagdating ng nasa 120,500 test kits mula sa iba’t ibang bansa.

Ang naturang mga test kit ay makakadagdag sa kasalukuyang 1,300 test kit na mayroon ang Research Institute for Tropical Medicine (RITM).

Una rito, dumating na sa bansa ang test kit na donasyon mula sa China at South Korea.

Inanunsyo din ang limang sub nation laboratories sa bansa na nagsasagawa ng COVID-19 testing –ito ay sa RITM, Baguio General Hospital and Medical Center, Vicente Sotto Memorial Medical Center sa Cebu at Southern Philippines Medical Center sa Davao City.

Inaasahang magkakapagproseso na rin COVID-19 testing sa Western Visayas Medical Center at Bicol Public Health Laboratory.