DWIZ 882

Magsasagawa ang Department Of Transportation (DOTR) ng random antigen test sa mga pasahero ng Metro Rail Transit (MRT) at Light Rail Transit (LRT) dahil sa muling pagtaas ng kaso ng COVID-19 ngayong holiday season.

Ang nasabing testing ay para sa mga pasahero na magbibigay pahintulot o mag vo-volunteer na makiisa dito.

Inatasan ni Transportation Secretary Arthur Tugade ang mga enforcers mula sa Land Transportation Office, Land Transportation Franchising and Regulatory Board, at train marshals ng lahat ng railway lines na tiyaking naoobserbahan ang tamang physical distancing. —sa panulat ni Mara Valle

Patay ang motorcycle rider nang mabagok ang ulo habang sugatan ang angkas nito nang sumalpok sa konkretong poste sa Sampaloc, Maynila.

Kinilala ang nasawi na si Ariel Esplago, 22-anyos, at ang sugatan niotong angkas na si Rainer Christopher T. Dondoyano.

Isinugod and mga biktima sa Jose Reyes Memorial Medical Center (JRMMC) ngunit di naglaon ay iidineklarang patay na ang rider.

Ayon sa imbestigasyon ng Sampaloc Police, nakita sa CCTV Footage na bumabagtas ang motorsiklo ng mga biktima eastward nang sumalpok sa poste at doon na nga sila tuluyang tumilapon. —sa panulat ni Mara Valle

Nasawi ang isang ginang matapos itong masagasaan ng motorsiklo sa bayan ng Batangas.

Kinilala ang biktima na si Maria Isla, 80-anyos, habang ang suspek naman ay si Paul John Gonda.

Ayon sa Mabini Police, mabilis na nagpapatakbo si Gonda ng kaniyang motorsiklo nang bigla nitong masagasaan si isla habang tumatawid.

Agad namang isinugod sa ospital ang matanda, ngunit makalipas ang dalawang oras ay binawian na rin ito ng buhay.

Agad din namang dinakip ng mga otoridad ang suspek na kasalukuyang nahaharap sa kasong kriminal. —sa panulat ni Mara Valle

Handa ang Philippine National Police o PNP sa anumang posibilidad ng pagtaas COVID-19 Alert Level sa iba pang panig ng bansa.

Ito’y kasabay ng muling pagsasaillaim sa Alert Level 3 sa Metro Manila at mga karatig lalawigan nito tulad ng Rizal, Bulacan, Cavite at Laguna dulot ng muling pagsirit ng mga naitatalang bagong kaso ng virus.

Ayon kay PNP Chief P/Gen. Dionardo Carlos, mas mataas ang alert level ay asahan nang mas mahigpit ang ipatutupad na health protocols kaya’t hindi dapat magpaka-kampante lalo’t nariyan ang banta ng omicron variant.

Napatunayan na rin aniya na epektibo ang pagpapatupad ng granular lockdown upang mabalanse ang takbo ng ekonomiya gayundin ay mapigilan ang pagkalat ng virus.

Gayunman, nilinaw ni Carlos na nakadepende pa rin sa mga lokal na Pamahalaan kung magsasara ito sa pamamagitan ng paglalagay ng border checkpoints upang mapigilan ang galaw ng tao na siyang kailangan upang maiwasan ang hawaan.  —ulat mula kay Jaymark Dagala 

Naglabas ng memorandum ang pamunuan ng Philippine National Police o PNP hinggil sa kanilang Standard Operating Procedures o SOP.

Ito’y para sa contact tracing, quarantine at testing sa kanilamg mga tauhang nagpopositibo sa COVID-19 lalo pa’t unti-unti na namang tumataas ang mga naitatalang kaso ng virus sa bansa.

Ayon kay Administrative Support to COVID-19 Operations Task Force o ASCTOTF Commander at Deputy Chief PNP for Administration P/LtG. Joselito Vera Cruz, pinaalalahanan sa nasabing memo ang mga police commander na mahigpit nilang sundin ang minimum health and safety standards kontra sa virus.

Partikular na rito aniya ang pagsusuot ng facemask, regular na sanitation at disinfection sa mga himpilan at kampo ng pulisya gayundin ang pagpapanatili ng physical distancing upang maiwasan ang hawaan.

Giit ni Vera Cruz, nais ni PNP Chief P/Gen. Dionardo Carlos na mabigyang diin ang kahalagahan ng pag-iingat sa kanilang hanay lalo’t nariyan ang banta ng Omicron variant na nakapagtala na ng 14 na bagong kaso. —ulat mula kay Jaymark Dagala