DWIZ 882

Hinikayat ng Pamahalaang lungsod ng San Juan ang mga magulang na iparehistro na ang kanilang mga anak na may edad 5 hanggang 11 para mabakunahan kontra COVID-19.

Ito ang inihayag ni San Juan City Mayor Francis Zamora kasabay ng pagtanggap nito ng booster shot kontra sa virus sa gitna ng banta ng Omicron variant.

Sa unang araw pa lamang ng vaccine registration para sa pediatric category, sinabi ng Alkalde na umabot na agad sa mahigit isang libo ang nagpatala at inaasahan pa nilang darami pa ito sa mga susunod na araw.

Kasabay nito, nagpahayag din ng suporta si Zamora sa resolusyon ng Metro Manila Council na higpitan muna ang galaw ng mga hindi pa bakunado gayundin ang pagsasailalim sa kanila sa RT-PCR test para sa kanilang trabaho.

Giit ni Zamora, bagama’t kailangang tingnan ang kapakanan ng mga bakunado para mabalanse ang takbo ng ekonomiya at kaligtasan, mas dapat tutukan ang mga hindi pa bakunado dahil sila ang mas bantad sakaling tamaan ng mas mabagsik na variant ng COVID-19. —ulat mula kay Jaymark Dagala (Patrol 9)

Umapela ang Commission on Human Rights (CHR) sa Pamahalaan na dapat tiyaking walang malalabag na karapatang pantao sa sandaling higpitan na ang galaw ng mga hindi pa bakunado kontra COVID-19.

Ayon kay CHR Spokesperson Atty. Jackie de Guia, batid naman nila ang pangangailangan na mapigilan agad ang pagkalat ng virus upang makabalik na sa normal ang pamumuhay ng bawat isa, subalit hindi pa rin anila dapat sumobra sa itinatakda ng batas ang mga paghihigpit na kanilang ipatutupad.

Sa panig ng Philippine National Police o PNP, tiniyak ni PNP Chief P/Gen. Dionardo Carlos na mahigpit nilang ipatutupad ang maximum tolerance at pantay din anila ang magigig pagtrato sa lahat.

Una nang napagkasunduan ng Metro Manila Council na kailangang manatili muna sa bahay ang mga hindi pa bakunado kontra sa virus maliban kung ito’t essential o lubhang kinakailangan Giit ni Carlos, patuloy silang nakikipag-ugnayan sa mga lokal na pamahalaan sa pagpapatupad ng mga health protocols gayundin ang pagbabantay sa mga itinalagang quarantine facilities. —ulat mula kay Jaymark Dagala (Patrol 9)

Suspendido na ang limited face-to-face classes sa Maynila matapos ilagay ang rehiyon sa Alert Level 3.

Ayon sa Department Of Education, ang suspensiyon ay matapos ang konsultasyon sa Department Of Health (DOH) sa gitna ng tumataas ng kaso ng COVID-19.

Nasa 28 ang pampublikong paaralan sa Metro Manila na nakapagsagawa na ng limited face-to-face classes simula noong Disyembre 2021.

Samantala, mananatili namang tuloy-tuloy ang face-to face classes sa pilot schools sa mga lugar na nasa Alert Level 1 At 2 hanggang sa maisapinal ang kagawaran ng in-person classes. —sa panulat ni Mara Valle

Arestado ang dalawang hinihinalang miyembro ng bukas-kotse gang matapos silang ituro ng biktima nilang natangayan ngt cash at gadget sa Dasmarinas City, Cavite.

Kasalukuyang nakakulong ngayon sa Dasmarinas City Custodial Center ang mga suspek na kinilalang sina Raymond Carrasco, 33-anyos at Mark Abarientos, 26-anyos.

Samantala, pinaghahanap naman ng mga otoridad ang nakatakas na suspek na kinilalang si Jordan Geronimo Manquera.

Ayon sa City Police, narinig ng biktima ang tila pagsara sa pintuan sasakyan na nakaparada sa kanilang parking area.

Paglabas ng biktima ay nakita nito ang tatlong kalalakihan sa loob ng kanyang kotse kaya agad siyangt humingi sa kanilang barangay na ikinadakip nina Carrasco at Abarientos.

Nakuha sa pag-iingat ng mga suspek ang isang gunting, isang swiss knife, brown envelope na may lamang cash na pagpag-aari ni Montallana. —sa panulat ni Mara Valle

Kasabay ng pagpapatupad ng Alert Level 3 sa National Capital Region ay ang paghihigpit at pagsasagawa ng istriktong health protocols sa mga transportasyon kabilang na ang mga public utility vehicles.

Pinatitiyak ni Transportation Secretary Arthur Tugade sa mga enforcers at marshals na ang lahat ng mga commuters na pumapasok sa terminals at sumasakay sa mga public transport ay gumagamit ng face mask.

Inatasan rin ni Tugade ang mga enforcers na paalalahanan ang mga tao na huwag mag-usap o kumain habang nasa loob ng mga tren at tiyakin na naoobserbahan ang tamang physical distancing sa loob ng mga transport terminals. —sa panulat ni Mara Valle