DWIZ 882

Nareskyu ng mga tauhan ng Philippine Coast Guard o PCG ang tatlong mangingisda sa karagatang sakop ng Bilar, Surigao del Norte.

Ayon sa mga biktima, agad silang humingi ng tulong sa Coast Guard Unit matapos lumubog ang “MB Thomas” na kanilang sinasakyan matapos hampasin ng malalaking alon.

Tiyempong naglalayag sa lugar ang BRP Bagacay na ginagamit sa relief mission para sa mga nasalanta ng bagyo at agad silang nagsagawa ng search and rescue operation.

Sa ngayon, nasa maayos na kondisyon ang tatlong mangingisda.—sa panulat ni Angelica Doctolero

Magpapatupad ng “No Vaccine, No Entry” sa Manila Bay Dolomite beach ang Department of Environment and Natural Resources (DENR) kasabay ng pagbubukas nito ngayong araw, January 4, 2021.

Ayon sa Manila Baywalk Dolomite Beach Ground Commander Reuel Sorilla na siya ring hepe ng Environmental Law Enforcement and Protection Service (ELEPS) ng DENR, hindi papayagan na pumasok sa artificial beach sa maynila ang mga hindi bakunadong indibidwal.

Kasunod ito ng muling pagpapatupad ng alert leverl 3 sa National Capital Region (NCR) matapos ang muling pagsirit ng kaso ng COVID-19.

Kabilang din sa hindi papasukin sa nabanggit na lugar ang mga batang 11 taong gulang pababa.

Bukod pa dito, pinaiiral din ng DENR ang “One Day Before” rule sa mga papasok sa “White Beach” na nakapagrehistro sa kanilang website.—sa panulat ni Angelica Doctolero

Kinansela narin ang pasok sa sandigang bayan matapos magpositibo sa corona virus ang labing dalawang empleyado nito.

Ayon kay Presiding Justice Amparo Cabotaje-Tang nagpositibo sa COVID-19 ang nasabing mga empleyado matapos isagawa ang COVID-19 antigen testing nito lamang Lunes, January 3, 2022.

Dahil dito, nagkasa ng disinfection sa naturang opisina at bibigyang-daan ang komprehensibong contact tracing ng medical section sa gitna ng work suspension.

Sa ngayon, magsasagawa ng antigen testing sa January 6 hanggang 7 ang sandigang bayan para sa iba pang mga empleyado.—sa panulat ni Angelica Doctolero

Inihayag ng octa research group na muling tumaas sa 34.7 percent mula sa 28.7 percent ang positivity rate sa National Capital Region (NCR).

Ayon kay OCTA Research Fellow Prof. Dr. Guido David, posibleng pumalo sa 5,000 hanggang 6,000 ang maitalang bagong kaso ng nakahahawang sakit sa bansa ngayong araw.

Sa huling datos ng Department of Health (DOH), umabot sa 24,992 ang bilang ng aktibong kaso ng COVID-19 sa Pilipinas hanggang kahapon, January 3, 2022.

Samantala, hinimok naman ni David ang publiko na maging maingat at patuloy na sumunod sa ipinatutupad na health and safety protocols.—sa panulat ni Angelica Doctolero

Nagpaalala sa mga residente ang pamahalaang lokal ng Quezon City kaugnay sa pagtanggap ng booster shots laban sa COVID-19.

Ayon sa pamahalaang lokal, mas kailangan ngayon ng publiko ang pagturok ng booster matapos ang muling pagsirit ng COVID-19 cases sa bansa.

Dapat umanong gawing prayoridad ng mga residente ang pagtanggap nito dahil nakakaalarma na ngayon ang kasong naitatala sa bansa kada araw.

Sinabi pa ng QC LGUS na mas mabuti nang maging handa kaysa magpanic sakaling muling tumaas ang kaso ng nakakahawang sakit.

Sa ngayon, mahigpit na tinututukan ng task force Omicron sa lungsod ang active case finding, quarantine, isolation, enforcement of health protocols maging ang boosters at vaccination. —sa panulat ni Angelica Doctolero

Patuloy na nakamonitor ang Philippine Coast Guard (PCG) sa mga inbound at outbound passengers sa mga pantalan matapos ang holiday activities.

Ayon sa PCG, naka-deploy ang nasa 1,646 na PCG Personnel upang mas paigting ang “Oplan Biyaheng Ayos: Pasko 2021” matapos makapagtala ng kabuuang 29,315 na outbound passengers at 24, 404 inbound passengers habang nakapagtala din ng 197 inspected vessels at 291 inspected motorbancas.

Nagpaalala naman ang pcg sa mga pasahero na manatiling naka-alerto at sumunod sa mga panuntunang ipinatutupad sa mga pantalan at iba pang sasakyang-pandagat upang maiwasan ang pagkalat ng COVID-19.—sa panulat ni Angelica Doctolero

Nasa 50 healthcare workers ang dinapuan ng COVID-19 sa Gat Andres Bonifacio Memorial Medical Center (GABMMC) sa Tondo, Maynila.

Dahil dito, hindi na muna tatanggap ang nasabing ospital ng mga pasyente sa kanilang emergency rooms.

Sinabi ni Dr. Teodoro Martin, Director ng ospital, nakatanggap na ng booster shots ang mga naka quarantine na mga health workers.

Karamihan aniya sa mga ito ay nakitaan ng mild symptoms ng COVID-19.

Dagdag ni Martin, ang mga health workers ay nagpositobo sa COVID-19 matapos dumalo sa family gatherings nuong holiday season, habang ang iba naman ay nahawa nang magpunta sa mga malls.

Sa ngayon, nasa 30 COVID-19 patients ang naka-admit sa GABMMC, na mayroong 75 na kamang nakalaan para lamang sa mga mayroong COVID-19.

Kakasuhan ng PNP Criminal Investigation and Detection Group (CIDG) ang tinaguriang “Poblacion Girl” na si Gwyneth Anne Chua dahil sa hindi pagsunod sa quarantine protocols kontra COVID-19.

Sa isang pahayag, sinabi ng CIDG na nilabag ni Chua ang Rule XI Section 1 (g) (iii), (iv) ng Implementing Rules and Regulations (IRR) ng R.A. 11332 o Mandatory Reporting of Notifiable Diseases and Health Events of Public Health Concern Act.

Lumilitaw sa imbestigasyon ng CIDG na dinala si Chua sa Berjaya Hotel Makati noong Disyembre 22, 2021 ng alas-11:23 ng gabi matapos uwi sa bansa galing sa Amerika pero alas-11:40 ng gabi nang sinundo ito ng kanyang ama at umalis.

Nakita rin si Chua sa isa sa mga restawran sa Poblacion, Makati City noong gabi ng Disyembre 23, 2021.

Habang bumalik si Chua sa hotel kasama ang kaniyang ina noong Disyembre 25, 2021 ng alas-9 ng gabi at kalaunan ay napag-alaman na nagpositibo ito sa coronavirus.

Maliban kay Chua, sasampahan din ng reklamo ang mga magulang nito at ilang tauhan ng hotel kung saan dapat ito naka-quarantine.

Hindi naman kakasuhan ng CIDG ang mga close contact ni Chua pero inirerekomenda at hinihikayat nila ang mga ito na maghain ng reklamo laban sa dalaga. —ulat mula kay Jaymark Dagala (Patrol 9)