Nagmahal ang ilan sa mga Noche Buena items ngayong araw ayon sa Philippine Amalgamated Supermarkets Association Inc.
Ayon kay Steven Cua, pinuno ng grupo, nakaapekto sa pagtaas ng presyo ang supply at demand distribution.
Ilan aniya sa mga produktong nagbago ang presyo ay ang pasta, spaghetti packs, kape, manok at hamon.
Sa kabila ng pagtaas ng presyo tuloy-tuloy pa rin ang pagdagsa ng mga mamimili sa mall at mga palengke.—sa panulat ni Joana Luna
Tinutukan ng Centers for Health Development (CHD) at Regional Epidemiology and Surveillance Unites (RESU) ang mga ospital at evacuation centers kaugnay sa mga naitatalang waterborne diseases matapos ang paghagupit ng Bagyong Odette.
Ayon kay Health Undersecretary Maria Rosario Vergeire, biniberipika na ng DOH ang bilang ng mga pasyenteng kasalukuyang naka-admit sa mga health facilities dahil sa diarrhea.
Una nang inihayag ng Surigao Del Norte governor Francisco Matugas na pito ang nasawi at mahigit 100 ang naospital sa kanilang probinsya.—sa panulat ni Airiam Sancho
Naniniwala ang mga provincial bus operator na pagbibigyan na ng gobyerno ang apela na makapasok sa kanilang mga terminal sa National Capital Region.
Ayon sa presidente ng Provincial Bus Operator Association of the Philippines (PBOAP), pinahintulutan na ng mga lokal na pamahalaan na makapasok sa probinsya ang mga bus na mula sa Metro Manila.
Aniya, desisyon na lamang ng gobyerno ang kanilang hinihintay.
Matatandaang, noong December 7 ay umapela sa Inter-Agency Task Force (IATF) ang grupo na payagan silang makapasok sa NCR lalo’t magpa-Pasko.—sa panulat ni Airiam Sancho
Handa na para sa dalawang training ang Philippine Azkals na gaganapin sa taong 2022.
Ayon kay Azkals Coach Stewart Hall, isasagawa sa buwan ng Enero at Marso ang mga friendly match bilang preparasyon para sa FIFA International Window ng 2023 AFC Asian Cup qualifiers na magsisimula sa Hunyo.
Aniya, dito rin pipili ang Azkals program director Scott Coppter ng mga manlalarong isasabak sa nasabing torneo.
Samantala, mayroong kabuuang 11 kuponan sa 24 na bansa ang aabante para sa AFC asian cup.—sa panulat ni Airiam Sancho
Mayroong sapat na suplay ng cash o pera ang mga lugar na sinalanta ng Bagyong Odette
Ito ang tiniyak ng Bangko Sentral ng Pilipinas (BSP).
Ayon sa BSP, nais nilang matugunan ang currency demands sa mga probinsya na higit na tinamaan ng pananalasa ng bagyo upang makabangon ang mga ito sa lalong madaling panahon.
Pinatitiyak din ng BSP sa mga bangko sa Visayas at Mindanao ang pagkakaroon ng sapat na hakbang upang masiguro ang availabilty ng pera sa mga Automated Teller Machines (ATM).—sa panulat ni Airiam Sancho
Nasawi ang isang barangay treasurer matapos na barilin ng kanyang kinakasama na nagpakamatay rin sa bayan ng Gattaran, Cagayan.
Kinilala ang biktimang si Ria Ponce, 37 anyos habang ang suspek at live-in partner nito ay si Rex Martin.
Ayon sa imbestigasyon, nagkaroon ng matinding pagtatalo ang mag-live-in partner dahil umano sa selos.
Pinagbantaan umano ng suspek ang biktima na kapag nakipagrelasyon sa iba ay papatayin ito.
Hindi pa humupa ang hidwaan nang barilin ni Martin ang biktima, kasunod nito ay binaril din ng suspek ang kaniyang sarili na kaniya ring ikinamatay.
Samantala, patuloy ang imbestigasyon ng awtoridad sa naturang insidente.—mula sa panulat ni Airiam Sancho
Inihayag ng National Vaccination Operations Center (NVOC) na kakaunti pa lamang ang nagpapaturok ng booster shot.
Ayon kay NVOC Dr. Kezia Lorraine Rosario, naapektuhan ng holiday season ang pagpapabakuna ng mga indibidwal kung saan hindi pa niya makita ang pagdami ng pag-administer ng booster doses.
Samantala, umapela si Rosario sa publiko na kung mayroon aniyang pagkakataon ay magpabakuna na hindi lamang ng booster shot kundi mga kailangang mabigyan ng first at second dose. —sa panulat ni Airiam Sancho
Umakyat na sa 326 ang bilang ng mga napaulat na nasasawi dulot ng pananalasa ng Bagyong Odette
Batay ito sa pinakahuling datos ng national disaster risk reduction and management council (NDRRMC).
Mula ang nasabing bilang sa mga lalawigan ng Palawa, Iloilo, Guimaras, Negros Occidental at Oriental, Cebu, Bohol, Butuan City, Bukidnon, Misamis Occidental at Oriental gayundin sa Agusan Del Sur.
Subalit nilinaw ng NDRRMC na mula sa mahigit 300 na napaulat na nasawi ay nasa 14 pa lamang dito ang nakumpirma ang pagkakakilanlan.
Habang nakapagtala ang NDRRMC ng 659 na mga napaulat na nasaktan habang aabot sa 54 naman ang patuloy pang pinaghahanap.—mula sa ulat ni Jaymark Dagala sa panulat ni Airiam Sancho
Sugatan ang 10 mga guro matapos bumangga ang sinasakyang van sa isang bahay sa lalawigan ng Cotabato, Mindanao.
Ayon kay Alamada Chief of Police Major Bryan Espinosa, ang mga biktima ay guro ng Cotabato State University at ang drayber nito.
Aniya, mula sa Bukidnon ang mga guro at pauwi na sana ng Cotabato nang biglang mawalan ng preno ang sasakyan at bumangga sa isang bahay sa barangay barangiran Alamada.
Agad namang dinala sa ospital ang mga nasabing indibidwal at 6 sa kanila ay nakalabas na.—sa panulat ni Airiam Sancho
Nadagdagan pa ang mga bansang nagpadala ng tulong pinansyal sa bansa matapos manalasa ang Bagyong Odette.
Kabilang dito ang halos P32.6-M na ibinigay ng Switzerlnd sa Philippine Red Cross sa pamamagitan ng International Federation of Cross.
Namahagi rin ang Ireland ng mahigit 14 na milyong piso.
Nasa higit 100 milyong pisong halaga ng emergency relief naman ang ibinigay ng Australia.
Ayon sa Department of Foreign Affairs, nasa 2 milyong piso rin ang ibinigay ng Singapore.
Matatandaang una nang nag-donate ang Estados Unidos, China South Korea, Japan, Canada at United Kingdom para sa mga naapektuhan ng bagyo.—sa panulat ni Airiam Sancho